"P'pèe," Souky m'dit l'aut' sé: "Pourtchi qu'tu n'c'menche pas à êlever des couochons? J'viyais sus la Chronique l'aut' jour qu'i' n'y'a pas a la maîntchi assez d'lard pour Noué! Et à ouï les Villais, l'y'a eune forteune à y faithe, à êlever des couochons, au prix que l'lard est acheteu!"
"Bah," j'lî rêponnis: "Tch'est qu'ils y connaissent, les Villais, - i' savent tréjous tout – mais en fin d'compte, tout ch'qu'i' connaissent entouorre l'êlevage de bestieaux et d'couochons pouorrait êt mîns souos ieune de mes grosses dents!"
"Ont-i' considéthé l'travâs qu' y'à à souongni un quétot? Les vai-tu bouolli des p'tites patates à londgieu d'jours? Les pouorres couochons n'vivraient pas gras s'i' n'avaient qu'des Villais à les souogni! Et si un villais viyait un quétot auve les pourpres, i' créthait qu'i' s'sait en deu!"
Et pis, ch'est pas seulement la tchestion d'êlever des bestieaux, ch'est d'lus trouver d'tchi à mangi! L'affaithe est belle quand un fermyi n'peut pas seulement donner du lait à ses viaux! Comment que l's'hommes tchi font la louai craient tch'ils ethaient peut êt êlevés ieux-mèmes si lus m'mèes n'avaient pas té permînses d'met' du lait dans lus boutelles quand i' taient dans l'bèr? Mais nannîn, a la pliaiche dé donner du lait à un pouorre pétit viau tch'en a autant d'bésouain comme un êfant tchi veint d'naître, i' faut l'envyier ès villais et ès souo-dîsant fermyièrs de St. Cliément tchi mettent toutes lus tèrres en tomates a la pliaiche de fermer comme i' faut, et craître des patates et d'l'herbe et garder des vaques!"
"Acheteu, eune poutchie d'pétuthe couôte pus qu'un p'tit couochon couôtait quand j'tais mousse! Iou qu'est l'bouan vièr temps qu'un homme pouvait aller à la Faithe et en acater iun pour douze à tchînze chélins? Ch'tait-là l'prix qu'man Papa en payait quand j'tais p'tit. Il en gardait tréjous iun dans la cotte driéthe d'la Forge, et Mess Maugi, l'tueux d'couochons, v'nait l'tué. J'mé souveins que j'n'aimais pas êt par les c'mîns quand i' v'nait, et que j'disais à tan Ton-ton Fraînque (tch'est en Améthique acheteu), tch'i' dév'thait l'y'aver eune manièthe de tuer un pouorre dgiablye d'couochon sans aver à lî gobilloner la gorge dé-mème auve un grand couté. Tan ton-ton tait de m'n'avis étou, car il aimait hardi l's'animaux et i' n'aimait pas à les vaie souffri. Mais tu pâle tch'i' l'y'avait du fricot a la maison oprès la tueuthie!"
"Maman soulait sauver tout l'couochon! Ou' nouos baillait un fricot d'faie et d'couothée. I' n'y'avait pas à la battre à faithe du houard auve la tête, et j'y'aidgeais à netti les tripes, et quand ou' vouos griyait ch'là auve un tas d'ouognon, v'là tch'avait l'goût d'y r'vathie! Et des crétons! Man bouan' homme, ch'est-i' bouan, qu'des crétons! Et quand ou' bouoillait les piods auve d'la cabboche, tu pâle que nou s'en litchait les babînes!
"Papa d'bitait l'couochon et le m'tait au piclye dans l'saleux, et ch'tait du lard salé que nou-s avait pour dîner l'pus du temps. Sans doute, aujourd'anniet les jannes en veindraient enn'yiés, mais dans chu temps-là les gens vivaient pus simplyiément qu'acheteu, et i' taient èrconnaissants d'aver d'tchi à mangi dans l'saleux. Les mousses n'étaient pas hênitcheurs, - i' taient accouôtumés à mangi chein tchi tait mîns sus la tablye, car i' n'y'avait pas grand chouaix! Et pis, quand nou veint à penser, tch'est qu'y'a d'pus appétissant qu'un bouan gobîn d'lard fraid?"
George d'La Forge
Les Chroniques de Jersey 20/12/1947
Viyiz étout: