lé Nièr Beurre 
Les gens 'taient tous envieurs dé vaie l'film du Nièr Beurre qué l'Sieur Percy Luce avait prînt, mais pèrsonne né fûtent dêchus car ch'fut si bouan tout l'travers.
A c'menchi nou' vit la tchil'lie d'pommes siez l'Chent'nyi L'Feuvre à St. Louothains: les membres qui y étaient travaillaient d'bouan tchoeu car i' savaient bein qué les pommes s'en allaient à "Springfield" pus tard pour les femmes à p'ler. Lé hèrnais et l'vièr chéva auve un bouan vièr Jèrriais à cachi, faithaient un raide bouan portrait. Les gens en d'vant d'la maîson à mangi la bouochie pathaissaient tous dé bouanne hunmeur et ch'tait vraiement au temps passé, auve des bathies d'quatre cabots à servi d'tabl'ye.
Les portraits du jour à êtamper siez l'Sieur Snowden Le Cornu 'taient bein întérêssant. Lé vièr chéva ichîn étout allait bein trantchill'ment à faithe san tou' à êscrâther les pommes. Un coup chenn'chîn fait, lé Sieur Le Cornu s'mînt à couochi l'mar dans des teiles. Nou v'yait bein qu'il avait fait d'vant, et i' n's'y t'nait pon deux pids dans un soulié n'tout, car dans rein d'temps les couottes fûdrent en pliaiche et les hommes lus mîntent à êttreindre lé mar. Lé cidre qui sortait d'l'amet pathaissait d'eune belle couleur quand i' couorrait dans l'tchoué.
D'ichîn j'nos en allînmes ès Hêtres à St. Pierre pour vaie les femmes à prépather les bouans fricots du temps passé pour les tchuithe dans l'grand tou, dé tchi qui n'sé fait pon souvent à ch't heu'! Les portraits d'la boulang'thie 'taient bein cliairs et l'sien du d'dans du fou avec les bourdélos, pâtés, galettes à vraic et les pains touos prêts à tchuithe 'tait extra bouan.
Quand nou vit les femmes à d'senfouaner ch'tait là qu'les gens ouvraient l's ièrs! Vraiment l'mangi sus l'vièr tro faithait envie!
Pour la pel'lie d'pommes à "Springfield" i'y avait tout plien d'monde et lus habits dé vif couleurs avaient hardi d'appathence. Les bathiyis d'pommes êquartélées faithaient un aut' bouan portrait.
Nou vit la pêle auve lé cidre, et pus tard avec les pommes - en effet jusqu'à qué l'beurre feûsse tchui.
Lé Gouvèrneux et sa Danme eûtent l'air dé lus y pliaithe hardi, duthant l'temps qu'i' fûtent là.
Pus tard les mêssieux 'taient à dréchi l'beurre dé d'dans la pêle et l'mettre en brôs pour les danmes à r'mettre en p'tits pots, tandis qu'les jannes 'taient à lus amuser à danser et chanter.
Duthant l'film nou ouïyait la vouaie au Sieur Garnet Perchard à explitchi chein qui s'passait, et entre les bordées y avait d'la musique et du chant. Chenn'chîn aîdgi hardi à faithe la séthée.
EP 27/2/1960
Viyiz étout: