(Pouor faithe eune souaixantaine dé livres)
6 cabots d'pommes douoches (France ou Rom'thi - mais l'Rom'thi êcliaque bein pus)
1 cabot (ou bein 10 livres) d'pommes suthes (autcheune sorte)
5 pots d'cidre
18 limons râpés et l'jus
2 bâtons d'ricolisse hadgi
3 onches dé cannelle (ou dé toute-êpice)
9 livres d'chucre
I' faut bouoilli l'cidre à bein près trais heuthes preunmiéthement et pis ajouôter les pommes p'lées et quartellées p'tit à p'tit.
En tchuîthant, i' faut y mett' lé chucre et l'ricolisse, et un co les pommes confites faut continnuer à bouoilli pouor chîntch' heuthes.
Quand la paîle a 'té halée dé d'ssus l'feu dgiex minnutes (en rêmuant tout l'temps) nou peut y mett' la cannelle.
Eune aut' manniéthe étout était dé caûffer l'grand fou, lé jour dé d'vant la séthée d'nièr beurre, et tchuithe les pommes dans des bros, les laissant toute la niet. La pèl'lie s'faîsait d'vant caûffer l'fou, sans doute, et la compangnie y'était otchupée bein d's heuthes.
lé Niér Beurre 
Viyiz étout: