Moussieu, - J'vai par la gazette de Samedi passai, qué le Connêtable de la ville s'en va t'né une assembliée d'Electeurs Jeudi chi vain pour savai si faut erproposer ès Estats de voté la Loué sus l'Ballot.
La draine fais que schu même sujet fut discutai, je yaisi avec soin sche qu'les gazettes en disaient et tout sche chi s'passi dans les Estats. J'n'avais jamais entendu pâslé d'un système de votai comme schtila; alors ou pouvêz vos imaginai l'intérêt qué j'y prins, et quand je l'comprins, schu système! je m'dis "Là, le v'la justement sche chi nos faut en Jerri. Un système chi nos mettra à l'abri d'un tas de choses qui s'passent en temps d'êlection." Mais quand nou m'dit qu'les Estats avaient votai contre le projait, j'en resti tout surprins. Chique zuns avaient dit ès Estats qué schetait une réforme chi n'était pon nécessaire et qué schn'était pon bain d'obligi un honnête houmme à votai en cachette. Et les Estats crurent schonna!
Eh bain, moussieu, je n'sis pon du tout dé scht'avis là mé. Je crai qu'j'avons besoin dé chiques bouonnes réformes et schette-là la prumière. I ya chique temps qué j'vis qu'la couverture dé ma vieille bicoque qu'menschait dans des pièches, à pouorri. Eh bain, criyous qué j'dis 'J'nai pon besoin d'erformes et qué tout té alright.' Ma fé nanné. J'alli siès le couvreux et y vint le préchain jour y mettre du neu glii. Schest coumme sch'la chi faout faire; non laisse la bâtisse, mais que i l'y faout des erparations et bain y y'en faout; esche pon moussieu? Et pis y disent qu'i n'faout pon forschi un honnête homme à votai en cachette. Et dites-mé mon doux, chi mâ qué schela li f'rait si en l'faisant i savait qué l'élection se f'rait honnêtement et loyalement?
Ah! moussieu, je pouorrais vos en conter des scènes que j'connais de par siez nous! Y'en a chi en temps d'êlection paient les yers de leu tête pour des oeux et les poulaits qui mangent. Schest comme si mangeaient les ouex pondus par la poule du buounhomme Lafontaine. Et bain dites mé, estch'là honnête et est-che que nou peut avé confiance dans les siens chisont êlus de schutte mannière là? Nou dit, Moussieu, qui y'a bain des mannières de tuer un chan, mais je sis étout d'avis qui y'a pus d'une manière de faire des vouais. Chêqu'un fermi chi dé son terme peut dire quand le propriétaire vain li dire: "ou voterais de notre côté Mardi chivain, est'che pon Maître Tom?" Le puoure buistre sait si' ne le fait pon que son petit butin sera saisi. Et pis les personnes chi devent des rentes et chi après une mauvaise année comme schetschin n'peuvent pas les payer... est-sche que nou me dira que sches gens là sont indépendant de leu rentchiers.
Et bain, je maintchains, Moussieu, que le nouviau système amendera tout schonna. Personne ne pouorra savé pour seure de chi côté son vaisin votera, et j'dis mé que schest là une réforme chi nos faut, et je sis seure si tuous les campagnards avaient prins la paine d'êtudié et de comprendre le nouvaiau système comme mé, qui seraient tuous de m'n'avis. Chèque ou z-en criyis, Moussieu?
Je n'manquerai pas d'allai à l'Assemblée si je sis seure que le Connêtable de la Ville voudrait bain y vais d'autres campagnards même les siens chi l'opposent; car je cré qui puourrai leu faire touonai de casaque.
Un Vieir
5/12/1888
Viyiz étout: