Quand Maît'e Samuel Desperques mouothi, sa fille Hélène héthiti d'une maison et deustrais vrégies d'terre. Conséquemment, san nom pathu dans la liste du rât l'année en r'venant, tant au fonci comme au mobilyi. Ou pouvez bain penser qu'Hélène se comptait tchiquechose en effet d'importance, et ch'tait avec le pus vif pliaisi qu'ou r'chevait l'Vingtenyi quand i' v'nait pour erchever l'montant d'san rât. Oulle avait tréjous une boutelle de litcheu d'serrée dans san wardrobe contre ches occasions-là. Mais la pouore Hélène avait trejous un êternel ergret. Oulle aithait donné autchune chose pour pouver changi san sexe, car dans chu cas-là oulle aithait ieu drouait d'vouaix ès assembliées et dans l's êlections. Mais comme un changement comme ch'la était physiquement impossiblye, i' fallait bain s'contenter en attendant qu'un gouvernement arriéthi vinsse à prendre un mio d'bouan sens et donnisse le vote ès femmes.
Quand l'projet sus l'extension d'la franchise vint d'vant l's Etats, Hélène allait à peu prés à toutes les séances et suivait les débats avec le pus vif intéthêt.
Les poings li frumaient d'rage quand ou ouiyait certains membres crititchi les femmes et èprouver à convaincre la Chambre que che s'sait une bêtise de lus donner vouaix. Mais, par exemplye, quand tchique jeune Député pliaidgait lus cause et disait que l'injustice avait duthé que trop longtemps, que les femmes avaient fait lus d'ver duthant la djerre et s'étaient atchittées comme des hommes, qu'i' méthitaient d'aver l'privilège de prendre part dans l'gouvernement du pays, et ainsi d'suite, Hélène aithait voulu aver peut d'cendre de la gal'lie et aller li fliantchi ses bras attouo du co.
Che n'tait don pas êtonnant, quand la louai fut finalement sanctionnée, si la pouore Hélène vint quasiment folle de jouaie.
Oulle êtudyi les difféthentes clauses qu'avaient rapport à la femme, et ou disait comme chenna, "Je n'ai pas bésoin d'aller m'faithe inscrithe par le Counaîtablye, mé, comme les femmes mathiées sont obligies d'faithe, je sis propriêtaithe fonciêthe, et au mobilyi ettou, dans man propre nom!
J'ai vouaix dans l's assembliées d'pâraisse, sapresti! Et j'peux voter à toutes les êlections!
Hélène était enchantée de l'importance et du prestige que la nouvelle louai li avait donné.
Au c'menchement du mais d'Décembre l'Election Générale pour Députés fut ordonnée. Dans la pâraisse à Miss Desperques nou savait bein qu'i' s'en allait y aver opposition, car i' y avait dêjà longtemps qu'un candidat s'était dêcliathé pour tâchi d'tchulbuter l'Député actuel.
Ch'tis-chin fut l'prumi à aller canvasser Héléne pour tâchi d'la persuader à li promettre sa vouaix.
"Bonjour, Miss Desperques. Ou savez sans doute pourtchi que j'vains!"
"Nouffait dja, Moussieu!"
Mais oulle l'savait bain tous l'temps et s'était décidée qu'ou n's'en allait pas fliantchi sa vouaix à la tête du prumié v'nu comme chenna. Ou' s'en allait aver l'pliaisi de jouer avec ieux comnme un cat joue avec une souothie. I' fut pus d'une heuthe à l'embêter et à li faithe toutes sortes d'compliments mais ou s'gardi bain d'li faithe autchune promesse, et i' s'en fut comme il 'tait v'nu.
I' criyait quâsi qu'ou vot'tait pour li tout d'même, mais il aithait aimé bain mus le saver pour seux.
Un jour ou deux opprés v'là l'autre qu'arrive, avec un membre de san Comité.
"Eh bain Hélène," i'li dit " tu t'en vas voter pour mé est-che pon ? Tu sais bain que j'ons 'té à l'ècole ensemblye et je sommes oquo maniéthe de pathents. Je m'fie sur té, tréjous, et hier au sé en parcouothant la liste électorale, man Comité était unanime à mettre tan nom comme étant d'notre côté."
"Oh bon!" ou li raîponni, "il m'sembly'e qu'ou prenez bain des choses pour "granted," vous et vot'e Comité! Quand est-che l'èlection ?"
"Ch'est l'seize de chu mais. J'enviêthons un "taxi" à t'cherchi' tu sais."
" N'allez pon faithe ditét, par exemplye! Je peux marchi s'il l'faut et pis acheteu que j'vains à y penser, ch'est man lavage chu jour-là, ch'est pourtchi i' n'est pas fort probablye que j'sortithai."
Malgré toute lus êloquence i' r'pathithent pas d'la faithe se compromettre. Tout ch'qu'i' purent li airaichi était, qu'ou n'avait pas promins d'voter pour l'autre candidat.
Vint la séthée d'la nomination.
Et dame, Hélène se trouvi au Parish Hall de bouanne heuthe et s'assiévi dans les bancs d'vant, comme oulle en avait parfaitement l'drouait.
Opprès les préliminaithes usuels, le Connaîtablye demandi si tchiqu'un avait un candidat à proposer; les proposants et s'condants des deux adversaithes respectivement prinrent la parole chatchun à son tou, et donnithent un long résumé des nombreuses qualités de lus homme et les raisons pourtchi qu'i' valait bain mus qu'l'aute.
Chenna fini les postulants ieux-mêmes furent invités à adressi l'assembliée, ch'qui firent avec une êloquence de tchi que nou n'les criyait pas capablyes.
Hélêne êcouti bain attentivement, et fut sustout frappée de toutes les belles choses qu'i' dirent entour les femmes. Réellement ils avaient 'té si "nice" touos les deux qu'ou n'pouvait pas se décider pour letchèt voter.
Quand ou vint siez lyi, ou s'enfrumi dans sa chambre pour considéther tout ch'qu'oulle avait ouï et décider quant an tchèt qu'aithait sa vouaix.
Bah! i' s'entre valaient touos les deux!
Mais nouffait, iun était mathié, l'autre n'y était pas!
"Ah!" qu'ou dit, "chenna m'décide!"
" Je m'en vais votér pour le sien qui n'est pas mathié. Nou n'sait jamais - " A la fin lé grand jour arrivi.
Hélène s'était l'vée du matin. Les vessiaux et ses cannes à lait étaient r'pathées, et à neuf heuthes et d'mie ou ramonti à s'changi. Il 'tait un quart passé onze quand oulle arrivi au Parish Hall. Ou trouvi lâ une djaingue d'hommes qui s'minrent à faithe des hourras dès qu'i' l'aperchurent.
V'là qu'énervi si bain la pouore hardelle qu'oulle hésiti un moment et fit comme si ou s'en allait r'vither d'bord, Les deux candidats s'en viurent à sa rencontre et li offrithent touos les deux lus bras pour l'escorter jusqu'au "poll"
En la tchittant iun d'ieux li dit, "Ch'est djaix-sept qu'est vot'e numétho Miss Desperques."
La pouore fille était toute êmutionnée quand ou s'présenti d'vant l'Juge pour un bulletin.
Le Connaîtablye li souôrit un mio pour la rasseûther en li faisant la r'merque que "l'temps 'tait fraid." Hélène prins san papi et s'eu fut dans un espèce d'alcove pour le mertchi.
Le couothage li mantchi!
Ch'tait la prumié feis qu'ou votait et oulle avait si grand peux de s'tromper.
Pourtant nou li avait bain enseigni tch'est qu'i' fallait faithe. Mais quand vint l'moment de mettre sa crouaix à côté du nom du jeune homme qu'ou voulait supporter, ou s'arréti tout court et rouogi jusqu'ès ouotheilles.
"Nennin, je n'peux pas l'faithe!" ou dit à lyi même; "ch'est justement comme si j'étais à li envier un "kiss," comme je faisais quand j'êcrivais à Willie, man cousin, quand il 'tait à la Côte."
Le Juge, li, ne pouvait pas s'imaginer tch'est qu'oulle 'tait à faithe là, aussi longtemps, et i' dit tout bas au Connaîtablye. "Là, je vos avais bain dit qu'les femmes ne savaient pas lus idée pour chinq minutes à la feis!"
Et tout l'temps Hêlène restait dans s'n alcove.
Le Juge toussi. V'là tchi la fit trésauter, et dans un instant ou s'décidi tchi faithe. Ou prins san crayon et crouaisi hors le nom de l'autre candidat!
"Là!" ou dit, "chonna dait pouver faithe la même chose."
Ch'tait san candidat qui gâgni, mais "Les Chroniques" du lendemain en donnant un compte-rendu du rêsultat, annonçaient que "Un bulletin fut déclaré nul."
Mais Hêlène Desperques es'sait bain offensée s'ous alliez li dithe que ch'tait l'sien!
Viyiz étout: