Si j'criyais dé vouos faith' pliaisi
Jé vouos peindrais man chièr lecteu'
Dans bein p'tit d'temps sans m'dêrangi
La pictuth' dé la fille d'achteu.

J'nai pas vraîment besoin d'pincieaux
Ni d'chu moderne quèméreu
J'peux vouos dépeindre en deux-treis mots
L'triste portrait d'la fille d'achteu.

T'chi difféthence est-qu'nou peut vaie
Quand nou-z-'i pense à san tout seu
Entre la saine hardelle d'aut'-fais
Et la malingre fille d'achteu.

Nou soulait vaie y'a quarante ans
Dé fortes filles, tchi, d'raidde bouan t'cheu,
Travaillaient du' siez lus pathents...
Eche dé même ov la fille d'achteu?

Manches erbrachies; en d'vanté d'telle;
Bannett' d'indjenne.- las! qu'j'en ai veu!
Assises à traith, sus lus s'cabelle..
Mais oùest qu'j'en trouv'thais yunne achteu?

Dans chu temps là qu'nou-z-'aimait bein
A'les r'garder, les bras pliens d'flieu,
Pètri dans l'tro une fouannée d'pain...
Jvoudrais y vaie la fille d'achteu!

D'bouannes crêpes dé pâte, d'la gâche à fouée...
Avous-jamais gouôtè miyeu?
Des bourdélos, d'immenses pâtés...
En trouv'thous siez la fille d'achteu?

Les filles allaient au vraic aut'-fais
Et ch'est qu'i vouos l'tailliait d'bouan tcheu,
Déd'pis St.-Où jusqu'à La Moie...
Mais enviez-y la fille d'achteu!

Dans les rotchèrs à beinnitchi
Pour yeux alors ch'tait tout un jeu...
Mais j'cré qu'chonna f'thait s'êvanni, -
Mad'moêselle la janne fille d'achteu!

Cheunne'tait pon la janne fille d'aut'-fais
Quéthai yeu honte s'nou'zavait veu
Qu'oul' 'tait gindée dans un hèrnais...
Mais happez-y la sienne d'achteu!

Dans nout' janne temps les filles allaient
(S'fichant pas mal dé la chaleu')
Sercl'yi d'belles grand' cliausées d'pannais
Mais ch'la n'f'thait pas pour Miss d'achteu!

I' battaient l'beurre et l'pêtrissaient
Et l'merchaient bein à lus tous seu
Ov tchull'yi et mertcheux en boies...
Mais las et las! la fille d'achteu?...

A pi'd i s'n'allaient bein l'Samedi,
Toutes belles, habill'yis dans lus neu
Porter lus beurre, jusqu'au marchi...
Ch'la n'f'thait pas pour les filles d'achteu.

Ch'tait là la fille pour d'gherber l'grain
Matin et sé comme à mié-jeu
Pour récolter patates et fain...
Hélas, tch'est qu'chest qu'les chennes d'achteu?

Et pis quand la nièt avait tchée
Fallait les vaie aupi du feu
Ouvrer en tremme cauches et corsets...
Né m'pâlez pas des filles d'achteu!

Ov lus rouoges jaux, ch'est qu'il taient belles
N'fallait pas lus pâler d'docteu
A ches piëssantes et grosses hardelles.
Si difféthentes ès siennes d'achteu.

Roses, fortes et fraîches, ch'tait là les filles
Qu'un homme aimait dé tout san tcheu
Car i' s'saient d'bouannes mèthes de famille...
Mais cherchiz-en d'itelles achteu:

D'dentelles, dé soiës, dé tchi tout neu,
Ou trouvthez bein tout pl'ien d'ribans,
D'bliancs cotillons, dé biaux p'tits gants...
V'la chein qu'chest qu'une janne fille achteu,

Une petite taille de mauque à mi
Des ch'veux tchi changent vite dé couleu...
Des jaux pâteleuses - pas d'feu dans l'yi;
Triste portrait qu'la fille d'achteu!

A ses souliers ou fitte ses pids;
Ou n'se lasse pon par trop d'labeu'
Change sa taille à la quotuth'thie,
Et v'la chein qu'chest qu'la fille d'achteu!

Elie.