Les Pages Jèrriaises

La Russie

 

Lé Président d'l'Assembliée d'Jèrriais d'mandit au Député P.M. de Veulle dé donner san discours et ses portraits sus sa visite en Russie.

Lé Député de Veulle întérêssit les membres auvec un discours et des portraits pour pâssant trais-quarts d'heuthe. I' c'menchit par dithe qu'il avait êtudié la Russie et qu'à la d'mande du Sieur George Le Feuvre voulit faithe lé viage auve li et l'Sieur Le Maistre.

La Russie est un pays unique et ch'est pas du tout coumme les gens înmaginnent. À la pliaiche d'un passeport i' vos donnent un visa spécial et rein n'est mèrtchi dans l'passeport. Sus lé viage y'avait 12 heuthes par avion en tout, d'ichîn à Léninegrad, Moscou, Kiev et Odessa. En entrant et sortant du pays i' faut emplyi eune forme pour dêcliather ses sou. La seule chose qu'i' fallait pas photographier 'tait les avions. Les dgides pâlaient l'Angliais vraiement bein. La langue Russe est eune barriéthe pour pâler au monde. Les hôtels 'taient excellents. L'hôtel à Moscou prend 6,000 pèrsonnes et i' fallait huit ou neu minutes d'vant arriver à la salle à mangi. Lus tchuisinne n'est pas intèrnationale. Y'a d'ieau, d'la biéthe ou d'la limonade à béthe. Lé dèrnié sé tous eûtent d'la champagne dé Russie à béthe.

Tout est hardi propre. Duthant la dgèrre y'eut 20 millions d'pèrsonnes dé perdues. Partout iou qu'nou r'garde y'a des statues dé Lénine. Y'a pas d'înstruction pour la réligion dans l's êcoles. La Russie n'fait pas grand publicité coumme l'Angliétèrre. I' sont hardi pour lé sport et la "cultuthe".

Lé Czar Pierre lé Grand fondit Léninegrad. i' y'a chînq palais et un immense musée. Lé Docteu Dumaresq, un Jèrriais, au 18ième siècl'ye pâssit 17 ans en Russie.

Kiev est eune bein vielle ville et fut dêtruite deux fais dans la dgèrre. Les mêssieux fîtent eune visite d'eune fèrme qu'est couothue par des conmités seulement et consiste dé 50 mille vrégies - trais mille pèrsonnes et onze mille vaques, et i' craissent du blié et des betteraves. Les autres fèrmes sont couothues par l'Êtat.

Lé Député de Veulle montrit des magnifiques portraits - la Place Rouge, lé Kremlin, lé monument du soudard înconnu, et la grand' Univèrsité où'est qu'y'a souoxante mille êtudiants, et bein d'autres choses.

Auprès qué l'Député de Veulle aver r'chu d'grands applaudissements, l'Président l'èrmércyit pour san discours et ses portraits.

 

Jersey Evening Post 27/10/1971
(auve un mio dé r'daction)
 

 

Viyiz étout:

 

Les Pages Jèrriaises