A Monsieur L'Editeur.
Monsieur, - J'avais prins l'habitude que quand t'chique
chose me gênait, je d'mandais des raisons à not' ami Luce (d'heutheuse mémoithe).
I' n'm'réponnait pas, mais l'idèe q'liesait mes lettres me calmait un miot, car
li étou i' s'attendait à vaie d'grandes choses quand v'aindrait la période de
réconstruction.
Bon! nos y v'la.
Tout allait bain dans l'temps d'la dgerre. J'avaimes de
buoans hommes à la barre et il est dit par tout l'monde que Jerri est un
paradis en compazaison des autres pays. Mais t'chest "la note" qui faut payer,
et d'même le v'la le d'z'accord.
Les uns s'battent pour l'esprit, le autres pour le thée, et
tout c'h'la se fait, d'vant q'l'femmes aient vouaix.
Dites mé, êtes 'ous êtonné, que d'pis l'temps que nou' en
pâsle, personne n's'gêne de nos apprendre, comment vôter, comment condithe une
élection? Pour dé mé j'en approuve pas, car si y'en a qui comprennent la grande
responsabilité d'une vouaix, par contre les autres né pathaissent se gêner de
rain sinon de pâsler en public, ou bain d's'd'guiser d's'travestis en hommes.
T'c'hest que tout c'h'la veur dithe? sont y' folles!
Ah! c'h'n'est pon dans ma paraisse qui voudraient suggether
des exhibitions si grotesques. Nou d'ja mes belles jeunes filles, men avis que
j'en vos vends pas, est, que si ou voulez vos divertir et aidji ès tristes
mutilées, y a bain des maniéthes à tuer s'en t'chan sans l'pendre.
Les temps sont sérieux et l'temps à v'nin ou éthaient vos
pièches à rempli, s'i nou peut dithe de vous. "Ou soigne bain sa maison" ou
bain "t'chest une femme modeste, avec une bouanne tête sus s'epaules" eh bein
nou verra du bain d'fait. Y'en a qui pâsle assez d'la santé publique - mais un
p'tit pûs de morale n'faithait pas d'mâl.
Et pis, pour en finir tout court. L'habit du soudard
devth'ait ête respecté. Tous qu'ils l'portent n'sont pas d'zanges, mais, le
souvenir des siens qu'ont donnè lûs vies - pour nous - dans l'habit, est oquo
bain frais - vaithe, c'h'la m'fait triste. Et vous, l'uniforme de l'infirmerie
n'est pas pour vous garçons. Ou f'èthaient mûs de vos informé combien qui y'en
a qu'ont donnè lûs vie pour la patrie, et hardi des autres vos d'man'dont quand
y s'viendront. "Ouaique ou z'êtes dans le temps d'l'à geurre?" A vous de choisi
t'chique chose de pûs simplye. "Un buoan paisson d'Avril" c'h'la f'éthait bain
- pas pour tous - je d'la raison. En vos r'merciant,
Je reste, à la vieille mode,
Elizabeth Machon.
Mon Plaisir
P.S. - Une autre chose qui m'gênait, t'chest que la "Chambre
de Commerce" avait dit qu'il 'tait temps d'abolir le français. Dépis, je oui
que t'chutte chambre là ne peut pas faithe de mâ à une mouque. J'en restons là,
et d'même j'avons la buoanne chance de pâsler sans que l'restant ne nos
comprennent. I' dev'thaient en être bain contents les autres.
Chroniques de Jersey 30/4/1919
Viyiz étout: