Les Pages Jèrriaises

Henri VIII et l'Eglyise d'Angliétèrre

San Antonio,
Texas, USA

Lé 15 dé janvyi, 1983

Moussieu l'Rédacteu,

J'ai souvent ouï dithe, même par des gens d'églyise tchi dév'thaient saver mus, qu'l'Églyise Anglyicanne fut fondée par lé Rouai Henri VIII. Tchi niolîn!

À la Glouaithe dé Dgieu

Ch'tait l'Pape Cliément VII (Pape dé 1523 à 1534) tch'était sus l'trône pontifical en 1534 quand Henri VIII tchestchionnit la r'cliâme d'autorité ecclésiastique univèrselle dé Rome, mais l'Pape, né fît autchun êffort pour faithe les fidèles tchitter à prendre les sacréments dans l'Églyise d'Angliétèrre. Si Henri VIII avait fondé eune nouvelle églyise ch'éthait 'té ch't'année-là, et l'Pape n'éthait janmais pèrmîns à ses fidèles dé s'en touoilli, Au contraithe, lé préchain Pape, Paul III (1534-1549), "promoteur" du Concile dé Trente, pèrmînt ès Catholiques dé continnuer à la hanter et y prendre les sacréments. La même chose continnuit souos l'Pape Jules III (1550-1555) et Marcel II, Pape pour 22 jours auprès s'n êlection en 1555. San successeur, Paul IV, régnit jusqu'à 1559 et fut rempliachi par Pie IV. I' mouothit en 1565 et 'tait l'siexième Pape dépis qué Henri VIII 'tait supposé aver fondé l'Églyise d' Angliétèrre. Les Catholiques Romains avaient 'té bâptîsis, confirmés, r'chu l'absolution et avaient prîns la Sainte Communion pour pus d'trente ans d'dans, et Rome n'avait fait autchun êffort pour dênoncer la catholicité d'la supposée nouvelle églyise ou empêchi les fidèles dé la hanter! Si ch'la n'est pon eune preuve qué l'Saint Siège n'èrgardait pon l'Églyise Anglyicanne comme étant eune nouvieauté fondée par Henri VIII, mais qu'oulle 'tait la vraie églyise nationale, Catholique et Apostolique du pays, comme l'était l'Églyise d'Italie (appelée Romaine), d'l'Espangne et d'la France, i' n'y en étha janmais!

Ch'tait l'Pape Pie V (1556-1572) tchi, en 1570, ayant pèrdu espéthance dé faithe l's Angliais lus soumettre à la tyrannie d'Rome, prononcit l'excommunicâtion contre la Reine Élizabeth et l'Églyise d'Angliétèrre - trente-siex ans auprès qu' Henri VIII avait ieu ses chicangnes auve lé Pape dé san temps -et pour la preunmié fais les fidèles fûdrent d'fendus d'hanter, l'Églyise Anglyicanne.

I' pathaît qué l'Chrêtchienneté avait 'té apporté en Angliétèrre par les Gaulouais tch'avaient 'té convèrtis par l'Apôtre St. Paul. Y'a même eune légende tchi nouos dit qu'St. Joseph d'Arimathie, tch' était marchand, soulait vîsiter l'Angliétèrre dans l'couothant d'ses viages dé commèrce, et tch'il y mouothit et fut entèrré dans l'chînm'tchiéthe dé l'Abbaye dé Glastonbury. L's anciens du vaîsinné d'chutte abbaye-là pathaîssent aver pensé qué Nouotre Seigneur Li-même avait probabliément viagi auve St. Joseph quand Il 'tait mousse et mîns l'pid en Angliétèrre, St. Joseph étant supposé et' sén oncl'ye.

L'Églyise Pârouaîssiale dé St. Hélyi

Quand St. Augustîn, env'yé en Angliétèrre par lé Pape Grégoire lé Preunmyi (590-604) pour convèrti l's Angliais, y mînt pid à tèrre i' trouvit l's églyises - i' n'y avait qu'eune Églyise Chrêtchienne dans l'monde dé chu temps-là (les nonconformistes ou souô-dîsant "libres" églyises fîdrent lus appathences bein pus tard) - dêjà êtablyies dans difféthentes contrées du pays. Nou peut don dithe qué l'Églyise d'Angliétèrre avait dêjà ieu san c'menchement longtemps d'vant l'arrivée d'St. Augustîn, et ou n'a janmais ieu autchun aut' nom qu' l'Églyise d'Angliétèrre sénon Anglyicanne, tchi veurt dithe la même chose. Ou n'a cèrtainement janmais 'té l'Églyise dé Rome! Sén excommunicâtion par ch't' Églyise-là dans l'temps d'la preunmié Reine Élizabeth né changit pon san caractéthe Catholique, et la Succession Apostolique dé s'n hiérarchie a 'té souongneusement continnuée jusqu'au jour d'aniet. S'n îndépendance et ses privilèges fûdrent affirmés par lé Rouai Jean, à l'înstance dé ses barons, dans La Grande Charte à Runnymede en 1215.

Mais pour èrvénîn à St. Augustîn. Lé Rouai Ethelbert donnit eune vielle églyise dêjà êtablyie à Cantorbéry. Il en fît san siège épiscopal et d'vînt l'preunmié Archêvêque dé Cantorbéry vèrs l'année 600.

Nouot' Églyise n'est qu'protestante en ch'tchi concèrne cèrtaines crianches et couôteunmes tchi n'sont pon autorisées par les Saintes Êcrituthes, ou tchi n'ont pon d'originne êtablyies d'dans, et en ch'tchi concèrne la crianche dans l'înfaillibilité des Papes dé Rome. L'excliûsion d'ches crianches-là nouos a laîssi un catholicisme tch'est pus nettement d'accord auve les Saintes Êcrituthes, et tch'est explyitchi en dêtail dans Lé Symbole dé St. Athanase à la page 45 dé La Litourgie. Là, ou vèrrez, au bas d'la page 46, s'ou voulez r'êtudier vouot' Litourgie, qué "Telle est la foi catholique, laquelle quiconque ne croira pas fidèlement, ne pourra être sauvé."

J'veurs bein admett' qué les gens d'à ch't heu ont l's idées pus larges qué les cheins du temps jadis tch'ont fait les litourgies, et qué l'esprit oecuménique dé nouos jours est admithabl'ye. I' faut penser qué lé rappraichement dé toutes les sectes Chrêtchiennes au sein d'l'Églyise Univèrselle est et qu'ch'est nouot déver d'travailli pour tel rappraichement à cor et à crîn, Ch'est don à l'întéthêt d'châque Églyise ou secte îndividuelle d'examinner s'n originne, sa constitution, san caractéthe et ses crianches dévant penser à êprouver à s'accorder auve les autres, à seule fîn d'êviter les malentendus pus tard.

 

George d'La Forge

 

 

 

 

Les Pages Jèrriaises