|
Vive l'cidre! l'cidre coeuru! Le cidre est remplli de vertu: Quand nouz a sé i' desaltere, Et ch'est un vrai pllaisir de l'bere: I' ne vouos laisse aucun rtunfin, Qu'ous le beviez ser ou matin. I' n'monte pas vite à la tête, Nou n'en dveint pas en l'heure bête; Et s'ous voulez aver du coeu, Bevez du cidre qui-a du feu. J'ai parfais pensè qu'not' grand mere Nouos a joué un vilain tou, vere; Mais n'seyiz pas entout ravis Qu'Eve nouos perdit l'paradis: La tentation était trop forte, Et vite ou fut minse à la porte; Mais j'avons la consolation D'aver le cidre pour bouaisson. Vive! vive le jus d'la pomme, Le souotien, le r'confort de l'homme.
P.L.
|
Vèrsion modèrnîsée:
|
Vive lé cidre! lé cidre tchoeuthu! Lé cidre est remplyi dé vèrtu: Quand nou-s'a sé i' désaltéthe, Et ch'est un vrai pliaîsi dé l'baithe: I' né vouos laîsse autchun r'tunfîn, Qu'ou lé béviez sé ou matîn. I' n'monte pas vite à la tête, Nou n'en d'veint pas en l'heuthe bête; Et s'ou voulez aver du tchoeu, Bévez du cidre tch'a du feu. J'ai parfais pensé qu'not' grand méthe Nouos a joué un vilain tou, véthe; Mais n'séyiz pas entout ravis Qu'Êve nouos pèrdit l'paradis: La tentâtion était trop forte, Et vite ou fut mînse à la porte; Mais j'avons la consolâtion D'aver lé cidre pour bouaisson. Vive! vive lé jus d'la pomme, Lé souôtchein, lé r'confort dé l'homme. |
Viyiz étout: