Les Pages Jèrriaises

Des reflexions sus l'zeslections et lus produits

 

D'abord pour qui yait contestation y faut qui yai Eslection.

Souvent les produits cause eun tas d'mentis et font d'sennemis.

L'zeslections font souvent du troubye dans les maisons.

L'zeslections ont souvent produit dans les familles des divisions qui n'ont jamais tai rarangis, ch'nest q'la mort qui l'za finis.

L'zeslections ont viedgi bein des piêtons qu'l'sanciens avais rempyi avec bein d'la peine et du souci.

L'zeslections peuvent produire d'mauvaise impressions sans autchun fond.

Sou voulais vos portai candidat touos vos d'fauts l'monde les counnaîtra, et oquo y'en ajouottra et tâchrons d'en inventai, s'in peuvent pas en trouvai.

Si l'urne ou la bouaite avec toutes ses croix pouvait paslai y'en errai qu'in sairais pas iou lus coulai, ou verraites eune confusion s'produithe, mais, la bouaite vomis, et dé toutes ses croix la v'la deschergis, et touos ses d'voirs accompyis.

Dans l'zeslections avous prins d'avis qui y'a hardi d'monde qu' ont les gambes faillis.

Les bouchons font grand tort dans l'zeslections, malheureusement y'a yeu d'zeslections gagnis par des bouchons.

Et dans bein des maisons la séthée d'leslection faudrai yallai vais chein qui peu s'y passai, l'cheu vos en sangrait.

L'zeslections peuvent aitou produire la r'counnaissance pour des gens bein pensant. D'pensai qui y'a des gens qui veuillent bein servi pour nos protégi. Si persounne né voulait servi, j'saime dans eun grand dangi, dans des temps n'ou n'pouorrait pas dormi.

Et s' y fallait paiyi du monde a nos servi j's sai eune ruine, a n'en pas fini.

Ch'est pourtchi en piagnant les siens qui veuille bein lus laissi crititchi, j' d'von nos resjoui qui veuillent bein nos servi.

Avous ermertchi qué quand l'Juge Délégué annonce lé résulta, disons qui dirait 260 voix pour lé gagnant. Né v'la l'candidat qui monte sus lestrade pour paslai es électeurs, nou za d'la peine a l'entendre; p'têtre l'esmotion ou l'combat. Yeun qu'avait la tête un mio p'sante dits: Nou n'peu pas seulement l'entendre, pourtant, l'Juge a dit qu'il avait 260 voix, et nou n'peu pas l'entendre.

Y' eun lis dits: Pouorre bachouar. Quand l'Juge a dit qu'il avait 260 voix y voulait dithe qué 260 persounes avais votai pour li mais pas qui pouvait paslai avec la forche de 260 voix, grand babeine. Ah! Ah! j'comprends.

L'Juge Délégué dit: Au candidat ou candidats élus ou vos trouverais a la Cour Sam'di d'vant l'Bailli pour être assermentais.

V'la l'eslection finie, mais l'dernié mot n'est pas oquo dit.

Faudrait ouï chein q'châtchun dit, en s'en rallant siez li.

L'suns tchoeu resjoui et d'autres l'tchoeu prêt à lus sangni.

Et l'perdant vos dira tréjous qu'il a tai trahi.

 

J. M.

 

Viyiz étout:

 

Les Pages Jèrriaises