Des r'mièdes du temps pâssé
 un colînmachon
|
Moussieu l'Rédacteu,
"La pouorre vielle Missis Lé Sbithé n'est pon bein heutheuse dans ses vièrs jours," nouos disait sa vaîsînne eune arlévée dans L'Carrefour des Pèrrons en r'vénant d'la boutique à La Fontaine, Manman et mé, quand j'tais mousse y' a eune huiptantaine d'années.
"Bon!" s'fît Manman, "j'criyais qu' oulle 'tait mus d'ses rhonmatisses dépis qué l'Docteu Beinn'clift est san docteu."
"Véthe," la vaîsînne nouos dît, "mais oulle est sans l'sou, et ou n'veurt pon êt' sus la pâraisse. Sa fille et s'n homme, tchi d'meuthaient en Sèr, fûdrent n'yiés touos les deux quand il' 'taient à la pêque et qu' lus baté fut coulé dans la tempête du mais pâssé, laîssant un p'tchiot d'eune dgeîzaine dé mais qué l's autorités ont env'yé à la bouannefemme viyant tch'i' n'y'a pon d'pathents en Sèr. Lé pouorre pétchiot a l's éthitchettes et ou n'a pon les mouoyens d'aver l'docteu. Et pis il a un mauvais fraid. S'ou savait comme tchi faithe du sitho d'colînmachons, ou crait qué v'là tchi l'èrfaithait d'san fraid, ou m'disait à matîn."
"Eh, bein," Manman lî dît, "ch'est bein aîsi. I' n'est pon bésoin d'êt' docteu pour en faithe. J'mé d'mande même si les docteurs y craient, à chu sitho, mais il est fanmeux pour èrdgéthi du fraid. Dis à la bouannefemme dé dênichi deuxs' trais colînmachons l'sé, d'eune muthâle tch'est propre, et i' faut tch'i' s'saient enfreunmés dans lus cruques. Lé sitho dait êt' fait frais châque jour. I' faut prendre trais colînmachons, l's êssuyer bein et les mett' dans eune souôtàsse. Et pis i' faut taper sus l'hait d'la cruque pour la cratchi, et les saûpoudrer atout du jaune chucre et les laîssi d'même toute la niet. Lé lendemain au matîn, i' faut ôter cruques et colînmachons et ajouôter du jus d'limon ou d'orange, ou d'l'essence d'almande. Né v'là tchi fait eune tchul'lée à thée d'sitho, assez pour eune fais pour un p'tchiot. Pour eune grand' pèrsonne il en faut pus."
"J'ai tréjous trouvé ch'la drôle qué les docteurs né craient pon à nouos r'mièdes du temps pâssé," - s'fit la vaîsînne, "prîncipalement comme nou-s-a veu comme tchi qu' ches r'mièdes peuvent soulagi les souffrances, et même èrdgéthi les malades. Èrgardez l'cas du janne Âmice Rousset. Il avait un frouët au côté d'la gorge qué l'docteu voulait gobillonner pour lé clièrgi. Pour lé faithe meûthi d'vant faithe sèrvi san couté i' lî donnit d'l'onguent à mett' dessus. L'affaithe duthit pour des s'maines et l'frouët n'sé r'faîsait pon. Âmice 'tait à faithe la carre à ma soeu Jeanneton dans l'temps, et ou lî mîns un poussot d'molène pour lé faithe meûthi, et pis un poussot d'linnette bouoillie quand i' fut meux, et i' sé r'fit dans p'tit d'temps. Sans doute, lé docteu r'cliâmit qué ch'tait s'n onguent tchi l'avait r'dgéthi, mais i' n'y'a pon d'doute dans m'n idée qué ch'tait l'poussot d'linnette, pûtôt qué d'l'onguent d'acat et fait atout Bouân Dgieu sait tchi sorte d'graîssinn'nie.
"Et y'avait l'cas, à ches drein, dé Jean L'Veslet, tch'avait d'l'enflieunme à la fache à cause d'abcès. Un docteu voulait lî'érachi des dents tchi, d'aprés li, 'taient la cause dé l'abcès. Missis Lé Nobl'ye, tch'est quâsi aussi au'faite atout nouos r'miêdés du temps pâssé pour les gens comme Mess Hubert, Dgeinn'tîle, est pour les vaques et les j'vaux, lî mîns un vithicatouaithe dé linnette sus l'enflieunme, et il 'tait r'dgéthi dans un coupl'ye d'jours."
"Un aut' èrmiède est d'bouoilli eune touffe dé pèrsi pour poussoter l'enflieunme," s'fît Manman. "Et si l'pèrsi n'est pon d'amain, nou peut bouoilli des flieurs dé seu. Ch'est absolûment r'mèrquabl'ye combein d'pliantes qué l'Bouân Dgieu nouos a donné pour soulagi et r'dgéthi les maux."
"Véthe," sé fît la vaîsînne, "et j'ai pus d'confianche dédans qué dans les boulets des docteurs, mé. Et jé n'peux pon comprendre pourtchi qu' les docteurs né vaient pon cliai assez pour lus apèrchéver qu' les vièrs èrmièdes sont miyeurs que lus boulets."
"Eh bein," Manman nouos dît, "lé pâssage du temps nouos apporte des changements, et i' n'faut pon oublier qu' les docteurs font du bein, prîncipalement quand y'a tchestchion d'gambes, hanques ou bras rompus. Dans des cas d'même des poussots né valent pon chi. Et j'avons la chance d'aver un docteu du calibre du Docteu Beinn'clift. Jé n'lai janmais ouï s'motchi d'nouos r'mièdes du temps jadis, et j'lé même ouï dithe tch'i' y'en a tchi sont bouans pour bein des maux."
Viyiz étout:
