Ottawa, Ontario,
Canada.
Lé 11 novembre, 1967.
Moussieu l'Rédacteu,
En r'liêsant les gâzettes dé Jèrri qu'man fréthe Fraînque avait mîns d'côté pour mé quandi qué j'tais dans l'Île ch't êté, j'viyais eune articl'ye disant qu'Mdlle. Marion Furzer s'en allait à Bombay, dans l'Înde, pour êt' missionnaithe parmi les lépreux. Ch'n'est pon souvent qu'nou ouait pâler d'chutte maladie-là d'nouos jours. Y'a deux mille ans ch'tait eune aut' affaithe. La Bibl'ye en fait mention souvent. Ch'tait eune maladie si âffreuse et dêfidguthante qué les gens avaient peux d's'appréchi des pouorres dgiâtres tch'avaient ieu l'malheur dé l'attraper!
Quand j'en pâlais à man fréthe, tchi m'avait d'mandé s'i' j'connaissais la d'mouaîselle Furzer, i' m'dit: “Ch'est-i' eune bouanne chose qu'ou' n'existe pon d'nouos jours, chutte maladie - là!”
“Malheutheusement, si fait, oulle existe, valet!”, j'lî dis. “Y'a acouo un tas d'pèrsonnes tch'en souffrent, d'la lèpre. J'en ai veu au mains douze chents d'mes propres ièrs!”
“Bon!”, i' m'dît, “jé n'criyais pon tch'i' y'en avait à ch't heu. Où'est tch'i' sont, don, ches pouorres tristes-là?”
“Eh bein,” j'lî dis, “j'avons la chance qué nou n'en vait pon l'tou d'sé dans ches temps-'chîn, ouaithe tch'i' m'sembl'ye cèrtainement en aver veu dans la vielle ville dé Jérusalem en Tèrre Sainte. Mais en Améthique et en Angliétèrre les gens tch'y veinnent dé l'êtrangi par avion ou dans les navithes sont examinnés par les docteurs dévant s'embèrtchi, et tu-as p't êt' èrmèrtchi qu'un docteu vouos donne un coup d'yi sans faisant la minne dé rein en arrivant, mais ché n'tait pon tréjous d'mème!”
Ch'est eune maladie tch'attaque pûtôt les gens tchi sont natifs des pays cauds, l's Îndgiens, les Chinouais, les Japonnais, enfin, les races Asiatiques et l's Afritchains - des gens d'couleu. Dans l'temps jadis, les navithes dé touos les pays du monde v'naient dans l'port dé Londres en Angliétèrre, et ch'tait par les navithes tchi v'naient d'l'Orient qu'la lèpre 'tait v'nue dans l'Rouoyaume Uni. Des hommes dé races Orientales travaillaient comme mat'lots à bord dé ches navithes-là, et la maladie 'tait apportée en Angliétèrre et dans d'aut' pays d'l'Europe, et en Améthique du Nord, par ches gens-là. À un moment donné - y'a bein longtemps - y'avait au mains sept hôpitchiaux pour les lépreux en Angliétèrre. Lé palais appelé “St. Jacques” à Londres, tch'existe acouo au jour d'aniet, en 'tait iun. I' m'sembl'ye aver ouï qué ch'tait lé rouai Henri VIII tch'en fit un palais auprès qué ch't âffreuse maladie-là dispathut en Angliétèrre et qué l's hôpitchieaux c'menchîdrent à viédgi viyant qu'eune louai fut passée pour faithe les cap'taines dé touos les navithes faithe à saver ès autorités des ports, en m'ttant eune cèrtaine couleu au haut du mât, tch'i' y'avait des malades à bord. Dans chu cas-là, les navithes n'étaient pon pèrmîns dé v'nîn dans l'port ni mettre les malades à tèrre, et la lèpre et autres maladies contagieuses c'menchîdrent à dispathaître un mio à la fais.
Dans les pays Orientaux, l's Îndes Occidentales et l'Améthique du Sud, y'a acouo gentiment d'lépreux. En général, chutte maladie-là n'attaque pon les gens tchi sont bliancs. La seule mannièthe tch'i' pouorraient l'attraper es'sait par un mêlange dé sang, ch'est à dithe qué s'i' eune pèrsonne avait eune cope ou eune êgrinflieuse dans la main, ou' pouorrait l'attraper en châtchant d'main auve un lépreux. Dé temps en temps, i' s'en trouve quand-mème iun ou deux ichîn et là dans l'Améthique du Nord, mais eune fais dêcouverts i' sont env'yés dans un hôpita spécial appelé eune “léproserie” dans la ville dé Carville, en Louisiane.
J'ai ouï qu'ch'est prèsqu'împossibl'ye d'extèrminner la maladie dans l'Améthique du Sud. Aussitôt qu'un lépreux est dêcouvert (i' y'est, viyant qu'les docteurs sont oblyigis dé rapporter touos les cas) il est forchi dé sé s'pather d'sa fanmile et d'aller dans eune léproserie pour êt' souangni, et la grand' partie des pouorres dgiâtres là-d'dans n'en r'sortithont qu'auve les pids l'avant et dans eune bouaîte. La preunmié chose qué les cheins tch'ont l'malheur d'en souffri veulent don faithe est d'muchi lus mînsethe et d'souffri, en cachette sans avèrti l'docteu à seule fin d'n'êt' pon env'yés dans la léproserie. Dans bein des cas les gens tchi sont en contact l'attrapent étout, car i' y'a souvent un manque d'hygiène parmi les pauvres dé ches pays-là.
Eune fais j'en visitis ieune, eune léproserie. J'tais dans un navithe tch'amathit dans l'port dé La Guayra, en Vénézuêla. J'mé décidis d'aller à tèrre pour visiter Caracas, la capitale, et pis aller à la ville dé Vénise et r'jouaindre lé navithe à Puerto Cabello. Comme jé travèrsais l'haut des montangnes Andes j'avisis eune înstitution dans l'mathais tchi longe la mé auprès du port dé La Guayra. Quand j'apprîns qué ch'tait eune léproserie j'mé décidis sus l'coup qu'j'îthais la vaie quand l'navithe èrveindrait-là pus tard, mais j'n'ai pon assez d'run dans chutte lettre 'chîn pour vouos raconter tch'est qu'j'y vis - j'vouos l'dithai la s'maine tchi veint!
George d'la Forge
Viyiz étout: