Fort Lauderdale,
Florida, USA.
Lé 24 dé janvyi, 1981.
Moussieu l'Rédacteu,
“Bon!”, Manman dît à Missis Hubèrt, qué j'rencontrînmes dans La Rue à La Pendue en r'vénant d'la boutique eune arlévée quand j'tais mousse ès Landes à St. Ouën. “As-tu d'la peine à marchi? Janmais jé n't'avais veue cliopinner d'mème!”
“Oui dgia!”, Missis Hubèrt nouos dît, “Jé n'sai pon si ch'est mes rîngnons ou des rhonmatisses, mais né v'là eune volée qué j'sis vengie d'même, et dans des temps j'ai d'la peine à gabather.”
“As-tu ma dans l'côté?”, Manman lî d'mandit.
“Nannîn,” ou rêponnit, “j'sis prînse au haut d'ma hanque, et v'là tchi d'valle jusqu'au g'nou.”
“Eh bein,” Manman lî dit, “jé n'créthais pon qu' ch'est tes rîngnons. Ch'est probabliément des rhonmatisses. Mais as-tu veu l'docteu?”
“Nannîn,” ou nouos dît, “Dépis qué l'Docteu Beinn'clift a tchitté j'n'ai pon voulu en vaie un autre. Comme tu l'sai bein, Ann,” ou dît à Manman, “il 'tait si av'nant, l'Docteu Beinn'clift, et si bouân docteu en même temps, qué nou lé r'gardait quâsi comme un membre d'la fanmil'ye. Et nou-s-avait confianche dans ses r'mièdes et les boulets tch'i' nouos faîsait avaler. Et quand i' vouos disait tch'i' n'y'avait pon cause dé s'gêner car ché n'tait rein qu' un pé d'travèrs tchi vouos avait donné un p'tit malaise, les boulets et l'bieau souôrit sus sa fache vouos r'faîsait dans un clyîn dgi. Mais tch'est qu' j'allons faithe sans lî à ch't heu?”
“Eh bein,” s'fît Manman, “l'Docteu Beinn'clift nouos a r'quémandé l'nouvieau docteu. I' faut lî donner eune chance.”
“Mais il a un si drôle dé nom!” s'fît Missis Hubèrt. “Chaûme, est-ch'ti' pon?”
“San nom n'a rein à faithe à sa capacité.” Manman lî dît. “Il a un nom Angliais, Shone, qué nou prononce Chaûne, et l'Docteu Beinn'clift nouos a asseûthé qu' ch'est un fanmeux docteu. Tu dév'thais l'êprouver.”
“J'en ai peux!”, s'fît Missis Hubèrt. “J'ai ouï tch'il est hardi pour faithe d's opéthâtions, et tch'i' porte tréjous un grand couté dans san nièr pagas atout l'êcouteux tch'i' s'met dans l's ouothelles pour ouï l'tchoeu battre. Ch'est seux qu' la preunmié chose tchi voudra faithe es'sa dé m'coper la gambe et aver Fred dé Caën à m'mett' eune gambe dé bouais!”
“N'en v'là-t-i', du niolîn!” Manman lî dît. “Tu dai bein saver qu' ch'est un tas d'bêtîn, tout chu d'vis entouôrre des coutchieaux. Dans touos les cas, s'i' faut êt' opéthés i' vouos env'yis à l'Hôpita. Ch'est à bein près seux qu'eune fais tch'il éthait examinné ta gambe i' t'la frot'ta atout d'l'onguent et t'donn'na des boulets comme lé Docteu Beinn'clift éthait fait, et l'cliopîn s'en îtha.”
“Jé n'm'en vais danme pon mé d's'habilyi à la maîntchi en d'vant d'un janne docteu d'mème et lî montrer mes gambes. I' voudra p't-êt' les tâter, étout.”
“Bah!”, s'fît Manman, “tu sai bein tch'i' y'a un vièr diton tchi nouos dit qu' la tâte n'est pas d'fendue!”
“Véthe, mais ch'est seux qué ch'tait un homme tch' înventit chu diton-là, et si chu janne docteu c'menchait à tât[onner ma] gambe j'en éthais si honte qué ché s'sait assez pour mé faithe m'êvanni!”, s'fît Missis Hubèrt. “Et ch'est vrai tch'il est pour coper les gambes. Tu sai bein tch'i' copit la cheinne à Pièrre Lafétchet la s'maine pâssée.”
“Dans chu cas-là, ché n'tait pon eune affaithe dé rhonmatisses,” Manman lî dît. “Lé pouôrre vièr Pièrre, tchi travaillait dans la carriéthe à L'Êta, eut la gambe êgliamie par la grosse pièrre tchi tchit d'ssus quand eune minne sautit d'vant tch'il' eûssent lé temps d'lus dêcârrer vite assez. Quant à aver peux d'lî montrer ta gambe, ma pouôrre fille, les docteurs vaient tant d'dgéthets et aut' parties du corps touos les jours tch'i' n'y prannent pon pus d'avis qué d'èrgarder l'nez qu' tu-as dans l'mitan d'ta fache!”
"P't-êt' bein, Ann,” s'fît la malade, “mais ch'est pus fort qué mé dé m'montrer d'même à des jannes hommes. Est-i' mathié, l'Docteu Shone?”
“Mais oui, il est mathié,” Manman lî dît, “mais ch'est d'tes affaithes si tu veurs continnuer à souffri et cliopinner ouaithe qu' eune visite siez l'docteu t'èrféthait probabliément dans p'tit d'temps. Et i' faut qu' nou s'accouôteunme an nouvieau docteu. L'Docteu Beinn'clift sé vieillis, comme touos nous, et i' faut bein l'laîssi s'èrposer. Nou-s-en a touos r'gret, sans doute, mais i' faut êt' èrconnaîssants d'l'aver ieu à nouos souangni si longtemps, et donner eune chance au nouvieau Docteu Shone.”
George d'la Forge
Viyiz étout: