Moussieu l'Editeu,
La Merrienne, s'étant dêfaite de deux d'ses cotillions la s'maine passée, est au liet avec un mauvais fraid. Je crai qu'ch'est dans ses rignons, mais nou n'peut pas savé, car quand j'la tchéstchonne sûs chu point-là, ou m'dit de m'mêlé d'mes affaithes.
Ou n'veur personne à la soigni, et don ch'est mé qu'à la djobbe, et j'vos asseuthe qu'ou n'est pas c'mode la bouonnefemme quand ou n'est pas bain. J'fais d'man mûs, mais rain n'l'y pliait. Ou gronne et gronne du matin jusqu'à la niet et je n'peux jamais la satisfaithe.
Quand ou fut prinse, j'voulais envié pour le docteu, mais ou n'voulit pon en ouï pâslé. “Si man temps est v'nu,” ou s'fit, “j'm'en îthai, et si n'est pas v'nu j'réstéthai.” Et la v'la tch'y s'met à pâslé des docteurs en général.
“Quand j'tais p'tite fille,” ou qu'menchit, “n'y avait pas la maintchi des docteurs tchi y'à agniet, nan pas même le quart, et l'monde vivaient tout aussi longtemps. Man grand-pèthe, tch'y fut tithé à l'âge de nonante-chinq ans par un homme tch'était jaloux d'sa femme, pouôre bêtasse, n'avait jamais yeu un docteu dans sa vie, et ch'tait d'même avec man pèthe. S'y n'avait pas tchais du haut d'une vieilotte quand il éthait deu être assis dans sa grand'chaise aupi du feu, à l'âge tch'il avait y s'sait envie agniet.
“Quand à mé,” ou continuit, “j'n'y crai pon à chais docteurs. Te r'souvains-tu, y'a tchiques années que j'fut prînse d'une fièvre et qu'tu fut cherchi l'docteu avec le quêrre sans man dithe un mot. Eh ben, tchèsqu'y fit? Y ramontit à haut, y me r'gardit, y m'dit tchi faisait biau temps, mais qu'un mio d'pis ne f'thait pas d'ma: y m'dit tch'y n'fallait pas bèthe de litcheu, et mé tch'ai tréjous tait d'la tempêthance et tch'y m'envièthai une bouteille.
“Sa fichue bouteille, j'la fliantchit à travers la f'nêtre, et quand y r'vint j'l'y dit en pliat Jèrriais tchèsque j'en criyais d'chutte salopthie-là. Y s'en fut tout mârri, mais tchinze jours après y nos vint un compte pour trais djinées, et j'eûmes à l'péyi.”
“Vèthe,” j'l'y dit, “car quand vint en temps y m'nichit d'nos envié bille.”
“Et tchèsque il avait fait pour ses sous?” ou s'fit. “Absolûment rain du tout. Ch'n'est pas êtonnant que l'docteu d'agniet veint dans un biau môteur, des gants à la main, une bianche djêne et un neu fa d'habits. J'voudrais savé mé ouêsque y ramâssent touos chais coupons-là, et mé tch'y n'en ai pas assez pour accaté une qu'minsole, sans pâslé d'autre chose. J'trouve chonna ben drôle.”
“Ah,” j'l'y dit, “quand un docteu va vais tchique vieille fille tch'y crai qu'oulle est malade, y'a moyen d'faithe un arrangement. Et après tout, y faut qu'un docteu s'sait ben habillyi, autrement l'monde n'éthaient pas d'confiance en l'y.”
“Ben habillyis ou pas,” dit Merrienne, “je n'veur pas les vais et si tu tais bête assez d'en am'né yun ichin, ous' éthiez bétôt touos les deux tchiquechose tchi n'vos pliaithait pon. Allons, d'valle et fait mé une tâsse de tais.
Ph'lip
1948
Viyiz étout: