J'n'aime pon les roses, mé. J'aime bein les pliantes et les gardîns, mais j'n'aime pon les roses. À m'n avis, lé rosyi est ieune des pliantes les pus laies et ch'est pitchi d'lî allouer du run dans l'gardîn. Ch'est qué, sans flieurs, la pliante n'a pon d'întéthêt - oulle a seulement des tigues, des pitchets et des fielles tchi n'sont pon bein belles.
Les flieurs même, j'l'admets, sont pus ou mains întérêssantes, mais chenna n'vaut pon la peine d'aver les rosièrs siez sé. En rond, j'préféthe les cactus; au mains, si ches-chîn ont des pitchets, né v'là lus bieauté et întéthêt - et chenna toute l'année sans tout l'train d'les arroûser.
J'aime mus les pliantes tch'ont des belles fielles, tch'offrent d'la vèrduthe dans l'gardîn - ou tchi sont utiles. L's hèrbes qué nou peut faithe sèrvi dans la tchuîsinne, coumme lé romathîn ou la menthe, sont un ornément étout dans l'gardîn.
Et y'a étout l's hèrbes médicinnales tchi nos offrent des èrmièdes pouor nos maux. Jé souffre, mé, des bonds d'tête et l'maître est eune pliante tchi peut souôlagi chu ma-là - et ch'est bein connu qué ch'fut dans les potithons qu'nou dêcouvrit la digitalinne - eune méd'cinne pouor les maux du tchoeu.
En nos prom'nant par les c'mîns, y'a d'belle pliantes utiles par les banques et les fôssés. Par exempl'ye, les fielles dé l'ambrais sont bein améthes, mais si nou-s'en mâche ieune, chenna ravigote un mio - l'êffet est d'même si nou-s'ajouôte eune fielle d'ambrais à eune tâssée d'thée. Nou dit qu'lé thée d'ambrais est bouôn pouor la toux. Et il est întérêssant d'èrmèrtchi qué, temps pâssé, nou soulait faithe sèrvi l'ambrais dans la brach'chie en Jèrri à la pliaiche du houbillon.
Et même si jé n'sis pus dans ma preunmié jannèche, j'ai acouo du fanne en m'prom'nant auve un anmîn par les c'mîns quand j'pâssons du fliancouais. Jé n'peux pon résister à la tentâtion d'en pitchi des p'tits buts d'chutte pliante cliuteuse sus ses habits. Tchi fanne d'li couvri l'dos d'vèrduthe sans qu'il lé r'mèrque!
Véthe-dgia, y'a un tas d'pliantes tchi sont pus întérêssantes qu'les roses!
Viyiz étout: