Les Pages Jèrriaises

Av'-ous d's ahans?

Le Ménage ès Feuvres,
St.Ouën.
Lé 25 d'août, 1979.

Moussieu l'Rédacteu,

Quand nou d'veint vièrs nou n'a qu'ahans!" m'disait un vièr anmîn l'aut' sanm'di dans L'Vièr Marchi en ville.

"Bon!", j'lî dis, "en as-tu, d's ahans? J'n'en ai pon, mé, et j'sis pus vyi qu'té."

"Eh bein," i' m'dit, "tu'as tréjous 'té chanceux, té. J'en ai iun dans l'côté. Ma bouannefemme voulait m'faithe aller vaie l'docteu, mais jé n'y'ai pon 'té. J'l'ai faite mé frotter atout d'l'ieau d'vie camphrée. Ch'est un r'miède tch'est bouan pour frotter sus l'front pour lé ma la tête, ou sus l'estonma pour du fraid, ch'est en tchi i' dait êt' bouan pour un ahan dans l'côté étout, et v'là tch'est miyeu marchi qué la méd'cinne ou les boulets des docteurs."

"I' faut qu'j'avoue qué j'ai pus d'fouai dans un bouan docteu qué dans les r'mièdes dé vielles femmes du temps pâssé," j'lî dis.

"Eh bein," i' m'dit, "châtchun embraiche sa femme à sa manniéthe, comme nouos l'dit l'vièr diton. Et ch'n'est pon qu'j'en ai contre les docteurs, mais j'n'aime danme pon aller les vaie, ches âmices-là. J'allis en vaie iun quand j'avais un frouët où'est qu'nou s'assied. En entrant dans s'n office en ville, eune hardelle habilyie en braies comme un homme mé r'gardit d'un yi d'travèrs et m'dit: 'Av'-ous un appointement?' 'Nannîn' j'lî dis, 'ch'est un frouët, qu'j'ai!' 'Ioù?' ou m'dit. N'en v'là ieune tch'est affrontée, j'pensis, mais j'lî dis: 'S'ou-s-en aviez iun où'est qu'j'en ai iun, ou n'pouôrriez pon vouos assiéthe sus un choutchet sans heurler!' 'Oh!' ou s'fit. 'Eh bein, s'ou voulez attendre assez longtemps, l'docteu vouos verra quand il étha veu touos les malades tch'ont d's appointements et tchi sont à attendre pour lus tou dans l'parleux à côté, et j'peux vouos donner un couossi pour vouos assiéthe dessus'.

"J'attendis quâsi toute l'arlévée, et quand l'docteu vit man frouët i' dêhalit sa brioche et m'dit tch'il 'tait grand temps dé l'lancer, et i' c'menchit à l'adguchi, sa brioche. J'avais mes braies bas, sans doute, mais i' n'mé prîns pon longtemps à les ramonter et boutonner mes guélesses. J'n'allais danme pon l'laîssi m'gobillonner d'mème atout sa brioche, et mé v'la hors. Mais en sortant né v'la-t-i' pon la hardelle tchi m'dit: 'Ch'est quat' louis et d'mi, s'i' vouos pliaît. Faut-i' vouos env'yer l'compte ou aim'-ous mus payi à ch't heu?' 'Env'yiz-mé l'compte,' j'lî dis, car dé n'voulais pon rester là eune minnute dé pus.

Quand j'èrvîns siez nous ma bouannefemme fit un poussot d'pain et d'molle graisse et poussotit man frouët et m'bandagit bein pour garder l'poussot en pliaiche, et il 'tait dêjà mus l'lendemain au matîn. Et j'n'ai pon r'chu d'compte."

"Nou n'peut quand mème pon dithe tch'i' n'sont pon capabl'yes, les docteurs d'à ch't heu. Quand ch'est eune affaithe dé vouos coper un bras ou eune gambe, ou r'graie eune rompeuse, les r'mièdes des anciens n'valent pon grand' chose," j'lî dis.

"P't-êt' bein," i' m'dit, "mais jé n'peux sénon penser ès bouans vièrs temps quand l'Docteu Beinn'clift allait dans l'parleux à La Rosiéthe, près d'La Grande Eglyise, et pus tard ès Six Boules, ieune ou deux arlévées la s'maine - où'est qu'nou pouvait l'consulter - à la pliaiche d'aver à aller en ville et sans aver à faithe d'appointements auve eune hardelle en braies. Et i' connâissait l'êtat d'santé dé touos les St. Ouënnais. I' vouos tâtait l'pouls et vouos faîsait dêhaler la langue, et pis i' vouos donnait eune boutelle dé méd'cinne tch'avait bouan goût et qu'nou-s'aimait si bein avaler qu'ou vouos faîsait du bein.

"A ch't heu i' faut des rayons X et Bouan Dgieu sait tchi sorte d'aut' mâchinn'nie pour li'aidgi à d'vinner tch'est qu'ou-s-avez dans l'corps, et i' vouos fait payi quat' ou chîn louis et vouos dit d'èrvénîn dans quat' ou chîn jours pour tch'i' piêsse vaie s'il a bein d'vinné tchi sorte d'boulet tch'i' fallait pour vouos r'faithe - et vouos r'faithe payi un aut' quat' ou chîn louis. Nou n'peut pus affaûrder à êt' malade!"

George d'La Forge

 

Viyiz étout:

 

Les Pages Jèrriaises