L's ortchies sont des pliantes tchi piquent, et y'en a tchi considéthent qu'i' sont des sèrcl'yes. Mais l's ortchies sont bein utiles. Temps pâssé nou soulait baithe du thée d'ortchies pouor la santé. Pouor l'ma dans l'dos, nou soulait donner eune ronde atout d's ortchies.

d's ortchies

Nou peut faithe eune soupe d'ortchies étout au R'nouvé, et ch'est bouôn pouor l'sang.

Nou disait qu'i' y'a un mais d'l'année quand l's ortchies n'piquent pon, mais qué ch'n'est pon chu mais.

L's ortchies sont bouonnes pouor les cheins tchi veulent attither les papillotes dans lus gardîns - ch'est un bouôn fricot pouor les carpéleûses. Faut don laîssi eune carre dans l'gardîn ès ortchies.

Tchi sortes d'ortchies qu'j'avons? Eh bein, j'avons l's ortchies (Urtica dioica), l's ortchies grégeaises (Urtica urens), et la blianche ortchie (Lamium album).

Pouor dgéthi les pitcheûses d'ortchies, i' faut prendre eune fielle dé doque et douoilli la pitcheûse auve du jus d'la fielle.