San Antonio, Texas,
U.S.A.
Lé 26 d'févri, 1972
Moussieu l'Rédacteu,
Ou-s'avez veu, sans doute, lé r'cit dans les gâzettes des escarmouches entre la police ichîn en Améthique et l's êtudiants dans nouos univèrsités, et les bandes dé jannes gens tchi r'fûsent dé travailli et d'vivre comme d'aut' monde et tchi s'habillent drôlement et joingnent les procêssions des démonstrateurs tchi sont contre tout. Jé l's appellons des "hippies". Iun d'lus favoris noms pour un agent d'police est "quétot", et lus dgèrre est contre l' "Êtablyissement", voulant dithe lé gouvernément comme il est constitué, et la mode dé vie des pathents tch'ont travailli dû pour lus donner eune êducation tout long du c'mîn d'l'êcole êlémentaithe jusqu'à l'univèrsité. Et i' prétendent qué l'Améthque est malade.
L'aut' jour j'liésais eune articl'ye au sujet dans ieune dé nos gâzettes. L'auteur c'menchit par dithe tch'il 'tait malade étout. Malade dé ouï la police appelée des quétots quandi qu'les malfaiteurs tchi les tuent a coups d'pistolet sont admithérs par les bandes comme étant des héros. Malade dé ouï dithe qué l's agents d'police sont des fos tchi n'dév'thaient pon aver l'drouait d'porter l'pistolet, mais qu'les crînminnels tch'en font sèrvi pour voler et bliesser les gens, et les tuer, dév'thaient êt' traités comme ayant l'chèrvé et l'esprit malade et êt' rêtablyis par les docteurs pour èrcirtchuler parmi l'monde.
J'sis malade, i' disait, dé bastaudes, procêssions, démonstrations contre tout, des gens tchi dév'thaient saver mus et tchi joingnent les minnorités tchi vont par les c'mîns faithe tout chu train-là. Et j'sis malade d'êcouter l's întellectuels tchi s'prêtent à tout chu niolîn-là et tchi souotcheinnent la révolte des êtudiants.
Et j'sis malade des décisions d'la Cour Suprême tchi font l'travas d'la police difficile en donnant toutes sortes d'privilèges ès malfaiteurs quand i' sont arrêtés dans l'délit. J'sis malade dé vaie qu'la pornographie est pèrmînse d'êt' en veue dans toutes les boutiques tchi vendent des livres, et j'sis malade dé vaie l'emblième qué j'nouos fions dans l'Bouan Dgieu sus touos nouos sou, mais qué jé n'pouvons pon laîssi nouos mousses dithe des priéthes dans l's êcoles.
J'sis malade dé ouï dithe tch'i' n'y a pon d'Bouan Dgieu, et qu'la réligion est pour les vièrs. Et j'sis malade dé vaie les jannes êbédés par les drogues et qué quand mème, un tas d'gens, mème des gens dé louai, veulent légaliser la feunm'thie d'cannabis. Et j'sis malade dé vaie tant d'jannes hommes lus en aller vivre dans d'aut' pays viyant tch'il' ont peux d'êt' soudards. J'sis malade dé vaie l'publyi à la dupe à cause des travailleurs en grève quand i' pouorraient arriver au mème rêsultat arbitralement.
Et j'sis malade dé vaie les femmes en braies et l's hommes auve des longs g'veux, car i' faut des longues-veues pour èrconnaître l's uns d'auve les autres.
J'sis malade dé vaie les malpropres, les badlagoules, l's ivrouangnes et les pièrcheurs. Et j'sis malade dé ouï qu'l'Améthique est malade quand oulle est la nâtion la pus forte au monde et qu'ou s'est lyi-mème mînse à court dé sou pour èrmett' ses ennemîns sus pid, et aîdgi les jannes nâtions à s'mett' sus les leurs. Ch'est seux qu'la maîntchi du monde sus la tèrre es'saient contents d'pouver y d'meuther.
Véthe, j'sis malade, mais j'peux m'èrfaithe et j'peux aîdgi à man pays à s'èrfaithe étout. Ou n'mé trouvethez pon à pitchi des pièrres et des boutelles sus la police, ni des bombes dans les boutiques et les maîsons, et ou n'mé vèrrez pon à porter des pliacards dênonçant chenn'chîn et chenn'na, ni dans des procêssions et démonstrations dans les rues, ni à faithe des discours contre l'Êtablyissement à eune foule dé gens dans l'mitan d'l'arlévée tchi dév'thaient êt' en travas pour gangni man pain et souangni d'ma femme et m's êfants, payi mes dettes et l's împots et, s'i' y'a mouoyen, aidgi à la municipalité d'ma ville à faithe lé mus qu'ou peut pour lé bein-être dé tout l'monde!
Ch'tait sèrtainment un vièr consèrvateur comme mé tch'êcrivit ches lîngnes-là, et j'tais content d'vaie qué jé n'sis pon l'seul tch'est malade dé vaie tout chu tîntamarre-là dans un pays si prospéthe comme ch'tî-chîn. Tout chu monde-là tchi sont contre tout n'avanchent autcheunes idées pour l'amender ou l'changi, sénon qué dans l's univèrsités i' voudraient arrangi les leçons ieux-mêmes à la pliaiche d'aver à suivre les cours académiques êtablyis. Il' arrivethaient à un triste dégré académique si l's autorités univèrsitaithes pèrmettaient d'ité!
Enfîn, j'crai qué l's affaithes c'menchent à amender, et nou-s-espéthe qué tout chu boulevèrsement s'en va s'pâsser - comme tout s'pâsse auve lé pâssage du temps.
George d'La Forge
Viyiz étout: