Les 80 membres qui vîntent à la rêunion à St. Ouën, vendrédi, l'26 d'mai, dévthaient vivre vièrs, ch'est à dithe si i' prîntent avis ès bouans r'mièdes qui lus fûtent donnés là, car i'y en avait dé bein sîmplyes, et d'autres p't'être un mio pus complyitchis, mais tous dé souverains ermièdes. Ch'est ermèrquablye dé penser qu'nos anchêtres lus en faithaient servi et vivaient vièrs, et souvent bein sains jusqu'à lus vieillèche.
Les pliantes
Bein des r'chettes 'taient faites avec des pliantes bein connues dans la campagne, comme d'la lianne, d'l'orvale, du seu, du louothi, d'la console, du g'nêt, d'l'êpinne-vinnette, des rachinnes dé dogues, etc.
Les maux
Les maux qui pouvaient être dgéthis - l's ouothipieaux, ma à la gorge, des rhonmatisses, du fraid, d's êteurses, la digestion, purifier l'sang, des r'fraideuses - en êffet, presque touos les maux!
Ches pliantes, et d'autres, des tisaines, du sitho, et d'l'onguent qu'avaient 'té faits 'taient là en veue pour tous, et lé p'tit souos-conmité en chèrge dé la séthée - les Dlles. F. Hacquoil et K. Le Boutillier, Mesdanmes P. Green et K. Le Maistre, et l'Sieur F. Le Maistre - méthitaient bein les r'merciêments qué l'Président lus offri d'la part des membres à la fîn. Chu p'tit souos-conmité est bein ermerciant à Moussieu P. Ahier pour l'înformation qu'i' lus avait env'yé.
L's affaithes
Ches r'mièdes întérêssîtent les membres auprès l's affaithes pour la séthée, qui cont'naient lé rapport dé la dreine rêunion, qui fut liu et accepté, et l'êlection d'quatre nouvieaux membres. Au c'mench'ment d'la séthée, l'Député Quérée fit la beinv'nue au Sieur G. Le Feuvre, ervénu d'Améthique acouo eune fais, et à Mme. Le Sueur, ervénue d'eune longue vacance. Ches deux membres rêponnîtent tchiques patholes.
Annonces
Lé President annoncit l'service annuel pour dînmanche, lé 25 dé juîn, à l'Eglyise dé St. Brélade, à trais heuthes l'arlévée, quand l'Rév. W.G. Tabb conditha l'service en Français et l'Sieur H. Le Gresley f'tha l'sermon en Jèrriais. Les pratiques pour lé tchoeur étant l'16 et l'23 à 8.30 lé sé, les membres qu'y prîntent part l'année passée sont învités d'y prendre part acouo ch't année.
L'excursion, qu'est lîmité à 67 membres seul'ment, s'sa à Southampton par avion et l's alentours, vendrédi, l'prunmyi d'septembre. Les membres qu'ont idée d'y aller sont avisés d'donner lus noms au Sieur Richard au pus vite.
Les membres du Conmité Social servîtent des raffraichiss'ments à la fîn d'la séthée, et l'Président les r'mercyit pour lus embarras, et en même temps armercyit l'Connêtablye Pirouët pour l'usage dé la salle.
1967
Viyiz étout: