La pouorre Statue dans l'Vier Marchi,
Sale, laie, jaunâtre, couleur d'mortchi
Ah! dites mé donc, tchêqu'oull'a fait
Qu'jamais personne n'en a pitchait.

'L'faudrait bain mus s'en dêbâté,
Qu'd'la laissi là dans san pité;
La vendre à tchique bouan campagnard
Qui la pïyan'tait dans san hautgard.

Car, bain pitchie sus l'haut d'un tâs,
Ou f'zhait un fameux épeurhâs;
'L'n'y'a pas moësson qu'éthait quothage
D'allé jamais l'y faithe ombrage.

La vendre! Ma fé. Et bain tant mus,
Tandi qu'n'ou peut post bills dessus;
Pour ch'la ou sert principal'ment
Mé dit tchitchuns à chu moment.

S'ou sert. Allons; faut la laissi,
Mais pourtchi pon la rabiyi;
Oulle est camprie! - J'cré qu'il est temps
D'en faithe. Tchêqu'ou zen dites bouannes gens?

Une quoche d'bïan pïon l'y f'thait grand bain
I'm sembïe cou l'éthait l'air pus sain:
Ou même n'ou pouorrait la bïanchi
La caux est à si bouan marchi!!

Jersey Cabbage Stalk
Chu 8ème Mai 1869

"Upon thy back hangs ragged misery,
The world is not thy friend".

La pouôrre statue dans l'Vièrr Marchi,
Sale, laie, jaunâtre, couleu d'mortchi;
Ah! Dites-mé don tchêqu' oulle a fait,
Qu' jamais pèrrsonne n'en n'a d`pitchié.

Faudrait bein mus s'en dêbâter,
Qu' la laîssi là dans san pité,
La vendre à tchique bouan campagnard
Qui la pliant'tait dans san haûgard.

Car, bein pitchie sus l`haut d'un tas,
Ou f'thait un fameux êpeûthas;
I' n'y'a pas moueisson qu'éthait l'couothage
D'aller jamais lî faithe ombrage.

La vendre! Ma fé, eh bein, tant mus;
Tandi qu' nou peut affichi d'ssus,
Pour ch'la ou sèrrt, principalement,
Mé dit tchiqu's'uns à chu moment.

S'ou sèrrt, allons, faut la laîssi;
Mais pourtchi pon la rabilli?
Oulle est camprie; j'crai qu'il est temps
D'en faithe - Tchêqu' ou's'en dites, bouannes gens?

Couoche dé blianc pliomb lî f'thait grand bein,
I' m'semblle qu'oulle éthait l'air pus sain,
Ou même nou pouôrrait la blianchi -
La caux est à si bouan marchi!

"Ch'la S'peut"
Mai 1869