Èrvenus à Gore, auprès aver 'té à l'églyise lé dînmanche matîn, j'nouos en feunmes à Queenstown, au bord du Lac Wakatipu, où-est qué l'Sieur John Thomas Bliampied a eune caumine pour y passer ses vacanches. Lé Sieur Humphries et sa bouannefemme nouos laîssîdrent-là, dans les bouannes mains du Sieur Bliampied et d'sa charmante femme, née Mary English, dé fanmile Angliaîche. J'passînmes la niet siez ieux. Il' ont lus d'meuthe à Invercargill, où-est qu'lé Sieur Bliampied garde boutique. I' vend des meubl'yes et fournituthes dé maison. I' nouos dit qu'la main d'oeuvre là-bas est êcarte, et qu'les gages sont si hauts et l's împôts si êl'vés, qu'un commèrcant a d'la peine à faithe du profit. I' paie vîngt louis la s'maine à ses emplyiyés et a d'la peine à en trouver d'bouans, même à ches gages-là. La Nouvelle Zélande, comme bein d'aut' pays d'nouos jours, est dév'nue eune “Welfare State”.

Lé lendemain, j'tions en c'mîn d'èrtou à Christchurch et Nelson, et d'Nelson j'allînmes par avion à Auckland. La fanmile Bliampied nouos avait 'té si bouanne qué jé n'pourrons janmais l'oublyiyer. Ch'tait d'la vraie hospitalité Jèrriaise. La grand'mèthe du Va (née Bliampied) à Douard Le Feuvre 'tait la soeu au grand-péthe Bliampied tchi s'êtabl'yit à Mataura, et oulle 'tait aimabl'ye et hospitalièthe étout. V'la tchi couothe appathemment dans la fanmile!

D'èrtou à Auckland, mé r'véla houors siez m'n anmîn Ernest Mouothant, et i' dêhalit san moto pour m'enm'ner vaie acouo d'aut' Jèrriais, lé Sieur R. Gallichan et sa femme, née Buesnel. Missis Gallichan est la soeu à m'n anmîn Roland Buesné, du Champ Colin à St. Sauveux. Malheutheusement, j'n'eus pon la chance dé les vaie. L'adresse qué j'avais 'tait dans eune pétite ville tch'a nom Waiuku, à 25 milles d'Auckland, et ch'tait-là qué l'Sieur Mouothant m'enm'nit. Arrivés-là, j'trouvinmes qué l's anmîns Gallichan 'taient en fèrme à un aut' 20 ou 25 milles pus liain, et l'Sieur Mouothant n'avait pon l'temps dé m'porter jusqué-là car i' fallait tch'i' r'vînsse à Auckland dé bouanne heuthe pour d's affaithes. J'pâlis tout-d'mème à Missis Gallichan par téléphone et j'eus eune longue convèrsation auve lyi, la maintchi en Jèrriais et la maintchi en Angliais!

Lé lendemain, nout' drein jour à La Nouvelle Zélande, lé Sieur Rondé et sa femme vîndrent nouos qu'si à l'hôtel atout lus moto, et nouos enm'nîdrent diner siez ieux. L'arlévée i' nouos condîsîrent à l'aërodrome d'Auckland pour lé viage d'èrtou en Australie. I' restîdrent auve nous jusqu'au moment d'monter en avion. Dé les tchitter 'tait quâsi comme si nou-s avait laîssi un mio d'Jèrri drièthe-sé!

Èrvenus à Sydney en Australie, j'nouos en allînmes à Melbourne, 475 milles en avion. Ouaithe qué j'avions 'té là d'vant, j'n'avions pon ieu l'temps d'visiter la ville comme i' faut. Chutte fais, j'feunmes vaie tout ch'tch'i' y'avait à vaie. J'passînmes tchique temps dans la caumine à Cap'taine Cook, dans iun des bieaux pars dé la ville - un mio du vièr monde dans l'nouvé! Et j'passînmes eune bouanne séthée siez Moussieu et Madanme Porter. Madanme Porter est la soeu d'la danme à l'Avocat Perrier d'Jèrri.

Nouot' préchaine visite fut à la ville d'Adelaide, capitale dé l'Êtat dé l'Australie Méridionale. Oulle a eune population dé 480,000 habitants, et est à 400 milles dé Melbourne. Ch'est eune belle cité. Dans toutes ches grand' villes j'allînmes visiter les gardîns botaniques. Douard, tchi craie des flieurs dans ses sèrres en Jèrri, 'tait hardi întérêssi dans tout ch'qué nou viyait d'bouais d'arbustes et pliantes dé toutes les sortes, et y'en avait tout pliein à vaie!

À Adelaide, Douard allit vaie eune Jèrriaise dé fanmile originaithe dé St. Ouën, Missis R. P. Rundle, née Enid Chevalier. San grand-pèthe 'tait l'Sieur Frainque Sélous tchi gardait boutique à Millais quand j'tais mousse. Oulle est la nièche au Connêtabl'ye Ch'valyi d'St. Brélade. J'pense qué s'n homme fèrme pas bein liain d'Adelaide, et tch'il est à faithe bein.

D'Adelaide, j'nouos en feunmes par avion à Perth, capitale dé l'Australie Occidentale, eune ville dé 300,000 habitants tch'est à 1,750 milles par air d'Adelaide. I' nouos prîns siex heuthes à y'aller. Comme j'l'ai mentionné d'vant, l'Cap'taine Stirling navidgit la rivièthe Swan en 1827 et allit à tèrre à l'empliaichement où-est qu'Perth fut êtabl'yi deux ans pus tard. Lé temps est bé dans la contrée, et l'solé s'y montre duthant eune mouoyenne dé huit heuthes par jour à londgieu d'année.

À m'n idée, Perth est iune des pus belles villes d'Australie, et j'm'y pliu hardi. J'tais p't êt' d'autant pus disposé à l'aimer viyant qu'j'y rencontrînmes un bouan vièr Jèrriais tchi nouos fut charmant et hospitalyi - le Sieur Harold Hamon, couôsîn du Juge F. Ahier d'St. Martîn, et d'Missis Ellen Amy d'Broadlands à St. Ouën.