Nairobi, Kenya,
Afrique dé l'Est.
Lé 5 d'octobre, 1968.
Moussieu l'Rédacteu,
Ch'est quâsi încriyabl'ye, mais nou peut s'mett' à l'aîse dans un aut' monde d'un jour à l'autre! Y'a eune sémaine aniet j'tais en Jèrri, et mé v'la autant à m'n aîse dans la chaleu d'l'Afrique comme si j'y avais d'meuthé toute ma vie! Sans doute, j'sis en fanmile - et siez un Le Feuvre tch'a san nom sus l'mème arbre génélogique comme lé mein. Ch'est vrai tch'i' sont parfénés un mio partout l'monde, les Le Feuvre, mème les cheins tchi m'sont p'tits couôsins - ch'tî-chîn, lé Mâjeur Arthur Maitland Le Feuvre, dé l'Armée du Salut, en Afrique, san fréthe Fraînque en Australie, lé Seigneur dé Morville à La Nouvelle Zélande, et mé en Améthique et iun d'mes fréthes au Cannada!
Lé viage dé Londres ichîn par avion à rêaction s'fait vite. J'tchittis Londres à huit heuthes mardi au sé dans l'avion du East African Airways. À onze heuthes un quart j'tais à tèrre à Rome en Italie, et j'en r'sortînmes à minniet. À dgiex minnutes dé deux j'tions à Athènes, en Grèce, et j'èrsortînmes dé là à deux heuthes et d'mie, et j'arrivînmes à neuv' heuthes vîngt à Nairobi dans l'pays d'Kenya, et j'eus l'pliaîsi d'vaie la fache souôriante du Mâjeur Arthur L'Feuvre à m'attendre à l'aérodrôme!
Nou ouait tréjous dithe qué les Jèrriais lus dêhalent et font bein n'împorte dans tchi pays tch'i' s'trouvent, mais nou peut dithe en toute véthité qué l'Mâjeur né s'en vînt pon 'chîn pour faithe bein - mais pour faithe du bien! Il est voué à sa tâche comme officyi d'l'Armée du Salut, et comme ou' l'savez bein, L'Armée du Salut faut du bein - pas seulement en Afrique, mais partout l'monde!
En Afrique dé l'Est, ch't armée-là est bouanne à bein des choses pour bein du monde. Ichîn, aux alentours dé Nairobi, ou' condis eune êcole pour les êfants tchi sont aveugl'yes. Quand nou d'meuthe ichîn et qu'nou vait qu'ch'est les femmes tchi font l'pus du travas dans lus p'tites fèrmes tchi n'sont pon bein grandes mais tchi produîsent les ledgeunmes sus tchi tch'i' vivent prèsqu'entchièthement, et qué l's êfants aîguent aussi vite comme i' sont grands assez, nou peut comprendre qué l's aveugl'yes né valent rein à lus pathents. Dans eune êcole dé mème, i' sont souangnis comme des poulets, et il' apprannent à liéthe et êcrithe par lé système Braille, et eune vocâtion quand i' sont grands assez. Ou' pouvez don apprécier tchi bénédiction qu'l'êcole est pour ches pouorres mousses. J'les ouiyais chanter un cantique l'aut' sé. Ch'tait supèrbe à ouï. Lé chant 'tait parfait et mèrveilleux quand nou pense tch'i' faut apprandre air et chant par tchoeu quand nou n'peut pon vaie à lièthe! Mais ch'n'est qu'ieune des choses que L'Armée du Salut fait pour lé monde ichîn. Y'a des cliniques où'est qué l's anciens sont souangnis dans lus viellèches et quand i' n'peuvent pus travailli, et où'est qu'les malades sont souangnis et r'dgéthis.
N'împorte ioù tch'i' s'trouve d'la mînséthe, ch'est seux qu'l'armée es'sa là à soulagi les mînséthabl'yes. Mais oulle êprouve à amender l'sort des gens tchi sont en bouanne santé étout. Lé Mâjeur Arthur L'Feuvre est à travailli d'longues heuthes à montrer ès Afritchains 'chîn l'tou comment fèrmer et faithe valer la tèrre à seule fîn tch'i' piêssent craître d'milyeu récoltes et lus nouôrri mus tch'i' n'lé font à ch't heu. I' pathaît qu'dans l'couothant des quat' dreines années, trais mille Afritchains tchi vivent sus des p'tits enclios d'tèrre ont r'chu d'l'înstruction d'expèrts Salutistes en agritchultuthe.
Ouaithe qué l'Kenya a fait des progress en îndustrie, et qué l'pays a profité un tas du tourisme, il est quand-mème à fond un pays d'fèrmièrs. À peine dgix pour chent d'sa population d'neuf millions d'meuthent dans les villes. Lé reste d'meuthent sus des p'tites fèrmes - châque fèrme étant généralement faite valer par des membres d'la mème fanmile. Lé gouvèrnément a êtablyi d's êcoles d'agritchultuthe ichîn et là, mais i' n'y en a pon 'couo assez, et y'a siex ans L'Armée du Salut acatit 957 acres dé tèrre à eune quarantaine dé milles dé Nairobi, et auve chînquante mille louis donnés par lé British Church Group, Christian Aid, oulle a êtablyi eune fèrme tch'est dév'nue eune êcole fanmeuse pour apprandre ès Afritchains à labouother la tèrre.
Lé Mâjeur est en chèrge d'la fèrme, et l'janne Cap'taine Paul Latham, dé L'Armée du Salut, tch'a un diplôme dé Bachelier ès Scienches en Agritchultuthe du College dé Londres, donne l'înstruction en théorie à l'êcole tch'est sus la fèrme. À bein près souoxante vrégies sont expérimentales comme à la fèrme d's Êtats en Jèrri. Deux chents vrégies sont en hèrbe, et ch'est tchiquechose dé vaie les nénante vaques tchi donnent v'nîn pour êt' traites deux fais par jour. I' sont attroupées ensembl'yes dans un enclios à attendre lus tou. Chîn' machinnes à traithe sont en allant sans arrêt, et châque vaque a un nom et ou's s'en veînt pour êt' traite quand san nom est crié. I' faut vaie ch'la pour lé craithe!
Viyiz étout: