Ouaithe qué Jèrri sait eune bein p'tite île, ch'est un monde entchi pouor bein des Jèrriais. L'Australie, par compathaîson, est la pus grande île du monde – ou un p'tit continnent. Tout l'monde né sont pon d'avis sus la tchestchion. Chein tch'est seux, ma fé, ch'est qu'i' y'a bitchément d'bêtes bizarres à ravaûder par les fonds pèrdus d'chu pays-là.
Les zoologistes nos explyiqu'thaient sans doute qu'l'île-continnent fut s'pathé d'l'Asie y'a si longtemps qu'toute eune aut' manniéthe dé bestchias avait êvolué là-bas. Ch'est en tchi y'a des mammiféthes ponn'rêsses, des platypus à becque dé cannard, et des marsupiaux auve des poutchettes pouor lus p'tchiots. Les kangarous saûticotent par-chîn et par-là l'travèrs du pays, et ch'est chance qu'il' avaient êvolué seul'ment là-bas, car si nos vacottes Jèrriaises avaient êvolué d'même à r'bondi coumme sus d'l'êlastique nou n'éthaient janmais mênagi d'les traithe dans les clios!
D'vant la Preunmié Dgèrre Mondiale, quand l'Prînce Blücher 'tait lé T'nant d'Hèrme, il avait întroduit des oualabies, des p'tits kangarous, dans l'île pouor dêcorer l'paysage. Nou dait s'poser qu'les prînces attendent d'tchi mus qu'les goubelîns d'gardîn, ieux. Malheutheusement, les p'tits kangarous n'avaient pon survêtchu – l'prînce fut oblyigi d'tchitter l'île au c'menchement d'la dgèrre – mais autrément nou-s'éthait peu vaie lé dêv'loppement d'colonnies d'oualabies dans toutes les Îles d'la Manche. Les fèrmièrs éthaient gronné, viyant la pilvâqu'sie d'clios par des troupieaux d'marsupiaux, mais probabliément les touristes éthaient aimé l'opporteunité d'photos, et les mangeurs d'fricots, ieux, des steaks à la broche.
Et auprès tout, j'avons env'yé tant d'Jèrriais là-bas en Australie avaû l's années, ch'n'es'sait qu'du fèrre-pliaie d'èrchéver en r'tou tchiques émus r'mués, des cotonnées d'koalas et des oualabies à r'bînder coumme des balles. Ou j'sis-t-i' sîmpliément à niolinner?
Geraint Jennings
Viyiz étout: