Nairobi, Kenya,
Afrique dé l'Est.
Lé 2 d'novembre, 1968.
Moussieu d'Rédacteu,
Comme j'l'ai mentionné d'vant, nou trouve des Jèrriais partout l'monde, et j'veins d'en rencontrer acouo iun ichîn en Afrique - lé Sieur Edward Geoffrey Le Quesne, Maître ès Arts, fis du Sieur Herbert Henry L'Tchène, tch'a eune apotiqu'sie à St. Hélyi en Jèrri. Auve sa charmante danme, il 'taient à baithe du thée siez l'Majeur Arthur L'Feuvre l'aut' Dînmanche. Il est maître d'êcole à l'Êcole S'gondaithe dé Thika ichîn, au Kenya. À ma grand' surprînse, i' m'montrit un portrait d'li-mème prîns dans la cité d'Wyandotte, Michigan, en Améthique, auve man fréthe Fraînque et sa femme et san fis et sa belle soeu! Ch'tait quand il 'tait à faithe lé tou d'l'Améthique y'a tchiques années tch'il allit les vaie en passant.
La s'maine passée j'tais à Mombasa, lé pus grand port et havre sus la côte dé l'Afrique dé l'Est. La ville est sus eune île, et oulle est ieune des pus “cosmopolites” en Afrique, ch'est à dithe qu'oulle a un grand mêlange d'habitants. Y'a appréchant d'trente-deux mille Arabes dans l'Kenya, et la grand' partie d'ieux d'meuthent à Mombasa. Lus vaîsinné dans la ville, auve ses p'tites êtraites rues, èrsembl'ye hardi ès vielles parties pauvres dé Jérusalem, du Caire, d'Alexandrie et d'Aden. Étant Mahométans, il' ont d'belles mosquées. Les femmes sont habilyies en longues néthes robes dépis les pids jusqu'à la tête. Hardi d'ieux ont l'vouaile sus la fache, et nou lus vait seulement l's ièrs et les nueus-pids. Les cheinnes tchi peuvent y'affaurder mettent des sandales.
Quant à l'habilement des femmes en général lé tou d'Mombasa, nou peut dithe tch'i' y'en a pour touos les goûts et à toutes veues! L's extrèmes sont les robes mahométanes tchi couvrent toute la criatuthe sénon les pids et l's ièrs, et l'manque dé fort d'habits sus les femmes des tribus qu'nou vait l'long d'la côte en d'houors dé Mombasa. I' marchent draites comme des statues, sans habits en d'ssus d'la tâle, et un grand pannyi ou fardé sus l'haut d'la tête! Entre les deux extrèmes est l'supèrbe “sari” en souaie tchi couvre la femme Hîndou jusqu'ès pids.
L's Arabes avaient colonisé la côte du Kenya dans l'dgiêxième siécl'ye. I' rôdaient l'pays ès alentours pour attraper l's Afritchains tch'i' pouvaient mett' la main d'ssus, et les vendaient en escliavage. Pus tard, les Portûndgais y mîndrent pid à tèrre et y'avait souvent des bastaudes entre ieux et l's Arabes. I' faut craithe qué l's Arabes en gangnaient l'pus souvent, car en 1593 les Portûndgais bâtidrent un fort, tchi nommîdrent Lé Fort Jésus, pour lus aîdgi à les combattre. Comme touos les vièrs forts, i' n'vaut rein d'nouos jours comme fortérêsse, et un musée d'dans est eune attraction pour les touristes.
Les Hîndous sont bein èrprésentés dans la ville étout (la population Îndgeinne du pays est dans les chent quarante-quat' mille), et lus templ'yes, des merveil'yes d'architectuthe orientale, valent la peine dé vaie. Les Chrêtchiens sont par les c'mîns étout, sans doute, et les cathédrales Anglicane et Catholique Romaine sont dîngnes dé lus tchultes. Dans la cité, j'tais à d'meuther siez l'Mâjeur et Madanme Leonard Miller d'L'Armée du Salut. I' sont mutuellement enchèrgis du soin et d'la gérance d'un sanctuaithe pour les vieillards, eune aut' mangnifique oeuvre dé L'Armée du Salut, tchi s'otchupe acouo d'eune aut' oeuvre charitabl'ye à Mombasa - eune êcole pour les pouorres mousses tchi sont aveugl'yes!
Le Mâjeur Miller n'a pon ieu la chance dé visiter Jèrri, mais i' connaît l'Pasteur Richard Allen dé la Chapelle Wesleyenne dé St. Martîn, et m'a d'mandé d'aller lî dithe bonjour dé sa part et d'lî faithe ses complyîments quand j'îthai en Jèrri. Lé Mâjeur et sa danme sont d'Toronto, au Cannada, et j'espéthe les vaie-là pus tard quand lus touannée d'sèrvice en Afrique es'sa finnie.
Les trais chents milles dé c'mîn d'Nairobi à Mombasa valent la peine dé faithe en moto. Ch'est l'térritouaithe dé l'êléphant et ch'est rare dé faithe lé trajet sans en vaie à mangi d'l'hèrbe lé long d'la route. Nou vait des sîngnes ichîn et là pour avîser les motoristes d'êt' sus lus gardes à lus sujet, et nou prend la précaution d'cachi douochement quand nou passe à côté d'ieux en cas qu'moussieu l'êléphant s'met'trait dans la tête dé crouaîsi la route, mais en général nou peut dithe tch'i' n'pathaît pon întérêssi à faithe autcheune chose qué d'mangi! L'êléphant afritchain a d'divèrses grandes ouothelles, et i' pathaît tch'i' n'est pon aussi aîsi à apprivouaîsi commes ses couôsîns d'Birme et d'L'Înde.
Nou vait l'couochon sauvage (“warthog”) lé long d'la route étout. Un aut' annima qu'nou vait, assis trantchilment à r'garder les passants, est l'marmouset, prîncipalement d'la fanmile babouîn. I' m'întérêssent tréjous, ches drôles dé p'tits bouons-hommes-là! Châque fais qué j'les vai, jé c'menche à reunminner à man tout seu, et j'mé d'mande tch'est qu'j'ai connu tchi lus r'sembl'ye! La rêponse né m'veint janmais à l'idée, et pis quand j'entre siez-mè et qu'j'èrgarde dans l'mitheux, jé m'dis: “Sabre dé bouais, pistolet d'pannais! Est-che possibl'ye qu'ch'est mé-mème, tchi lus r'sembl'ye!” V'la chein qu'j'en ai, par aver êtudier l's êcrituthes à Moussieu Darwin!
George d'La Forge.
Viyiz étout: