Preunmié partie
Lé 28 d'août, 1971
Moussieu l'Rédacteu,
"Bon!", m'disent tout l'monde, "I' n'vouos ont pon gardé en Russie?". Nan dgia, i' n'm'ont pon gardé là! Y'a tout pliein d'Russes dans chu pays-là, et je n'sai pon pourtchi tch'i' voudraient garder un pouorre vièr Gris Ventre comme mé tch'i' n'connait qu'un mot d'lus langage (lé mot "Niet", tchi veurt dithe "Nannîn") dans lus bieau grand pays! Véthe, qué nou s'sait "pour" ou "contre" lé Communisme, nou n'peut pon dithe lé contraithe. La Russie est un bieau pays, et les quatre grand' villes qué j'allînmes vaies - Léninegrad, Moscou, Kiev, et Odessa - lé Député P.M. de Veulle, l'Académicien Fraînque Le Maistre, ma p'tite-fille Carole d'Améthique et mé, sont supèrbes à visiter.
La chose tchi m'frappe lé pus quand j'y pense est qué d'faithe un viage dans chu grand pays-là, patrie du Communisme, est la même chose comme dé faithe un viage dans l's aut' pays du monde. I' n'est pon bésoin d'êt' Communiste pour y'aller. I' n'vouos d'mandent pon d'dêcliaither vouot réligion en entrant, et qu'ou séyiz Bouddhiste, Communiste, Méthodiste ou Mahométan i' vouos font la même beinv'nue. L's officièrs d'immigration et d'la douanne sont sans doute là pour faithe lus d'vé, et ouaithe tch'i' vouos r'gardent d'un yi sévèthe et tch'i' lus asseûthent qué l'portrait dans vouot' passeport et dans l'visa d'entrée est bein vouot' réelle philomie, i' n'y a rein à craindre si tout est en ordre. I' faut singner eune dêcliathâtion montrant exactément combein d'sou qu'nou-s-a sus sé, en sterling ou autrément, et i' faut garder chu dotchûment-là souangneusement auve sé partout où'est qu'nou va, car et i' faut l'présenter à eune banque pour changi ses sou en roubl'yes et kopecks russes. Ch'est contre la louai d'êchangi des sou autrément qué par l'entrémînse d'eune banque. En r'sortant du pays i' faut produithe pathelle dêcliathâtion, car i' n'est pon pèrmîns d'en r'sorti atout pus d'sou qu'nou-s-avait en entrant, et i' n'est pon pèrmîns d'sorti atout des roubl'yes du pays en vouot' possession. Eh bein, quand nou connait ses vaissieaux nou n'les m'suthent pon, et i' n'y a rein à craindre quand nou-s-est en Russie ou dans autcheun aut' pays quand nou s'garde au lis d'la louai.
Ma p'tite-fille Carole a tréjous s'n appatheil photographique en main, et ou prannait des photos partout, même dans l'Kremlin, mais les bouannes précautions n'sont pon d'fendues, et oulle avait l'avis dé n'pon photographier rein par les f'nêtres d'avions, l's aéroports, ponts, havres, êtablyissements militaithes et dans l'Mausolée d'Lénine, sachant qué ch'tait d'fendu.
J'tchittînmes l'aérodrome dé Gatwick, en Angliétèrre, dans l'arlévée du preunmyi d'août à bord d'un avion à réaction Aeroflot Russe. I' sont à bein près comme l's avions Boeing 707 Améthitchains, mais y'a pus d'simplyicité et p't êt' un mio mains d'luxe en d'dans d'l'avion. I' vont aussi bein aussi vite qué nouos avions Angliais et Améthitchains. Lé mangi à bord est bouan et bein sèrvi par la janne fille Russe. Ou travâle pus dû qu'les nouotres, car oulle apporte lé r'pas à la main, iun à la fais, d'un but d'l'avion à l'autre. Sus les Boeing du B.O.A.C. et Pan American les sèrvantes ont un tchéthiot tchi porte un tas dé r'pas en même temps. Enfîn, i' faut dithe qué les Russes né pathaissent pon aver peux d'lus peine, et i' n'faut pon oublyiyer qu'les grèves des travailleurs né sont pon pèrmînses dans lus pays - eune chose admithabl'ye, à m'n idée!
Lé viage dé Gatwick à Léninegrad duthit trais heuthes et d'mie. J'tions un groupe d'à bein près eune quarantaine, et eune fais pâssés l'immigration et la douanne j'trouvînmes eune belle janne Angliaiche à nouos attendre. Oulle est diplômée d'l'Univèrsité d'Londres et ou pâle lé Russe couothamment. Ch'tait lyi tchi r'présentait l's agences dé viage Horizon d'Londres et Intourist Russe responsabl'yes pour nouot' visite, et oulle 'tait enchèrgie d'nouos condithe d'eune ville à l'autre et d'nouos havrer dans l's hôtels. Et ch'tait lui tchi faisait touos l's arrangements pour nouos extchursions en ville et campangne eune fais arrivés là. Jé n'sai pon tch'est qu'j'éthions fait sans lyi. Oulle 'tait bein au-faite à sa tâche, et pathaissait aver la rêponse à toutes nouos tchestchions continnuellement au but d'ses dés.
Pour châque extchursion - d'habitude en omnibus - j'avions des dgides, hommes ou femmes, mais l'pus souvent des femmes, dé la contrée où'est qu'nou s'trouvait. Généralement, i' pâlaient hardi bein l'Angliais, mais quand ch'tait des femmes lus vouaix n'portaient pon liain assez, et i' fallait êt' tout près d'ieux pour ouï comme i' faut. I' connaissaient lus sujet à fond. Et pis y'avait tellement d'groupes dé visiteurs dé difféthents pays tch'étaient souvent dans l'même bâtisse ou mûsée en même temps, tch'i' y'avait un tèrribl'ye catchet et y'avait d'la peine à s'entre ouï.
Nouot' groupe consistait pûtôt d'Angliais. Y'avait p't êt' eune dgiexaine d'Améthitchains en contant hommes et femmes et êfants, deux coupl'yes Cannadgiens, et deux jannes filles d'Australie. Ch'tait intérêssant d'ouï les drôles dé tchestchions qu'un coupl'ye d'Angliais démandaient ès dgides. Par exempl'ye: Eune Angliaiche démandit à iun des dgides tch'est qu'les Russes faisaient d'lus "drop-outs" et d'lus "hippies". Ou n'voulait pon l'craithe quand i' li rêponnit tch'i' n'y avait pon d'patheils individus en Russie. I' faut qu'tout l'monde travâle dans chu pays-là, et s'i' n'veulent pon travailli ou continnuer lus êtudes (tchi n'lus couôtent rein), i' sont env'yés ès travaux forchis en Sibérie!
(A siéthe)
Viyiz étout: