Traîsième partie
Aigre, en Charente,
Lé 11 septembre, 1971
France
Moussieu l'Rédacteu,
Ieune des raisons qu'les gens né pathaissent pon s'attendre dé ouï rein d'bouan entouorre la Russie est probabliément viyant qué l'gouvèrnément d'chu pays-là est athée. J'n'en disconveins pon qu'ch'est eune chose âffreuse à envithagi pour un Chrêtchien, et j'n'ai pon autcheune envie ni intention d'êprouver à justifier chu procédé-là. Mais j'ai 'té accouôteunmé à la s'pathâtion absolue d'l'Églyise et d'l'État en Améthique, et v'la tch'i' n'm'avait pon frappé tch'i' y'avait grand' difféthence entre la "doctrine" des deux pays, sénon qu'l'Améthique, ouaithe qu'oulle est neûtre au sujet d'l'importance d'eune églyise ou d'l'autre, et qu'ou n'lus aigue pon financiéthement, ou n'lus met pon d'bâtons dans les reues, quandi qu'en Russie la réligion 'tait considéthée endormi les gens et l's empêchi d'êprouver à lus dêhaler. Mais Moussieu Richardson, nouot' dévoué Minnistre à St. Ouën, m'donnit un coupl'ye d'fielletons l'aut' Dinmanche tch'ont des r'cits d'un tas d'pèrsétchutions d'cèrtains Chrêtchiens viyant tch'i' pèrsistent à pratitchi lus réligion à l'ouvèrt, et les peunnitions subis par ches Chrêtchiens-là pour être en délit d'la louai ont 'té tèrriblyiément sévéthes.
Jé n'peux pon dithe qué j'ai veu rein d'ité en viageant dans l'pays. Sans doute j'n'ai pon êprouvé à propagi la réligion là, ni à distribuer des fielletons réligieux. Jé n'sis pon doué d'chu couothage-là comme Chrêtchien, et d'pis qu'ch'est contre la louai du pays jé n'lé f'thais pon dans autcheun cas. Ayant 'té êl'vé dans eune office d'êcrivain en ville j'ai du respé pour la louai d'châque pays qué j'visite. En fait d'réligion, i' nouos fut dit par les dgides, et nou peut l'liéthe dans les fielletons d'viage qué l's agences vouos donnent, qué ouaithe qué l'Églyise est s'pathée d'l'État, les gens sont libres d'y aller, et l'adresse du Templ'ye Protestant des Baptistes Évangéliques à Moscou est donnée comme nunmétho 3 Rue Maly Vuzovsky Pereulok, et les sèrvices sont à siex heuthes au sé mardi, jeudi et sanm'di, et à dgiex heuthes au sé l'Dinmanche. L'adresse dé l'églyise Catholique Romaine St. Louis est donnée comme nunmétho 7 Rue Markhlevsky, et la Synagogue Juive est au nunmétho 8 Rue Astakhova, lé sèrvice étant à dgiex heuthes au matin et à eune heuthe dévant solé couochant.
À Odessa y'a sept églyises Orthodoxes ouvèrtes au publyi pour les sèrvices, jours dé s'maine comme au Dinmanche, et y'a eune églyise Catholique Romaine et eune églyise Baptiste tchi sont là pour les dévôts étout. I' pathait qu'ches églyises-là sont plieinnes touos les Dinmanches, mais i' faut avouer qu'ch'est l's anciens tchi les hantent et qu'les jannes né pathaissent pon intérêssis dans la réligion.
Les cathédrales Orthodoxes qué nou trouve dans les grandes villes du pays sont supèrbes à vaie atout lus "dômes" ou "coupoles" en forme d'ouognon, tchi r'lisent au solé atout lus couvèrtuthes dorées. Ouaithe tch'i'n'sont pon faites sèrvi pour lé tchulte, i' sont présèrvées et maintînses comme monûments historiques par l'État en parfait ordre, et lé d'dans est un mûsée d'objets d'art et d'ornéments ecclésiastiques.
L'Empire Russe c'menchit par l'assembliée d'eune collection d'principautés auve Moscou comme capitale. Ivan IV, lé Tèrribl'ye, fut l'preunmyi à adopter lé titre dé Tsar. Dé ses successeurs, Pièrre, lé Grand, tchi fondit Petersbourg, et Cathérine II, agrandîdrent l'empire par la contchête dé la Sibérie et aut' parties d'l'Asie.
La révolution d'1917, quand l'Armée et la Marinne èrfûsîdrent dé tither sus les travailleurs tchi sé r'binfraient contre lé Tsar, fut lé c'menchement d's'événements tchi finnîdrent par l'êtablyissement d'eune républyique socialiste, et l'fanmeux Vladimir Oulianof dit Lénine fut l'Preunmié Minnistre. Nou peut dithe tch'il est vénéré quâsi comme un Bouan Dgieu par les Russes d'à ch't heu. Lé drein Tsar, Nicholas II, sa Tsarina, san fis et ses quatre filles fûdrent exétchutés en juilet, 1918, eune tèrribl'ye affaithe tchi n'est pon mentionnée par les dgides tchi vouos montrent l'pays.
L'Union Soviétique dé nouos jours a fait un progrès presque incriyabl'ye dépis chu temps-là d'tragédie. en industrie, ou produit autant d'machinn'nie dans un jour comme la Russie des Tsars faisait dans un an, et ses résèrves dé minnéra, tchèrbon, bouais, etc., sont les pus grandes au monde.
En arrivant à Léninegrad j'feunmes havrés dans eune belle grande hôtel dé chu nom-là, située au bord de la riviéthe Néva. D'la f'nêtre dé ma chambre j'viyais l'navithe dé dgèrre Aurore tch'est ancré dans la riviéthe et maintînt comme monûment historique viyant qu'ses matelots joignîdrent les travaillers à l'occâsion d'la révolution d'1917. Ch'est un vièr "croiseur" à trais cheunm'nées, mais il est gardé comme neu. Eune sentinelle, un matelot armé, garde l'entrée d'la pâsserelle. Nou peut aller à bord et en prandre autant d'portraits comme nou veurt.
(À siéthe)
Viyiz étout: