Nairobi, Kenya,
Afrique de l'Est.
Lé 12 d'octobre, 1968.
Moussieu l'Rédacteu,
Ch'est vrai qu'nou trouve des Jèrriais partout l'monde! La s'maine passée j'eus l'pliaîsi d'aller à l'exhibition annuellé dé bestchias, d'êffets et d'machin'nie d'fèrme, etc. Lé Majeur Arthur L'Feuvre, étant en chèrge d'la fèrme dé L'Armée du Salut, est membre d'la sociêté tchi donne l'exhibition et comme visiteur d'houors-pays j'fus honoré et décoré auve eune însigne tchi m'pèrmettait d'jouï des mèmes privilèges commes les membres. Ch'tait bein întérêssant à vaie. L'exhibition fut ouvèrte par lé Président d'La République dé Libéria, en présence du Président Kenyatta d'chu pays 'chîn. Les vaques Jèrriaises et Dgèrnésiaises 'taient bein èrprésentées, et ch'tait un pliaîsi d'les ouï nommées quand i' gangnaient des prix.
Mais pour èrvénîn ès Jèrriais. J'rencontris un Moussieu Everard tch'était Cap'taine dans l'Armée Britannique dans san janne temps, et à ma grand' surprînse i' m'dît qu'sa danme 'tait eune Démouaiselle Lé Bro d'St. Ouën! “J'gag'geais,” j'lî dis, “Qu'oulle est d'la fanmile Lé Bro d'La Cache!” Et ch'tait vrai! San p'pèe 'tait l'Sieur Fraînque Lé Bro, d'La Cache, tch'était pour lé Southern Railway à St. Malo quand j'tais janne. J'mé r'souveins tout à fait bein d'li. Mais la chose la pus r'mèrquabl'ye est qu'Madanme Everard et l'Mâjeur Arthur L'Feuvre sont couôsîns, et les v'la touos les deux à d'meuther pas bein liain iun d'l'autre d'l'aut but du monde dé Jèrri et tch'i' n'lé savaient pon! V'la tchi m'ramémouaithe qué l'défunt Sieur Ph'lippe Lé Bro d'La Cache, l'oncl'ye à Madanme Everard, tch'était marchand d'bêtes, et l'défunt Juge Francis Vibert Lé Feuvre (lé p'pèe au Mâjeur Lé Feuvre), s'appelaient couôsîns quand j'tais janne et l'Ségrétaithe du Juge quand il 'tait Connêtabl'ye d'St. Pièrre. J'sommes pour aller baithe du thée siez l'Cap'taine et Madanme Everard la s'maine tchi veint, et ch'est seux qu'quâsi toute la convèrsation chutte sethée-là es'sa entouorre Jèrri!
Tant pus qué j'passe du temps ichîn, tant pus j'sis êrmèveilyi d'vaie l'activité sus la fèrme d'Armée du Salut, eune activité tch'est seurvilyie par lé Mâjeur a londgieu d'jour. J'vouos dîsais la s'maine pâssée tch'il avait deux chents vrégies d'tèrre en hèrbe pour ses vaques. Eh bein, j'éthais deu pûtôt dithe appréchant d'deux mille vrégies, car y'en a 800 acres! Ch'est en tèrme d'acres tch'i' donnent la m'suthe des êtendues d'tèrres ichîn, et sus tchînze acres d'la fèrme i' craîssent des bouais tchi produisent du café d'preunmié qualité. I' craîssent un manniéthe dé maïs ou grain d'Espangne tch'est appelé sorghum, et tch'est fanmeux pour lé bestchias, sus 55 acres, et d'l'hèrbe appelée Napier grass sus 30 acres, et des tournésols sus 15 acres. Chutte flieur-là donne du protein supplémentaithe pour lé mangi des vaques tchi donnent.
Dans l'êcole d'agritchultuthe sus la fèrme i' donnent des leçons et montrent comment labouother la tèrre et craître des récoltes à 36 fèrmièrs en mème temps et tchi veinnent des vaîsinnages ès alentours. I' paient tchînze chélîns la s'maine et sont couochis, nouôrris et înstruits pour chu prix-là. Les leçons duthent d'eune sémaine à tchînze jours. Il en couôte bein pus qu'tchinze chélîns la s'maine à L'Armée du Salut pour châque êtudiant, mais oulle est accouôteunmée à donner pûtôt qu'à r'chéver, et ou' don'nait bein ches leçons-là pour rein ès fèrmièrs êtudiants mais i' prannent bein pus d'întéthèt et apprannent bein mus viyant tch'il' ont à payi pour! Comme nouos l'dit l'vièr diton Jèrriais, “Chein tchi veint d'fliot s'en r'va d'mathée”, et s'i' n'avaient pon à payi i' veindraient seulement pour êt' nouôrris et couochis pour rein! I' faut comprendre qué ch'est un monde tch'est acouo primitif.
La campangne èrsembl'ye hardi ès campangnes d'aut' pays d'l'Afrique et d'l'Orient et du Mouoyen-Orient. L's Afritchains campangnards sont généralement pauvres et vivent sus l'produit d'lus mios d'tèrre. Les femmes portent lus êfant sus les dos dans des mannièthes dé châles amathés sus l's êpaules, mème en travaillant la tèrre et en marchant dans les routes, et il' ont d'grand' fanmiles. Quand les filles veinnent à aver sept ou huit ans, i' c'menchent à porter les pus p'tits sus lus dos étout, et v'la tchi soulage lé fardé d'la méthe. I' sont touos nueus-pids. Dans lus p'tites rondes bijuques i' n'y a en général qu'un p'tit liet, et l'homme couoche dédans et les femmes et mousses dans l'aithe! Les gens d'par ichîn sont d'la tribu Kikuyu. Y'a tant à faithe pour amender lus sort qué nou n'peut sénon admither L'Armée du Salut, tch'est sus les lieux et tchi n'a autcheune aut' ambition qué d'lus faithe du bein.
Dans les villes, quâsi toutes les boutiques sont faites valer par des Hîndous et des commèrçants du Pakistan. Lé gouvèrnément actuel du Kenya n'aime pon vaie tout chu commèrce-là dans lus mains, et a c'menchi à lus r'fuser lé r'nouvellement d'lus licences. Ch'est ieune des raisons pour tchi qu'tant d'ieux, étant sujets Britanniques, lus en sont allés en Angliétèrre. I' sont bein au-faits dans l'conmèrce, ches gens-là, et il' ont dêjà mènagi à s'êtablyi en Jèrri étout!
Viyiz étout: