À Bangkok, tch'a un aeroport dé preunmié classe, j'montînmes à bord d'un avion a rêaction, un Boeing 707 du Qantas Empire Airways d'Australie, et dans un coupl'ye d'heuthes j'avions fait la travèrsée d'neu chent milles à Singapour. Là, j'nouos r'posînmes un coupl'ye d'jours. J'eunmes la chance, par l'entrémînse des connexions Méthodistes dé Douard, dé rester au Y.M.C.A., et pis j'nouos trouvînmes à bord d'un aut' avion à rêaction, chutte fais un Comet 4 du B.O.A.C., pour lé Ceylan. J'allînmes par Kuala Lumpur, et auve eune heuthe d'arrêt là, j'feunmes siex heuthes à faithe la travèrsée, à 30,000 pids en l'air!

Chutte fais, nouos viages en avion 'taient finnis, car lé chînq dé mar, 1964, nouos r'trouvit à bord du Canberra pour lé viage d'értou en mé. I' nouos attendait à Colombo. I' n'nouos prîns pon longtemps à r'trouver la mode dé vie à bord du navithe tchi nouos avait dêjà porté en Australie, mais j'trouvis chu viage ichîn pus pliaîsant viyant tch'i' n'y avait pon l'tîntamârre dé 450 mousses à couorre et grîmper partout, et heurler à tue-tête!

J'eunmes un bouan jour à Aden en passant, à faithe d's acats. Lé temps 'tait mangnifique, et comme j'avions dêjà visité la ville et l's envithons, jé n'fînmes qué d'boutitchi et visiter l'églyise.

Arrivés à Suez, j'tchittînmes lé Canberra pour aller par beusse au Caire, capitale dé l'Êgypte. J'restînmes deux nyits à l'hôtel Palace Cleopatra, et j'visitînmes autant du Caire comme il en est possibl'ye dans deux jours. À c'menchi, j'allînmes au musée où'est qu'les trésors trouvés dans l'sépulcre du Rouai Tut-ankh-Amen sont en vueue. Ch'tait ma deuxième visite au musée, mais ch'est si întérêssant qu'j'y r'îthais bein eune traîsième! Et pis j'allînmes vaie les belles mosquées Mahométanes et la vielle églyise Copte dé St. Sargius, la pus vielle églyise Chrêtchienne en Êgypte. Y'a eune légende qu'oulle 'tait un bâtisse fait sèrvi comme chapelle auprès qu'St. Mar prêchit à Alexandrie en l'année 61 A.D., et qu'l'églyise même fut bâtie dans l'chînquième siècl'ye. La crypte en d'ssous d'l'églyise est supposee êt' la pliaiche où-est qu'La Sainte Vièrge et s'en Êfant Jésus restîdrent quand Il' eudrent a lus sauver en Égypte.

Nouot' préchaine visite fut à eune vielle synagogue Juive. Lé Rabbîn nouos montrit l's objets réligieux d'lus tchulte, et l'dguide nouos fît un long discours pour nouos dithe qu'en Êgypte Mahométans, Chrêtchiens et Juis vivent en parfaite harmonie, et qué Nasser garantis la liberté à toutes réligions. Faut espéther qu'ch'est vrai!

La grand' occasion vînt à la fin: La visite à Gizeh pour vaie les Pyramides! Ch'est fascinnant d'les vaie, et d'vaie lé Sphinx! Dans la grand' pyramide j'ramontis la tonnelle tchi mène à la chambre sépulcrale du Pharaon Cheops. La chambre est carree, auve eune niche d'un côté où-est qué l'sarcophage et la monmie du Pharaön soulaient être. Oulle est située dans l'mitan et gentiment haut en d'dans d'la pyramide, et i' faut y grapinner à quat' pattes, car la tonnelle tch'y mène est apique et trop bâsse pour eune pèrsonne à monter d'but, ou même baîssie! Y'a eune rampe en bouais, tch'est actuellement eune large plianche atout des lattes cliouées d'ssus par intêrvalles, comme les broques d'eune êtchelle, pour vouos aîdgi à ramonter à grapîns, et r'descendre d'même. Il y 'tait eune chaleu abominabl'ye. Un dguide va l'avant atout eune lantèrne êlectrique, et en fîn d'compte et à forche d'grapinner, nou s'trouve dans la carrée chambre sépulcrale. L'êffort en vaut bein la peine! Ch'est iun des grand' privileges qué nou peut aver dans la vie d'pouver visiter des monuments si historiques et întérêssants!

I' n'y a qu'l'empliaichement du sarcophage et d'la momie à ch't heu. Y'a longtemps tch'il' ont dispathu, même l's Êgyptcheins n'savent pon ioù. Les pyramides sont près du site dé l'ancienne ville dé Memphis, tout a fait dispathue à ch't heu, eune ville mentionnée dans quâsi touos les romans qu'nou liet, entouor la fanmeuse reine Cleopatre. I' fûdrent bâties par ordre des Pharaöns y'a 4,500 ans. I' pathaît tch'i' fallait 2,300,000 pierres carrées d'un paids d'eune mouoyenne dé deux tonnieaux et d'mi châque, pour bâti la grand' pyramide. La bâsse couvre à bein près eune trentaine de vrégies d'tèrre (actuellement du sablion là-bas!), et oulle avait eune hauteur dé 481 pids.

Lé Sphinx est tréjous la à r'garder l'désèrt dévant li. Driéthe li sont les trais pyramides qué l's anciens Grecques prononcîdrent ieune des sept mèrvelles du vièr monde! Ch'tait à r'gret qué j'les viyais dispathaître p'tit à p'tit dans la distance quand j'tions en c'mîn pour lé port d'Alexandrie, où-est qué l'Canberra nouos attendait auprès aver arrêté un d'mié jour à Port Saïd en passant.