Nairobi, Kenya,
Afrique de l'Est.
Lé 19 d'octobre, 1968.
Moussieu l'Rédacteu,
Dépis qu'les gens viagent souvent d'pays en pays, nou peut même dithe pus souvent qu'les St. Ouënnais allaient à Gouôrray ou qu'les Jèrriais allaient en Dgèrnésy quand j'tais mousse, nou n'sait janmais tch'est qu'nou s'en va rencontrer tchi connaît tchitchun qu'nou connaît étout. L'aut' jour j'allis vîsiter eune êcole tch'est maintînse par L'Armée du Salut pour souangni et înstruithe l's êfants du vaîsinné tchi sont afflyigis, et ieune des jannes filles tchi sé sont vouée à l'oeuvre du salut, et tchi travaillent-là, mé d'mandit si j'tais d'Jèrri. J'lî dis qu'oui, et j'li d'mandis comment qu'ou' l'avait d'vinné. "Par vouot' nom!" ou m'dit. En convèrsation, j'dêcouvris qu'oulle avait d'meuthé un êté au Mont Mado siez eune fanmile Angliaiche tch'a nom St. John, et qu'ou' connaît tout à fait bein mes bouans anmîns Stanley et Elsie Amy et qu'oulle allait souvent à lus boutique. Ou' m'dit tch'il' 'taient si charmants qu'oulle aimait bein à y'aller, et qu'ou' savait bein tch'il allaient la tchitter à Noué passé. Ch'est eune janne fille dé siex pids d'haut tch'a nom Beth et j'ôse craithe qué l's anmîns Amy s'èrsouveindront bein d'lyi quand i' liêsont chutte lettre ichîn! Ch'n'est-i' pon r'mèrquabl'ye que j'rencontris chutte janne fille-là en Afrique?
Ch'est un pays întérêssant, ch'tî-chin, et un bieau pays. en r'gardant par la f'nêtre siez l'Mâjeur Arthur L'Feuvre, où'est qué j'sis à vouos écrithe chennechîn, j'vai des belles flieurs dé toutes les sortes et d'toutes les couleurs. jé n'pouorrais pon c'menchi à vouos les nommer car jé n'm'y r'connais pon fort, entouôrre les flieurs, mais y'a un p'tit bouais, à bein près grand comme les palmes lé long d'La Route du Mathais à St. Ouën, tch'a nom "Hièr, aniet et à janmais!" Il est pliein d'belles petites blianches, bliues et pourpres flieurs tchi sentent à bouan - quâsi comme du jasmîn, mais pus fort.
Dans les rues d'la ville, ch'est întérêssant d'vaie l's Afritchains d'difféthentes tribus. Les femmes du Kikuyu mettent eune démié-douzaine dé melles grandes comme des brâcelets à pendre dé chaque ouothelle, et des robes dé toutes les couleurs tchi d'valent jusqu'ès pids. La robe "mini" n'est pon populaithe ichîn. L's hommes et les femmes dé la tribu Masai sont hauts et mînces et marchent ordgilleusement comme si la terre lus appartenait. Les femmes Hîndou sont belles et mînces quandi tch'i' sont jannes, mais i' prannent du paids en vieillissant. I' marchent draites comme des pitchets dans lus belles robes dé souaie.
L'aut' jour j'tais dans L'Par National dé Nairobi où'est qu'les bêtes sauvages et féroces ont lus d'meuthes. Nou-s-y va dans eune beusse ou dans un moto et il est d'fendu d'en sorti sénon où'est qu'nou va vaie les hippopotâmes dans la riviéthe. quand nou vait les lions et les "guépards" par c'mîns nou peut bein comprendre pour tch'est qu'nou-s-est mus à l'abri dans eune vouaituthe qu'à marchi parmi ieux! Y'a des marmoûsets d'pus d'eune sorte étout. I' sont tchuthieurs, et quand i' veinnent lé tou du moto i' faut garder les f'nêtres freunmée car il' ont les dés longs - et les bras étout - et i' ramâs'saient autcheune chose tch'est d'amain. Viy'ous eune femme couôrre souotre eune douzaine dé ieux pour êprouver à r'prendre possession d'sa bourse? V'la tchi grîmpe amont les bouais auve pids, coues et mains, et i' sautent comme des critchets d'branque en branque!
J'tions eune douzaine dé motos arrêtés à côté d'une fanmile dé quatre "guépards" ("cheetahs" en Angliais), et il' 'taient enjouardés comme des p'tits cats. I' montaient sus lé d'vant et d'driéethe des motos et r'sautaient bas et lus muchaient driéthe lé préchain moto. Nou-s-éthait dit tch'il' 'taient à jouer à muchi comme nou faîsait comme mousses! I' n'y avait autcheun dangi auve les f'nêtres freunmées. Un p'tit pus liain, à l'âcart, la méthe 'tait assîse dans l'hèrbe à san tout seu, lé co alouangni et la tête en l'air, et ou' r'gardait alentou d'lyi sans arrêt. Ch'tait contre lé sé - l'temps tch'i' r'gardent pour lus souper, et ch'est seux qu'oulle avait ch'là dans l'idée quandi qu'ou' laissait les jannes jouarder. quand j'tchittînmes chutte pliaiche-là, j'n'avions pon 'té bein liain quand j'appèrcheunmes eune janne gazelle toute seule. J'mé sis d'mandé bein des fais d'pis s'ou' fut l'souper d'ches "guépards"-là!
Tchique temps d'vant j'avions passé à côté d'une autruche assîse à couer ses oeufs. L'autruche né fait pon d'nid - l's oeufs sont bas sus l'hèrbe. Appathemment, ou' n'pouvait pon les couvri tous car y'en avait eune démié-douzaine en veue l'tou d'lyi. Il' 'taient bliancs, et gros comme des cocannettes! Iun d'ches'là emplyiéthait eune grand' câssetrôle. Assîse sus ses oeufs san long co m'ttait sa tête au nivé d'la f'nêtre du moto. En r'passant par-là en r'vénant, j'nouos appèrcheunmes qué ch'tait l'mâle tch'était à garder l's oeufs cauds! Un moussieu tchi s'y r'connaît nouos dît qué dans les fanmiles d'autruches lé mâle prend san tou à couer l's oeufs!
George d'La Forge
Viyiz étout: