J'avions fait tant d'trajet en avion qué j'pensînmes tch'il 'tait temps d'nouos r'mettre en mé, et à Fremantle j'allînmes à bord du stînme m.v. Charon, du Blue Funnel Line. J'pense bein qué lé “m.v.” veurt dithe “motor vessel”, car ses engîns 'taient des diesels, mais pour mé - vièr Jèrriais - tout ch'tchi n'est pon navithe à vailes est un stînme! V'la tchi ramémouaithe qué quand j'tais mousse siez ma tante et marraine d'Aubert à La Mouaie, à St. Brélade, nou criyait qué tant pus d'cheunm'nées qu'un stînme avait, tant pus vite i' pouvait aller! Un jour, jé d'mandis à l'oncl'ye (tchi n'est pus) à man couôsin Adolphus d'Aubert dé la Baie d'St. Brélade, lé tché des deux stînmes, lé “Southampton” et l' “Weymouth”, tch'allait l'pus vite? “Boustre d'mêtchi,” i' m'rêponnit. “Ch'est l'Ouaîmus - il a quat' cheunm'nées!”

Compathé au Canberra, lé Charon 'tait un p'tit navithe. Il 'tait à bein près grand comme lé Falaise du British Railways, mais pon si modèrne. Un bouan navithe quand-même, et bein confortabl'ye. J'avions eune belle cabine à bord, bein êventée atout un ventilateur au pliafond, et l'temps fut si bé qu'j'eunmes la chance dé pouver garder l'hublot ouvèrt toute la s'maine tchi nouos prîns à faithe la travèrsée d'Fremantle à Singapour, eune distance dé quâsi 3,000 milles.

Les passagièrs à bord 'taient d'bouanne heunmeu. Un tas d'Australiens 'taient à faithe lé viage aller et v'nin pour profiter d'la vie en mé, et vaie Singapour en même temps, et y'avait des nouvieaux-mathiés à faithe lus leune dé myi. Y'avait tout pliein d'tchi bouan à mangi, et la mé restit calme tout l'long du viage. Touos les sièrs, jé r'gardais la Crouaix du Sud dans les cieux, chutte belle constellation qu'j'avais tant veue en Australie et en Nouvelle Zélande, et tchi s'en allait beintôt êt' houors dé veue, et j'quemenchais à r'garder pour La Polaire, l'êtelle du Nord qué nou n'peut pon vaie d'Australie.

À Singapour, j'eunmes la chance dé pouver rester à bord du navithe pour les quat' jours dé nouot' séjour dans ch't'întérêssante ville-là. V'la tchi nouos sauvit des sou. L's hôtels là-bas sont hardi chièthes, et j'restînmes à bord pour trente chélîns par jour!

La ville dé Singapour, auve sa population d'appréchant 730,000 pèrsonnes, est iun des pus împortants ports du monde! L'île dé Singapour a eune londgieu d'26 milles, et eune laîze dé 14 milles, et la ville même est quâsi sus l'équateur. La tempéthatuthe n'est janmais mains qu'septante dégrés, et il y tchait hardi d'plyie. L'Angliétèrre en prîns possession en 1819 quand l'île n'était qu'un grand mathais, mais la ville est dev'nue un centre d'conmèrce pour le caoutchou et l'blianc fé. L'île, s'pathée d'La Malaisie par lé Dêtrait d'Johore, 'tait eune colonie Britannique jusqu'en 1959. À ch't heu, ch'est un Êtat îndépendent souos la protection d'l'Angliétèrre.