Nairobi, Kenya,
Afrique dé l'Est.
Lé 26 d'octobre, 1968.
Moussieu l'Rédacteu,
Nou vait la girafe d'un fichu but quand nou-s-est dans l'habitat des bêtes sauvages et féroces en Afrique. San long co li donne l'avantage dé pouver mangi les fielles sus les branques des bouais. Ouelle est ieune des bêtes qué nou peut discèrner l'mus viyant qu'san co est si long, et là où'est tchi'i' y'a d'la bouaîs'sie nou peut quâsi s'fier qu'nou-s-en vèrra ieune ou deux à r'garder l'tou d'ieux et brueûter parmi les fielles dé bouais.
Y'avait un tas d'zèbres à paître trantchilment dans L'Par National dé Nairobi quand j'tais-là. Y'en avait au mains eune tchînzaine dans châque troupé. Comme mé l'dîsait un homme à côté d'mé, i' pathaîssaient comme des jannes chévaux tch'étaient à lus promener dans lus “pyjamas” à rîles! I' sont bein propres et il' ont l'air d'êt' apprivouaîsis, et i' n'lus dêrangent pon quand nou passe à côté d'ieux. Viyant qu'pèrsonne n'est pèrmîns d'entrer dans l'par atout eune arme ou autcheune aut' chose tchi pouôrrait lus faithe du ma, l's annimaux n'ont pon d'peux des êtres humains.
Un annima majestueux qu'nou vait d'temps en temps, i' n'y en a pon un tas par les c'mîns, est l'élan (Taurotragus). Nou n'peut pon en appréchi. I' pathaît qu'sa ché est la favorite viande des lions. Quand jé d'mandis comment qu'un lion s'y pranait, à tuer un annima d'chutte grandeu-là, nou m'dît tch'i' gaffe l'élan par lé mûsé, et qu'en sautant et halant d'côté en mème temps, i' lî rompt l'co!
Un drôle d'annima qu'nou vait en assez grand nombres est lé gnou (“wildebeest” en Angliais). Il a un d'vant et eune tête tchi r'semblye au bison ou bufl'ye, et un driéthe comme un j'va! Les lions l's aiment bein à mangi, et i' vont souotre l'zèbre étout. J'vis la carcasse de iun l'aut' jour et i' n'y avait qu'un pid et l's os d'l'êpinne du dos et des côtes dé restant. Ch'est seux qu'les lions l'avaient d'voré, ch'tî-là!
Lé tamanoir (“ant-bear” en Angliais) pathaît drôle atout san long mûsé tch'i' fait sèrvi pour fouôrrer dans les creux tch'i' fait dans les clios pour trouver des freunmions et les mangi. Ch't annima-là fait ses d'gâts aussi bein dans les clios tchi sont labouothés - où'est qu'nou vait les creux et tonnelles tch'il a fait pour dênichi les freumionniéthes - comme dans sén habitat sauvage!
Un annima tchi pathaît drôle est un couochon sauvage, lé phacochère (“warthog” en Angliais). Chein tch'est drôle à vaie est tch'i' chèrfouoille dans la tèrre atout san mûsé en gronnant sans arrêt comme san couôsin domestique. Sans doute, il a l'mûsé bein pus gros et long, à l'êtchipollent du reste d'sa tête, qué san couôsin qu'nou vait dans la cotte en Jèrri, et il a eune dent tchi corle en haut à châque côté d'sa bouoche. Ch'est d's annimaux tchi travâlent la tèrre en gronnant sans arrêt auve lus fanmiles dé p'tits couochons tchi les suivent. I' sont peûtheux et r'gardent lé tou d'ieux tout en fouôillant, chein tchi n'est pon êtonnant quand nou considéthe tch'i' y'a des lions, des guépards et aut' bêtes sauvages tch'ont bouan appétit et tchi dgettent tréjous lus chance pour mangi les cheins tchi n'peuvent pon couôrre aussi vite comme ieux! Ch'est vrai qué l'couochon n'est pon lus viande favorite, mais nou n'sait janmais! Y'a eune tchilieuvre, lé python, tch'en avale iun tout entchi dans p'tit d'temps!
J'n'en ai pon veu iun en vie d'en par ichîn, un python, mais j'en vis iun dans la route l'aut' jour tch'avait 'té êcrâsé par un moto. Il avait six ou sept pids d'long et il 'tait gros comme eune andgulle dé trente livres! J'n'aimethais pon piler sus iun d'mème la niet! I' n'sont pon empouaîsonneux, mais i' lus vient l'tou d'la victînme pour l'êcrâser et pis i' l'avalent en entchi.
I' n'manque pon d'antilopes dans l'par. Ch'est mangnifique d'en vaie un troupé couorre et sauticotter partout. Comme les gazelles, i' s'gardent ensembl'yes quand i' viagent d'un bord et d'l'autre.
Lé long d'la route, assis trantchilment à r'garder les motos passer, j'appèrchus l'chacal, l's ouothelles en l'air et ses p'tits ièrs r'lisant. Ch'est pûtôt râre d'en vaie iun. Nou dithait un p'tit tchian, mais il est liain d'êt' apprivouaîsi! Comme l'hyène, il est rôdeux, et ch'est la niet tch'i' font lus rôd'dies. Lé chacal sé montre tchiquesfais contre la niet. J'vis eune hyène morte lé long d'la route l'aut' jour en allant à Nyeri. Oulle avait probabliément 'té tuée par un moto en crouaîsant la route dans la niet.
Nyeri est eune belle pétite ville à eune chentaine dé milles dé Nairobi. J'y trouvis l'tombé du Lord Baden-Powell (1857-1941), Chef Scout du Monde. I' pathaît tch'il avait d'sithé d'êt' entèrré-là, en fache du Mont Kenya, la pus haute montangne sus l'équateur!
Viyiz étout: