San Antonio, Texas,
U.S.A.
L'preunmyi d'févri 1969.
Moussieu l'Rédacteu,
J'fis d'man mus pour êprouver à faithe comprendre à la sentinnelle ès bèrrexes d'La Chine Nationaliste à Formose qué j'voulais entrer pour vaie l'Captaine Chen Ping-ching - mais pon mouoyen! Heutheusement, un officyi tchi crouaisait la parade mé vit et vînt à man s'cours. Il 'tait au mains du grade dé Coronel, et i' savait bein l'Angliais. Quand j'lî dis qué j'connaîssais l'Cap'taine Ping-ching i' m'fut charmant. “Mais il est houours siez-li à faithe sa sieste!”, i' m'dit. “Ichîn, pèrsonne né fait rein entre méjeu et trais heuthes dé l'arlévée, à cause dé la chaleu!” À chu moment-là il 'tait douze heuthes et d'mie, et j'avais mantchi d'vaie m'n anmîn par eune démi'heuthe!
J'fus invité à attendre pour lé Cap'taine. Ch'tait eune affaithe d'attendre deux heuthes et d'mie, mais i' faîthait si caud qué j'tais trempé d'sueu, et l'idée d'passer un coupl'ye d'heuthes dans la fraîcheu d'un apartènement à l'ombre mé pathaîssait hardi d'sithabl'ye et mé v'la êtravelé comfortabliément dans eune grand-tchaîthe! Mais l'confort né duthit pon longtemps. J'tais justément en traîn d'faithe un p'tit somme pour lus montrer qu'un Jèrriais peut faithe la sieste aussi bein comme un Chinnouais quand un soudard vînt m'prendre par lé bras! I' m'enm'nit dans eune aut' bèrrexes pas bein liain d'là, et m'èrvéla à êprouver à m'faithe comprendre acouo eune fais, et jé n'savais pon pour tchi dgiâtre tch'i' n'm'avaient pon laîssi attendre où'est qué j'tais preunmièthement!
En fîn d'compte, i' trouvîdrent un janne apprenti-aviateur tchi savait un mio d'Angliais, et i' m'consilyit dé m'mâter à l'entrée des bèrrexes à trais heuthes pour vaie m'n anmîn arriver. Dans l'entrétemps, j'tais si altêthé qué j'lî d'mandis où'est qu'nou pouvait acater tchiquechose à baithe. J'puthais d'sueu, et j'avais eune fichue sé! I' m'condîsit à eune pétite bijuque en bouais pas liain d'là. Dédans, j'trouvis un Chinnouais tch'était à faithe du thée. Lé seul ameubliément 'tait eune tabl'ye et un banc en bouais, et i' sèrvait l'thée dans les vèrres. Ou' pâlez d'un vèrre caud! Auve lé thée bouoillant nou-s-avait d'la peine à t'nîn l'vèrre, mais j'en bu trais ou quat' dé siette, et v'la tchi m'sauvit la vie! I' n'y a rein comme du thée caud pour vouos raffraîchi quand nou-s-a caud. Chutte bijuque-là n'avait janmais veu d'peintuthe, ni la tabl'ye ni l'banc, mais pour mé - en sueu et altéthé - ch'tait un vraie “oasis” dans l'désèrt!
Mé v'la don à l'entrée des bèrrexes à trais heuthes, mais ouaithe qué j'connaîssais l'cap'taine qué j'voulais vaie, j'n'en vis rein, et j'mé d'mandais si j'l'avais mantchi, car - pour en dithe la véthité - touos les Chinnouais m'pathaîssaient s'entr'èrsemblier chu jour-là! Jé c'menchais à penser qu'jé s'sais oblyigi d'm'engagi soudard dans l'armée Chinnouaise pour pouver m'èrnarder d'tchiquechose jusqu'au lendemain, quand l'janne apprenti-aviateur allit m'èrcondithe ès preunmié bèrrexes qué j'avais visité. Dans l'corps dé garde i' m'donnîdrent un papi à remplyi. Ch'tait tout en Chinnouais, et j'tais justément à gratter ma tête en mé d'mandant comment qu'j'allais lé remplyi quand j'appèrchus l'Cap'taine Chen Ping-ching tchi crouaîsait la parade! I' m'vit en mème temps et s'en vînt bouan rond au corps dé garde! Dans rein d'temps nouos v'la à bailli d'nouot' becque dans l' “Mess” des officièrs!
Lé cap'taine obtînt un congi d'quarante-huit heuthes et l'prêt d'un Jeep, et nouos v'la houors siez-li dans la ville. Sa femme est eune charmante Chinnouaise dé Hong Kong. Ou' pâle l'Angliais étout, et comme il' avaient touos les deux d'meuthé parmi les gens d'l'Occident lus maîson 'tait meubliée commes les nôtres, et j'pouvions mangi atout couté et fourchette à la pliaiche des p'tites badgettes (“chopsticks” en Angliais), qué nou fait sèrvi d'habitude à tabl'ye en Chine.
Pour deux jours dé temps j'fus fêté comme un moussieu, et j'eus la chance dé vaie Formose souos les miyeu circonstances et auve l'aîgue d'un mangnifique dgide et pilote!
I' pathaît qu'les Hollandais fûdrent les preunmié gens d'l'Europe à s'êtablyi-là en 1624. L's Espangnos êprouvîdrent à s'y êtablyi étout tchiques années pus tard, mais les Hollandais l's empêchîdrent d'y rester et i' fûdrent ieux mèmes chassés houors dé là par Koxinga, un pirate dé péthe Chinnouais, et d'méthe Japonnaise, en 1662. Dépis chu temps-là, l'ile a 'té peupliée par les Chinnouais et otchupée par les Japponais jusqu'à la deuxième grand' dgèrre, et ou' d'vînt lé r'fuge du gouvèrnément d'La Chine Nationaliste souos Chiang Kai-shek en 1949. Sa population appréchait d'neu millions en 1953. Formose est eune mangnifique île à visiter, mais d'vant y'aller bouannes gens, j'vouos r'quémande d'apprendre à pâler l'Chinnouais!
J'èrvins à Keelung bein content d'ma visite à Tai-pei et bein content d'èrtrouver l'stînme à m'attendre. J'vîns à l'aimer tant, chu navithe-là, qu'j'eus grand r'gret d'aver à l'tchitter, à la fin d'man viage lé tou du monde en 1950!
George d'La Forge.
Viyiz étout: