L's Australiens ont lus fête nâtionale lé vîngt-six d'Janvyi – et pouor ieux ch'est l'mitan d'l'Êté. Lé Jour d'l'Australie mèrque la date quand la colonnie d'la Nouvelle Galles du Sud fut fondée, v'là tch'est considéthé coumme lé preunmié pas sus lé c'mîn d'la bâtithie d'eune nouvelle nâtion.
Bein seu qué ch'n'est pon tout l'monde tchi craient qu'i' faut célébrer chu jour-là, car l's aborigènes avaient d'meuthé là pouor bein longtemps dans lus continnent à ieux avant l'arrivée d's Ûropéens. Mais laîssons les tchestchions politiques, et d'mander pustôt: à tch'est qu'nou pense quand nou ouï pâler d'l'Australie?
Y'a bein d'Jèrriais tch'ont d'la fanmil'ye là-bas, et i' pouôrraient êt' ramémouaithés dé p'tits fis et p'tites fil'yes Australiens et des r'pas à la broche dans des gardîns d'maîsons d'Sydney ou d'Melbourne ou d'aut's villes.
Y'en a tchi pensent au sport – car l's Australiens aiment bein lus gammes et lus êtchipes, et duthant l'dgiêx-neuvième siècl'ye lé Jour d'l'Australie 'tait pustôt mèrtchi auve des courses à j'vaux et des courses à batchieaux. La r'gatte dé Sydney, t'nue pouor la preunmié fais lé 26 d'Janvyi 1836, est la pus vielle èrgatte du monde.
La natuthe antipodgienne est spectatchulaithe – mais ché n'tait pon un souôlagement pouor les pouôrres prisonnièrs transportés à la Baie d'la Botannie. Les bieautés natuthelles încliuent Uluru (tchi soulait avait nom l'Rotchi d'Ayers). L'Australie a tout pliein d'annimaux tchi n'existent autchun bord d'aut' – les kangarous, les koalas et les fanmeurs pliatypus à bé d'cannard.
Ès marsupiaux et à touos nos anmîns Australiens, jé souhaitons eune bouonne fête!
2004
Viyiz étout: