Deuxième partie
Lé 4 septembre, 1971
Moussieu l'Rédacteu,
Touos les Russes né sont pon Communistes. Lé pays, lé pus grand au monde, est compôsé dé tchinze républyiques individuelles, couvrant eune êtendue dé huit millions d'milles carrés, un siexieme dé l'êtendue habitée du monde entchi, trais fais la grandeu d's États-Unis d'l'Améthique, et quatre fais la grandeu d'l'Angliétèrre, la France, l'Italie et l'Espangne minsent ensembl'ye!
Lé pouvé politique est, en principe, entre les mains des députés des travailleurs. La population des tchinze républyiques rêunies est 240 millions. Jé n'sis pon trop seux combein tch'i' y'en a d'chu nombre-là tch'appatcheinnent du Parti Communiste, mais j'pense qué ch'est entre dgix et tchinze millions seulement. Ch'est eune grande honneu d'être du parti, et ch'n'est qu'les pus dêdiés et dévoués du réginme tchi sont acceptés comme membres.
Tout l'monde est emplyiyé par l'Êtat, et i' faut qu'tout l'monde travâle jusqu'à un cèrtain âge - i' m'sembl'ye aver ouï qu'ch'est jusqu'à souoxante ans - et pis i' sont pintchinneurs. Les gages sont dé 70 à 700 roubl'yes par mais (deux roubl'yes et tchinze kopecks valent un louis stèrling). Les femmes travaillent comme les hommes, et nou les vait à netti les rues et à prendre lus pliaiches parmi machons et tchèrpentchièrs à bâti des maîsons. L'êducation est libre pour tout l'monde, et l'Univèrsité à Moscou a souoxante mille êtudiants.
Eune drôle dé chose est qu'ichîn en Jèrri les gens tchi sont naturellement tchuthièrs dé saver tch'est tch'i' s'pâsse en Russie, pathaissent d's'appointés quand j'lus dit autcheune chose dé bouan entouorre chu pays-là. "Mais, ou n'avez veu qu'chein tchi veulent vouos montrer!" i' m'disent. Eh bein, ch'est vrai, sans doute. Mais ch'est la même chose quand nou va dans autcheun pays comme touristes - même en Jèrri. Ch'est seux qu'nouos dgides né montrent pon les p'tits bels tchi s'trouvent drièthe les maîsons dans les rues d'la ville, et où'est qu'bein des pauvres démeuthent, ès visiteurs. J'ai souvent pensé à ch'la quand j'vai les chars-à-bancs plieins d'touristes lus arrêter ès hôtels et aubèrges dans la Route des Mielles et à L'Êta au sé. Au mains nou n'vait pon tant d'baithie en Russie. Dans tout l'temps qué j'fus là jé n'vis qué quat' pèrsonnes cauds d'baithe dans les rues. Ch'est seux tch'i' y'a des Russes tchi baivent pus d'Vodka, lus fanmeuse litcheu, tch'i' n'dév'thaient. Ché s'sait riditchule dé penser autrément, mais nou n'en vait rein dans les rues.
Et nou n'vait pon fort dé pèrsonnes feunmer. Tchitch'uns d'temps en temps, mais pon bein des pièches, et nou n'vait pon d'femmes dans les rues atout la cigarette dans l'mûsé comme ichîn. Jé d'mandis à iun des dgides pourtchi qu'nou viyait si p'tit d'pèrsonnes feunmer, et i' m'rêponnit qu'la feunmthie n'tait pon nécessaithe. V'la tchi m'ramémouaithe qué les Russes ont concentré sus la production des choses nécessaithes à la vie quotidienne. Par exempl'ye, nou n'vait pon d'femmes atout des cauches par les c'mîns, et nou vait la raison quand nou r'garde lé prix des cauches, sustout les "panty hose" ou "tights" (est-che là les noms correctes? N'étant pon mathié, j'n'en sis pon seux!) I' couôtent chin fais autant comme ichîn, et ch'est viyant tch'i'n'sont pon vrainment eune nécessité. Ch'est probabliément seux qu'les femmes ont à mettre des cauches dans l'hiver, car ch'est un pays fraid dans chutte saison-là, et les cauches ordinnaithes dé laine sont probabliément bouan marchi.
Ch'est la même chose pour lé mangi. En général, les necessités, pain, viande, lédgeunmes, et., couôtent à bein près l'même prix comme en Jèrri et dans cèrtains cas jusqu'à dans les dgiz du chent d'pus, mais les chucrins et l'chocolat, tchi n'sont pon des nécessités, couôtent lé doubl'ye et pus! J'ai souvent ouï dithe qué les nègres en Améthique, tchi n'sont d'douze du chent d'la populâtion, ont pus d'motos qué touos les Russes mins ensembl'ye. Ch'est probabliément vrai, mais l'moto n'est pon considéthé eune nécessité pour la populâtion en général en Russie, ouaithe qué nou-s-en vait gentiment dans les villes, et l'nombre s'en va grandi dans l's années tchi veinnent. I' pathait qu'la maîson Italienne Fiat s'en va aver pèrmission d's'êtablyi là pour en fabritchi.
Par contre, lé louogement du peupl'ye est considéthé grand'ment nécessaithe, et i' sont à bâti des grand bâtisses carrés tchi contcheinnent un tas dé louages en blio comme nou-s-en vait en France dé nouos jours. Dans iun d's alentours dé Kiev, il' en ont bâti assez pour louogi quarante mille pèrsonnes d'un côté d'la rue, et souoxante-deux mille dé l'aut' côté. J'nai pon sans doute veu lé d'dans des louogements, et jé n'sai pon combein d'chambres et d'apparteinements tch'il' ont pour châque fanmile, mais i' m'sembl'ye aver ouï qué l'couôtement d'un louage en Russie n'peut pon êt' pus haut qu'un siexième dé l'entchi du salaithe du locataithe. I' n'faut pon sans doute oublyiyer qué touos l's immeubl'yes appartcheinnent à l'Êtat, et qu'ch'est l'Êtat tchi paie touos les salaithes.
(À siéthe)
Viyiz étout: