Aniet, Mardi, lé vingt-six d'Novembre mil neu chent souoxante-trais nouos v'la en veue du pays mystérieux d'Cléopâtre et des Pyramides - l'Egypte! Malheutheusement, j'n'allons pon êt' là bein longtemps et jé n'pouvons qu'vaie port Saïd en attendant pour entrer dans l'Canal dé Suez. J'avons embèrtchi l'pilote à méjeu et j'tions ancrés dans l'port à deux heuthes. A trais heuthes j'tions à tèrre.
Port Saïd est à l'entrée dé la Méditerranée dans l'canal. La ville a eune population dé deux chent chînquante mille. Dé là au Caire i' prend trais heuthes et d'mie en moto, et lé c'mîn longe lé canal pour quarante-siex milles jusqu'à Ismailia. Les sou Egyptchiens sont appelés des Milliemes, des Piastres et des Louis. Y'a dgiex Milliemes au Piastre et chent Piastres au Louis. L'êchange est favorabl'ye pour l's Angliais, car i' vouos donnent un louis et deux chents piastres pour eune livre sterling.
J'avons passé deux heuthes et d'mie à visiter la ville en moto, et j'avions ieu la chance d'aver pèrmission d'entrer dans eune Mosquée Mahométane. Oulle est modèrne, mais hardi belle. I' fallait haler botters ou souliers d'vant entrer. Comme dans toutes les Mosquées, les deux prîncipaux ornéments en d'dans sont la Tchaise et lé "Mihrab" - eune niche en forme d'alcove ou abside, pliaichie dons la muthâlle en telle psition qué quand les fidèles lus mettent endrait pour dithe lus prièthes, lus r'gard est dans la direction d'La Mecque, car i' faut tréjous qu'i' fachent La Mecque en priant. Dans l'bel au côté d'La Mosquée, y'a eune manièthe dé lavethie, où-est qu'les Mahométans lavent lus mains et lus pids et lus faches et l'co devant entrer. En d'dans, y'a tréjous des tapis ou des nattes tchi couvrent tout l'plianchais, et j'ai souvent veu des fidèles, aussi bein les pauvres comme les riches et travailleurs comme intellectuels, acroupis ou assis sus lus hanques à liéthe ou êcrithe, et d's êcolyiers à êtudier, d'aut' couochis tout lus long a dormi en pliein jour. Comme ch'est la maîson du Bouan Dgieu, touos les fidèles sont les beinv'nus à y faithe comme siez ieux pour bein tch'i' s'comportent comme i' faut. les gens là-bas sont pauvres et n'ont pon d'parleurs dans lus maîsons, ch'est-en-tchi - pour l'êtudiant prîncipalement - sa mosquée est une belle pliaiche, trantchil' et idéale, pour faithe ses leçons en r'pos. Sans doute, v'la tchi n'veurt pon dithe que nou-s y vait touos les mousses d'êcole!
Ouaithe tch'i' y'a d'belles boutiques et d'bieaux bâtisses à Port Saïd, ch'est là - dans les rues d'drièthe - qué nou c'menche a s'appêrchéver d'la pouôrretté d'la mâsse des gens d'l'Orient. Les mousses vouos sièvent dans les rues, la main tendue pour tcheûter. I' sont en chiques et nou-s en a pitchi, mais si nou c'menche à lus donner des sou nou n'peut janmais en finni. Ch'est êtonnant comment qu'la nouvelle couôrre qué nou-s est du rang des donnants, et nou-s éthait touos les mousses - et même les grand' pèrsonnes - du vaîsinné souotre-sé dévant r'gangni la cauchie et la protection du navithe! I' n'faut pon aver l'nez trop fîn, n'tout, quand nou s'promène dans les rues. L's odeurs né sont pon d'l'ieau colongne, et nou né s'sait pon echoeuthus à y mangi. Ch'n'est pon seûstabl'ye dé baithe d'l'ieau dans ches villes-là, à mains qu'ché s'sait dans eune hôtel dé preunmié classe et bein r'quémandée. Ch'est bein à cause dé ch't êtat sanitaithe-là tch'i' faut êt vacciné contre lé choléra, la fièvre jaune et la typhoïde dévant aller en Orient. La tempéthatuthe en mé 'tait 71 dégrés en arrivant au port, mais i' faisait bein pus caud à tèrre.
Aniet, Mêcrédi, lé vingt-sept dé Novembre, 1963, j'avons 'té dans l'Canal dé Suez la grand' partie du jour. Il a quâsi chent milles dé long. La contrée ramémouaithe l'histouaithe du peupl'ye d'Israël en esclivage en Egypte, Dans l'Ancien Testament i' nouos est dit qué l's Israëlites crouaîsîdrent la Rouoge Mé à pid-sé quand i' tchittîdrent l'Egypte pour aller à la tèrre promînse, viyant qu'la mé rtchulit sus lyi-même pour les laîssi passer, et qu'oulle englioutit l's armées Egyptchiennes tch'êprouvîdrent à les sièthe. Aujourd'aniet, y'a des savants tchi pensent qué y'a lieu d'craithe qué ch'tait dans l's envithons d'eune pliaiche appelée El Kantara, située à eune trentaine dé milles au sud du Port Saïd qué ch'la s'arrivit. Sans doute, i n'y avait pon d'canal artificiel là dans l'temps, mais i' pathaît qu'y avait des mathes ênormes tchi n'avaient pon grand' profondeu, quâsi tout l'long du c'mîn, dé Port Saïd à La Baie d'Suez, et qué ch'tait probabl'yement tout appelé La Rouoge Mé.
Lé canal actuel est l'preunmyi à travèrser directement dé Port Saïd à Suez. En l'an 1400 dévant Jésû-Chri, y'en eut iun d'bâti tchi jouaingnait la rivièthe du Nil ès Lacs Amers, et dé là la marchandise 'tait transportée sus tèrre à la Rouoge Mé. En deux chent huiptante-chînq dévant J.C. un pus grand canal, bâti par Ptolémée Philadelphus, allait dé mé en mé par lé Nil. Nou n'vait pus hardi d'trace dé ch't'ila à ch't heu, pathaît-i'. Ch'tait 'vithon l'an 700 A.D. qué Haroun al Raschid sé mîns dans la tête de creuser un canal tch'îthait directement dé Suez au site tch'est l'Port Saïd d'à ch't heu', mais l'idée fut abandonnée viyant tch'i' craingnaient la forche navale Byzantine dans la rouoge Mé.
En mil huit chent chînquante-quatre, Ferdinand de Lesseps, un ingénieux Français, mênagit à aver eune concession dé Saïd Pasha, Khédive d'Êgypte, pour qué "La Compangnie Universelle du Canal Maritime de Suez" eûsse pèrmission d'creuser l'canal actuel, et dé l'faithe valer pour nénante-neuv' ans dé mil huit chent souoxante-neuf. Lé Sieur de Lesseps, homme ênergique et capabl'ye, avait finni sa tache formidabl'ye en mil huit chent souoxante-neuf, et l'canal fut dêcliathé ouvèrt par l'Împératrice Eugénie ch't année-là. Il avait couôté chînquante-sept millions d'livres stèrling à creuser et bâti. En mil huit chent septante-chînq, Lord Beaconsfield (né Benjamin Disraëli), Preunmié Minnistre d'Angliétèrre dans l'temps d'la Reine Victoria, acatit - au nom d'l'Angliétèrre - la partie d's actions d'la compangnie tch'appartenait au Khédive, et auve quarante-quatre pour chent du capita en sa possession, lé Rouoyaume-Uni d'vînt, d'un bieau but, lé pus grand actionnaithe du canal, et en prîns l'contrôle. Lé vîngt-six d'juilet mil neuf chent chînquante-six, lé canal fut nationalisé par lé Gouvèrnement Êgyptchien.
Lé passage du canal est trop êtrait pour eune grand' partie d'sa londgieu pour deux grands navithes à s'entre-passer, ch'est-en-tchi i' faut atchumuler un tas d'navithes dé châque but dévant l'navidgi. La preunmièthe atchumulation tch'arrive au Grand Lac Amer s'y met à l'ancre en attendant pour les navithes tchi veinnent dé l'aut' but du canal, et pis i' s'entre-passent là et châque atchumulation continnue dans sa direction voulue. J'tions dgiex-neu' navithes dans nouot' lot, et ch'est intérêssant d'noter les nationalités d'ches navithes - un Italien, un Français, quatre Angliais, trais Hollandais, trais Allemands, un Espangno, un Polonais, deux Libériens, un Grecque, un Indonêsien et un Améthitchain. Il en couôte, étout, pour la travèrsée. Lé Canberra, dé quarant'-chin' mille, sept chent trente-trais tonnieaux, paye treize mille, trais chent trente livres, dgiex ch'lîns, quat' pénîns stèrling châque fais tch'i' navigue lé canal d'un but ou d'l'autre!
Nouos v'là, enfîn, dans la Rouoge Mé. À bâbord, dans l'golfe d'Suez, nou vait la côte dé la Péninsule dé Sinaï, tch'est partie d'l'Êgypte d'aujourd'aniet. Si nou-s a d'bouannes longues-veues nou peut discèrner, dans la distance, la montangne dé Sinaï. Ch'tait sus l'haut d'chutte montangne-là qué Moïse èrchut les Dgiex C'mmandements du Bouan Dgieu.
Aniet, vendrédi, l'vîngt-neuf dé novembre mil neu' chent souoxante-trais, j'sommes acouo dans la Rouoge Mé. La tempéthatuthe est huiptante-iun dégrés. À bâbord, la mé longe la côte du Rouoyaume dé l'Arabie Saoüdite. À bein près à la maintchi d'sa londgieu, si nou pouvait aller à tèrre, nou trouvethait, pon hardi liain d'la côte, la fanmeuse cité dé La Mecque, ville sanctifiée pour touos les Mahométans, et capitale du Hedjaz.
George d'La Forge
Viyiz étout: