Il arrivi l'aut'e jour dans iune des pâraisses d'amont, un homme qu'avait 'té hors Jerri dépis à peu près vingt-chînq ans.
I'r'venait d'Australie, et, une séthée, i's'trouvi à l'auberge auprès l'églyise parmi plusieurs de ses anciennes connaîssances.
Dans un temps la conversation touâni sus les r'venants, etc., et un châtchun raconti des choses qu'il avait ou dithe ès vieilles gens quant à des visions, des maisons troubliées et ainsi d'suite.
Iun d'ieux s'touâni au sien qu'était r'venu d'Australie et li dît comme chenna, “Vous qu'avez viaigi un mio dans l'monde, ou n'criyiz pas à tout chu niollin-là, est-che pon?”
“Je n'sais pas don,” i'li raîponni, “i'n'est pas besoin d'aller jusqu'en Australie pour vais des choses extraordinaithes. Savous-bain qu'i' m'est arrivé une drôle d'expérience ichîn dépis que j'sis ervenu?”
“Bon! Contez-nous la chose don!”
“Eh bain, avant-hier j'étais dans l'chimetièthe, ichin tout près à lièthe l'inscription que ma femme avait fait mettre sus l'tombé d'ma belle-mèthe, quand je ouï une vouaix tout près d'mé qui m'appeli par man nom.
Je m'touâni d'bord et à ma grande surprinse je n'viyais personne. Comme je m'en r'allais du côté d'la hèche je vis une maigre main sorti hors d'une tome, empoigni la meinne et s'mettre à la châtchi, et -“
“Ah dame! ch'la n'est pas vrai par exemplye!” les autres se firent.
“Pourtant, je n'ai pas l'habitude de conter d'ment'ties!”
“Mais viyons, crait-tu tout bouannement que j'allons avaler une histouaithe comme chette-là?”
“Avalez-la, s'ou voulez, mais je peux la prouver! Dans mains d'djaix minutes je m'en vais vos faithe vaie tout en entchi le corps qui châtchi d'main avec mé!”
V'là qu'en êpouvanti deustrais d'ieux et i' s'êcriyithent: “N'ayiz pas l'malheur de faithe ditèt!”
Iun d'ieux qu'était un mio pus hardi que l'restant dit comme chenna: “I' n'm'en s'sait pas d'rain de l'vaie sus un sens, ch't ouaisé-là, mais vos en s'sait i' d'rain de nouos dithe san nom?”
“Oh! quant à ch'la ch'est bain facile, ch'tait tout sîmplyement le fossyi.”
Caouain 1924
Viyiz étout: