Chîntchième partie
St. Servan-sur-Mer,
Lé 25 Septembre, 1971
France
Moussieu l'Rédacteu,
J'avais tréjous pensé qué l'Kremlin à Moscou 'tait à bein près grand comme la Place Rouge, mais ch'est, nou peut dithe, eune pétite ville dans l'mitan d'eune grande. L'entrée d'dans par la Place Rouge est gardée par des sentinelles, changies d'temps en temps, comme dévant l'Palais d'Buckingham à Londres, et ch't' entrée-là est résèrvée ès grôsses têtes du Parti Communiste tchi gouvèrne l'pays.
La belle grand Cathédrale Orthodoxe dé St. Basil, dans l'mitan du côté sud de La Place Rouge, est r'mèrquabl'ye pour la bieauté et les difféthentes couleurs dé ses sept ou huit coupoles en forme d'ouongnon. Jé n'm'èrsouveins pon d'l'année qu'ou fut bâtie, mais j'pense qué ch'tait dans l'quatorzième siècl'ye, et i' nouos fut dit qué l'Tsar dé l'êpoque fut si êmèrvilyi d'sa bieauté tch'i' fit l'architecte êt' aveuglié pour sé faithe seux tch'i' n'pouorrait janmais en r'bâti eune autre dé même. Comme dans toutes les aut' cathédrales qué j'visitînmes, lé tchulte du Bouan Dgieu y'a 'té rempliaichi par eune exhibition d'objets d'art.
Eune haute muthâle dé rouoge briques est la gardgienne des quatre côtés du Kremlin, et i' faut quâsi faithe lé tou pour trouver l'entrée du publyi. Y'avait eune foule dé touristes auve lus dgides à l'entrer quand j'tions là, un tas d'ieux étant des Russes, prîncipalement d's êcolyièrs. La preunmié chose tchi vouos frappe en entrant est l'Grand Palais, bâti entre 1838 et 1849. Ch'est un musée à ch't heu, comme lé sont les trais supèrbes cathédrales orthodoxes dé L'Assomption, dé L'Annonciâtion et d's Archanges, et l'Égyise des Douze Apôtres et l'cliochi d'Ivan lé Grand, touos des monuments des tchînze et seizième siècl'yes. Ch'est seux qu'les sèrvices 'taient supèrbes à vaie dans ches cathédrales-là dans l'temps des Tsars. Lé chant 'tait mangnifique, car les Russes sont r'nommés comme chanteurs dé la bâsse.
Y'a bein d'aut' bâtiments historiques à vaie. Lé pus modèrne est l'Palais des Congrès tchi siége siex mille pèrsonnes en même temps, et y'a des concèrts là d'temps en temps. J'allînmes y vaie des danses folkloriques eune séthée. Lé Palais est cèrtainement un mangnifique exempl'ye d'architectuthe modèrne. Eune arsénal, bâtie en 1736, tch'était l'siége du Sénat dans l'temps des Tsars, est l'siége du Gouvèrnément Sôviétique d'à ch't heu.
Y'a tout pliein d'tchi à vaie en d'hors dé La Place Rouge et du Kremlin à Moscou. Les Russes aiment lé thiâtre et la mûsique, et y'a eune quarantaine dé thiâtres et salles dé concèrts dans la ville. Lé fanmeux ballet Bolshoi est là, et y'a un cirque tch'est supposé êt' lé miyeu au monde. J'allînmes lé vaie eune séthée et j'né s'sais pon ravi qu'ch'est vrai, car j'n'en ai janmais veu un miyeu.
Dé Moscou, eune heuthe en avion nouos am'nit à Kiev, la capitale dé l'Ukraine. La preunmié chose qué l'Sieur Lé Maistre, tch'était en Jèrri duthant l'Otchupâtion, èrmèrtchit, 'tait qu'les gens à l'entou d'nous avaient les mêmes philomies comme les cheins tch'étaient l's escliaves des Allemands, et tch'étaient en êffet des gens d'chu pays-là!
L'Ukraine souffrit hardi par la dgèrre, et il a couôté 285,000 millions d'roubl'yes pour èrpather l'danmage fait par les Allemands. Nou n'en vait autcheun sîngne à ch't heu. Kiev est eune mangnifique ville au bord dé la riviéthe Dniéper. Nou n'dithait pon à la vaie qu'oulle a 'té mille ans en existance, car oulle est modèrne. Les maisons des deux côtés sont d'eune bieauté qu'nou n'vait pon souvent en si grands nombres. La Dniéper est eune belle grand' riviéthe, et j'eunmes eune mangnifique promenade dans un baté d'ssus. Ch'tait dans chu baté-là qu'j'eunmes lé seul contacte pèrsonnel auve un Russe - autrément qu'les dgides. J'tions trais (pûtôt) anciens assis sus un banc au solé, et i' nouos donnit sa pliaiche et les cheinnes à ses mousses, à l'ombre. I' savait deux-s'trais mots d'Angliais et châtchi d'main auve nous. Un charmant corps d'eune quarantaine d'années.
Nouot' préchain arrêt fut la ville d'Odessa, au bord dé La Néthe Mé, lé pus grand port sus chutte mé-là. Ch'tait sus l'navithe dé dgèrre Potemkin à Odessa qué la preunmiéthe des révolutions Russes quémenchit, en 1905, et dans les deux mille pèrsonnes, assembliées dans les d'grés d'eune montée tchi d'vale sus la cauchie fûdrent tithées et abattues par les troupes Tsaristes viyant tch'il' 'taient là à encouothagi les matelots tchi s'étaient r'voltés.
J'eûnmes un viage à bord d'un navithe dans La Néthe Mé. Lé temps 'tait supèrbe et la mé 'tait calme. Nou viyait des grèves lé long d'la côte tch'étaient plieinnes dé monde à lus bangnier.
D'Odessa, l'avion nouos portit à Léninegrad pour la contrôle des passeports à la sortie du pays, et dé là i' nouos r'portit à Londres sains et saufs auprès un viage bein întérêssant dans un bieau grand pays où'est qu'la vie pathaît normale - pour les Russes!
Viyiz étout: