La population d'Singapour est un mêlange dé Malais, Chinouais, Indiens, et autres, et la grand' partie des conmèrçants et marchands sont Chinouais. Partout, en Extrême Orient, les Chinouais, race aufaite, divèrsément întelligente et d'esprit malîn, sont connus comme “Les Juis d'l'Orient!”

Y'a deux mangnifiques cathédrales, ieune Anglyicane et l'autre Catholique Romaine, à Singapour. À la Cathédrale Anglyicane dé St. André lé dînmanche qué j'tais là, lé sèrvice dé La Sainte Cène fut célébré à huit heuthes lé matîn par un Êvêque du pays, en vêtements Eucharistiques et mitre. Ses Diacre et Souos-Diacre, étout en vêtements Eucharistiques, 'taient Chinouais et Malais respectivement. L'orgue et l'chant 'taient supèrbes à ouï. Lé sèrmon fut prêchi par l'Êvêque des Îles Philippines. J'restis dans la Cathédrale pour lé préchain sèrvice - La Sainte Cène dans la langue Mandarine! L'Églyise 'tait plieine dé Chinouais pour lé sèrvice et i' chantaient auve enthousiasme dans lus langue. Lé Prêtre et ses Diacre et Souos-Diacre à l'Autel 'taient Chinouais, et l'Êvêque dé Tai-Peh, capitale dé Formose, prêchit l'sèrmon. Les sèrvices pour les jours dé la s'maine fûdrent annoncés comme étant en langues Angliaiche, Chinouaise, Malaise et Tamil. Vrainment l'Églyise Apostolique et Univèrselle!

La cauchie d'Singapour est pittoresque à vaie atout san mêlange dé toutes sortes d'navithes comme nou n'en vait qu'en Extrême Orient! Y'en a pour touos les goûts, du grand stînme (lé “liner” en Angliais) à la jonque Chinouaise tch'est là en abondance, et un tas dé p'tits batchieaux dé toutes les faichons - chalands, péniches, barques, etc. Sus hardi d'ches batchieaux, y'a des fanmiles tchi d'meuthent à bord et tch'y passent lus vie. I' gangnent lus pain à transporter des marchandises, apportés dans les grands batchieaux, ès marchands et conmèrçants d'la ville.

Ch'tait quâsi à r'gret qué j'tchittînmes Singapour pour aller à l'Île dé Penang par avion, dans les siex chents mille au nord dans la péninsule dé La Malaisie. En c'mîn, j'dévalînmes à Kuala Lumpur dans l'Êtat dé Selangor, belle capitale dé La Malaisie atout ses Maisons d'Parlément en style Mauresque, ses hôtels hautes en êtages, et ses rues à maîntchi Chinouaises en appathence. Dévant arriver à Penang j'fînmes, étout, eune descente à Ipoh, capitale dé l'Êtat dé Perak.

Ouaithe qué La Malaisie n'est qu'à eune pétite distance dé l'Êquateur, la tempéthatuthe n'est pon si êl'vée comme nou l'créthait. Eune mouoyenne dé 74 à 87 dégrés est à bein près normale dans les pays bas, et 36 à 82 dégrés dans les régions montangneuses. Lé thée et l'café sont tchultivés dans ches régions-là.

Penang est eune île formant partie d'l'Êtat du même nom tch'a eune population dé 240,000 pèrsonnes. La ville dé Georgetown, port d'împortance, est généralement appelée Penang, comme l'île. Dans l'mitan d'l'île, y'a eune montangne dé 2,722 pids, et nou peut monter au haut dans un “Chemin de Fer Funiculaire” pour vaie la belle veue du pays. La ville vaut la peine dé vaie. Y'a un bieau templ'ye Chinouais, atout sa pagode dé grand' richesse dé sculptuthe orientale, à visiter. L'Églyise Anglyicane dé St. George, bâtie en 1817 (ch'est vyi pour eune églyise Chrêtchienne là-bas), est historique. Les mosquées Mahométanes sont tréjous întérêssantes, et les rues étout, auve lus piêtons de toutes les races orientales.

J'tions dans eune mangnifique hôtel à Penang, l'Hotel International. Oulle 'tait acclyimatée, et l'air 'tait tréjous frais dans les chambres et nou pouvait y dormi confortabl'yement. J'avions quâsi r'gret d'nouos en aller d'là étout, mais j'avions tout-d'même envie d'vaie Bangkok, la belle capitale du vièr Siam, appelé Thaïland à ch't heu.