La rivièthe vaut la peine dé vaie. Ou' rempl'ye un bésouain împortant pour lé peupl'ye d'eune ville dé la grandeu d'Bangkok, et tch'a à vivre dans la grand' chaleu. Lé milyeu temps d'la navidgi est d'bouanne heuthe au matîn. I' fait dêjà caud à sept ou huit heuthes, et nou vait les gens à lus laver d'but dans l'ieau jusqu'à la tâlle ou l's êpaules. I' lus lavent atout lus mains - et du savon s'i' peuvent en acater. Un p'tit pus liain, nou vait les gens à tendre lus p'tiots sus l'ieau pour, respé vouot' honneu, souangni des bésouains d'la natuthe! Et acouo pus liain, d'aut' sont dans l'ieau à laver lus dents, et y'a des femmes ichîn et là a laver lus vaissieaux!

Oulle est vrainment l'anmie du peupl'ye, chutte rivièthe-là! À m'suthe qué nou navigue amont, nou s'trouve parmi un tas d'canots et de p'tits batchieaux allant dans la même direction. I' s'en vont au marchi fliottant. J'y arrivons beintôt, où-est qu'la rivièthe est pus êtraite. Des deux bords y'a des boutiques - des maisons fliottantes âncrées, des huttes bâties l'long d'la banque, et des maisons d'conséquenche étout. Y'en a d'aut' tchi sont bâties maîntchi sus la banque et supportées par des pilyers dans l'ieau en d'vant. I' sont toutes plieinnes dé marchandises dé toutes les sortes, et des fruits et ledgeunmes du pays. Y'a des marchands, étout, tch'ont lus marchandises et lus fruits dans des grands canots, et tch'i' s'âncrent dans eune cârre à vendre tout drait dé d'dans l'canot.

La populace, v'nue dans ses p'tits canots et batchieaux, fait ses acats. Y'a un conmèrce formidabl'ye en allant pour tchiques heuthes sans arrêt! I' pathaît qu'tout est milyeu marchi qu'en ville, et si nou peut en jugi par la foule dé p'tits batchieaux à s'entre-passer et s'entre-tapotter en faisant lus marchi, i' faut penser qu'chest vrai! Mais la grand' bieauté d'Bangkok est ses templ'yes! Ch'est des templ'yes Bouddhistes, et y'en a dans les quat' chents! Sans doute, nou n'les trouve pon dans toutes les cârres. I' sont dans d's enclios enmuthâlyis dans certaines vielles parties d'la ville. Iun d'ches enclios, lé tou du Palais-Templ'ye d'la cité, couvre un mille carré!

Les templ'yes et lus flièches et pagodes sont peints de toutes les couleurs, et pathaîssent couvèrts dé jemmes et d'pièrres précieuses tchi r'lisent au solé, mais ch'est actuellement des millions dé p'tits mios d'faïence, dé tèrrine et d'porcelaine couleuthées. Vrainment mèrveilleux à vaie! Les gens sont pèrmîns d'marchi partout parmi les templ'yes et d'monter amont les montées des pagodes, mais i' sont hardi apiques et l's anciens n'y montent pon. Lé d'dans des templ'yes et des pagodes s'entr' èrsembl'yent hardi. Ch'est des mèrvelles dé sculptuthes et d'ornéments dorés et peints de toutes les couleurs. Assise trantchil'ment dans l'mitan, y'a généralement eune ênorme statue du Bouddha, la fache calme et souôriante. Les gens du pays lus prostèrnent dévant l'Bouddha en dîsant lus prièthes.

Eune mèrveilleuse chose à vaie, étout, est les Barques Rouoyales faites sèrvi par lé Rouai, ses Minnistres et Hommes d'Êtat, en procêssion dans la rivièthe dans l'temps des fêtes nationales et occasions officielles. Y'en a trais ou quatre. À les vaie nou dithait tch'il' ont eune chentaine dé pids d'londgieu, mais ch'est p't êt' eune illusion. Dans touos les cas i' sont hardi longues, et faichonnées hardi comme les drakkars des Vikings et les gondoles dé Venise. La cheinne du Rouai est pus longue et pus ornée qué l's autres. I' sont toutes dorées et ornées dé sculptuthes dé toutes les sortes. Les buts pointus sont l'vés en l'air et finissent en têtes tchi donnent pûtôt l'idée dé bêtes fèroces, mais la cheinne du Rouai est rêéllement supposée êt' la tête d'un cyngne!

Lé dinmanche que ch'tais-là, j'èrgardis pour eune églyise Anglyicane et, mafingre, j'en trouvis ieune - “Christ Church”. À ma grand' surprînse, quand j'dis au Vitchaithe, le Révérend John Ironside, qué j'tais d'Jèrri, i' m'dit tch'il avait 'té Tchuthé au Douoyen Frossard à St. Sampson en Dgèrnési pour eune volée! I' y'avait eune convocation d'Êvêques Anglyicans des pays d'Extréme Orient à Bangkok dans l'temps et janmais j'n'avais veu autant d'Êvêques ensembl'yes au même sèrvice - la célébration chorale dé La Sainte Eucharistie - comme y'avait à l'églyise chu dînmanche-là. Lé Célébrant, en Chape et Mitre, 'tait l'Êvêque Koh dé Kuala Lumpur en Malaisie (j'crai tch'il est Chinouais), et l'sèrmon fut prêchi par l'Êvêque Gowing d'Auckland en Nouvelle Zélande. Dans la congrégation y'en avait chînq, l'Êvêque- Coadjuteur dé Melbourne en Australie, l'Êvêque dé Barrackpore (ou d'Bharatpur, j'eus d'la peine à attraper l'nom!) dé l'Inde, l'Êvêque dé Karachi en Pakistan, et deux Êvêques dé L'Églyise “Mar-Thoma”, dé l'Inde étout, eune Églyise supposée aver 'té fondée par l'Apôtre St. Thomas, tch'est en communion auve l'Églyise Anglicane. Ches deux Êvêques-chîn 'taient habilyis hardi comme les prêtres dé la vielle Églyise Copte.