Les Pages Jèrriaises

A * * *
UNE DEVINAILLE.

l.

Quand, dans des temps, oprès de tai assis,
Je m' mith' dans tes biaux yeux, et contemplant
Les nobles traits de tan visage charmant,
J'écout' ta vouaix si douoch', tan genti' d'vis;
Il y a trais mots, - trais petits mots de ren,
Que j'dithais ben;
Viyons, - les femm's, j'ai oui, sont si malines, -
Si tu les d'vines. -

2.

Trais mots touos simplles, et facil's à comprendre
Cherche pourtant, - mais tu airas biau faithe, -
Tu n'trouv'thas pas dans tout le Dictionnaithe,
Trais mots pus doux sait à dithe ou entendre!
Et qui, dits et redits, ofut-ch' mill'fais,
N'ennyient jamais!
S'ils pliais'nt du premi' coup, - le grand ennyi,
Ch'est de n'les ouï!

3.

Trais bénis mots qui sent'nt le paradis,
Qui s'dis'nt tout bas, et souvent même à g'noux,
Et v'nant du coeu' rest'nt vrais pour tréjous.
Les devines-tu? Tu l'dev'rais, m'est avis,
Mais pour t'aidji', regarde si tu peux
Les vais dans m's yeux!
Ah! si j'tais seux que tu m'les repet'rais,
Je les dithais! -

LAELIUS.

* Les trais mots de la "Devinaille" sont "Je t'aime", j'ai mins chutte note parce que j'ai pensé que parmi chutte maintié du genre humain qu'en Guernezi ils appellent "les mâles" i pouorrait ben s'en trouver quiques-uns qui sans chla seraient badrés. Quant a l'autre maintié ordinaithement et avec raison appelée la meilleure, oulle est trop espritée pour aver besoin d'assistance dans un itel cas. Je n'serais pas ravi tout d'même qu'il y en eut parmi ches charmantes personnes qui n' seraient pas marries que j'leux dithais chain que signifient les trais "ételles." J'n'ai pas que faithe de dithe que je sis tréjous diversement content de pouver faire pliaisi ès dames, mais i' faut chutte fais que j'les prie de m'excuser. Il y a de ches choses qui n'se disent qu'a l'ouotheille, - et ocquo pas à toutes les ouotheilles! - L.

 

Viyiz étout:

 

Les Pages Jèrriaises