Des d'vinnâles
Les Ménage ès Feuvres,
St Ouën,
Lé 16 dé septembre, 1978.
Moussieu l'Rédacteu,
Av'-ous oublié les vielles dévinnâles Jèrriaises? Ch'est, sans doute, ès pathents qué jé d'mande d'ité, car les mousses d'à ch't heu né l's ont probabliément pon ouies. I' m'est v'nu à l'ideé d'en mentionner tchitch'eunnes chutte sémaine et d'en donner les rêponses la s'maine tchi veint. S'i' y'en a d'entre vous tchi l's ont oubliées, les rêponses, ou pouvez vous entr'aîdgi à les d'vinner et pis les vérifier la s'maine tchi veint, mais s'ous-avez l'temps d'consulter les Bulletîns d'Quart d'An d'L'Assembliée d'Jèrriais ou les trouvethez d'dans. J'm'en vais les nunméthoter pour n'aver pon à les r'rêcrithe quand j'vouos donn'nait les rêponses:-
1. Tch'est tch'est pus gros qu'un boeu et tchi n'pèse pon la cruque d'un oeu?
2. Tch'est tchi fait l'tou du clios et tch'arrête à la brecque?
3. Tch'est tchi va dé ruette en ruette et tch'a la coue draite comme eune palette?
4. Dos dû, ventre dû, côtes molles et nez pointu?
5. Pourtchi qu'un j'va r'garde par dessus un fossé?
6. Tch'est tchi va sus l'ieau souos l'ieau et n'touche pon à l'ieau?
7. Tch'est tchi n'a qu'un pid et un' yi et tchi rouôle avaû l'côti?
8. Tch'est tchi fait mille pétits cannieaux et tch'arrête à la brecque du clios?
9. Tch'est tchi n'a ni chai ni os et tchi crie quand il êcliôt?
10. Si ou lavez (l'avez) né m'lé prêtez pas. Si ou n'lavez (n'l'avez) pas, prêtez l'mé.
11. À tch'est qu'tu penses quand tu n'penses à rein?
12. J'la vis vive, j'la vis morte et j'la vis couôrre auprès sa mort?
13. Pendile pendait, dormile dormait; pendile tchait sus dormile et dormile mangit pendile; tch'est qué ch'tait?
14. Dgix tchi halent et chînq tchi poussent, amont la ruette à Tranmepétousse?
15. Tch'est tchi n'a janmais 'té, ni janmais né s'sa?
16. Tch'est tchi va et veint, et reste tréjous à la même pliaiche?
17. Tch'est qu'ch'est qu'eune bêtise?
18. Tch'est tch'est long et bêlong, auve des barrotîns tout du long?
19. Tch'est tchi n'a ni os ni vie, mais tchi porte vie?
20. Tch'est tchi fait mille pétits pas à l'entou d'un tas?
21. Tch'est tchi va quat' à quat' et janmais n's'entr'attrapent?
22. Tch'est tchi marche sus sa tête à longs jours?
23. Tch'est tchi pathaît mus qu'un bouan dîner sus eune assiette?
24. Tch'est tchi r'semblye l'pus à un cat assis sus san driéthe?
25. Tch'est tch'est l'chein tchi touanne tréjous l'dos à la Reine?
26. Tch'est tchi bait san sang et mange san boudîn?
27. Tch'est tchi s'en va riant tchi s'en r'veint plieuthant?
28. Tch'est qu'un homme fait d'but, eune femme d'assise, et un tchian sus trais pattes?
29. Tch'est tchi n'a qu'un pid et un' yi, et tchi fait tout l'travas d'la maîson?
30. Combein tch'i' faudrait d'coues d'vaques pour aller à la leune?
Disons qu' n'en v'là assez pour à ch't heu. Gardez l's ièrs ouvèrts pour vaie les rêponses dans ma lettre, si j'en vai l'heuthe, sans doute, la s'maine tchi veint.
George d'La Forge
Viyiz étout: