Au mais d'févri, jé célébrons un jour,
La Saint Valentîn, fête prîncipale d'amour,
Et j'avons la couôteunme d'env'yer des flieurs
Ès chelles tchi ont entchéthaûdé nos tchoeurs.

ou dit:

I' mé donnit des flieurs comme sîngne d'amour,
Il éthait peu m'donner un clios dé chours!
Chu pouôrre médgian n'a pon du tout comprîns:
J'l'ai dit: i' né s'sa pon man Valentîn!

i' dit:

Oulle a les flieurs. Tchi don achteu? Aha!
I' mé faût eune grande bouête dé chocolats.
Eune femme n'peut pon rêsister à chennechîn.
Jé s'sai sans autchun doute san Valentîn!

ou dit:

Des chocolats? I' voulait qué j'grossîsse!
Comment l'arrêter? App'ler la police?
Jé li ai souvent explyitchi en vain:
Lé Dgiabl'ye s'sait préféthabl'ye comme Valentîn!

i' dit:

Eune carte pour li: mais tch'est qu'i' faût êcrithe?
Du séthieux? Ou tchique chose pour faithe rithe?
Nou pourrait êcrithe sîmpl'yement "Jé t'aime"...
Êt' amouotheux, ch'est vraîment un problème!

ou dit:

"La vie sans té est comme podîn sans crème"...!
I' dait êcrithe chu niolîn-chîn li-même!
Eune carte d'idgiot! Et sinnée auve un "X"!
Pourtchi est-che mé sus tchi s'n' èrgard sé fixe?

i dit:

Enfîn! J'nos n'allons dîner à ces sé.
Enfîn! Ou vèrra toutes mes qualités!
Au restaurant; des chandelles et du vîn.
Ché s'sa eune mémorabl'ye Saint Valentîn!

ou dit:

Au restaurant, l'médgian tchit à g'nouors
Et fit eune dêcliathâtion dé s'n amour!
Pour nous il a prédit un doux av'nîn.
J'suppose qu'i' pourra êt' man Valentîn!

Geraint Jennings
lé 14 dé Févri 1998