Les Pages Jèrriaises

Messire Robert Pipon Marett - "Laelius"

(20/11/1820 - 10/11/1884)

Bailli d'Jèrri

Robert Pipon Marett

Robèrt Pipon Mathet, né le 20 novembre, 1820 à St. Pièrre, était l'fis aîné (en deuxième neuches) dé Peter Daniel Mathet, Mâjeur dans l'Infanterie d'Madras dé la "East India Company" et dé Mary Ann Pipon, fil'ye aînée dé Thomas Pipon, Lieutenant Bailli. I' fut êdutchi à St. Hélyi à c'menchi et pus tard à l'Univèrsité d'Caën, pis à Paris à la Sorbonne. I' fut admîns avocat d'la Cour Rouoyale en 1845, mais en 1846, à cause dé la mal santé d'sa méthe, la fanmil'ye s'en fut à Blois. Étant extrêmement întérêssi toute sa vie entouor la bâtithie, il aîdgit à construithe, du temps tch'i' fut là, l'Églyise Angliaîche à Blois.

Quand i' r'vînt en Jèrri i' s'întérêssit dans la politique et, auve d'autres, sé mînt à dirigi eune gâzette "La Patrie". Ch'tait là tch'i' c'menchit à publier ses poésies souos l'nom-d'plieunme dé "Laelius".

Nou peut dithe qué Robèrt Pipon Mathet fut iun des touos miyeu poètes Jèrriais, si pas l'miyeu. Ses productions sont du pus bieau style et du miyeu goût et surpâssent pé't-êt' tout ch' tch'a 'té êcrit dans nouot' langue. Étant natif dé La Mouaie, san Jèrriais est du bouon mouaîtîn. Éprins d'la bieauté d"'La Fille Malade", François Victor Hugo erproduisit chutte poésie dans sa "Normandie Inconnue". Abraham Mourant êcrivit: « En un mot, les productions de M. Marett sont du plus beau style et du meilleur goût ; elles surpassent tout ce qu'on a écrit en jersiais ».

Moussieu Mathet fut un homme illustre et un grand savant, et i' prannait întéthêt dans eune mâsse dé choses. Et il avait eune grand' connaissance des écrits dé Dickens et Thackeray, et pouvait donner des longs r'cits dé Virgil et Horace et la pus grand' partie du "Paradis Perdu" par Milton.

Robert Pipon Marett

I' fut Connêtabl'ye d'St. Hélyi, pis Avocat Général, Protchuleux, et Bailli en 1880. I' fut iun des fondateurs dé La Société Jèrriaise et pus tard i' d'vînt Président. I' mathyit Julia Anne Mathet, fil'ye piêsnée dé Philippe Mathet, d'La Haule. Lus seul fis fut lé célèbre Robert Ranulph Mathet, Recteu du Collège Exeter, Oxford - iun des pus fanmeux anthropologistes du Monde entchi. Ieune dé ses trais fil'yes, Julia Mathet, d'vint étout Président d'La Société Jèrriaise. Un p'tit fis, Robert Hugh Kirk Marett, CMG, O.B.E. 'tait le Consul Angliais à Boston ès Êtats Unis.

Robèrt Pipon Mathet d'meuthait au Blianc Pingnon, St. Brélade, mais quand un feu détruisit la propriété en 1874 la fanmil'ye s'en fut au Mangni d'La Haule, et ch'tait là tch'i' pâssit l'pas le 10 novembre, 1884. Il avait 'té créé Chevalier en 1880.

 

 

Les Pages Jèrriaises