La Saint Valentîn est la fête d'l'amour, lé quatorze d'Févri. Pèrsonne né sait exactément quand tchi qué Saint Valentîn vivait, mais s'lon la légende, i' sembl'ye qu'i' fut martyrisé à Rome avant lé quatrième siècl'ye. I' tait un êvêque mais l'histouaithe n'explyique pon pouortchi qu'i' d'vînt lé patron d's amouotheurs.
Y'a eune vielle crianche qué lé quatorze d'Févri 'tait l'jour quand les p'tits ouaîsieaux lus mathyîssent, et ch'est pôssibl'ye qué Saint Valentîn èrchut sa rêputâtion grâce au fait qué sa fête 'tait lé même jour.
Si les p'tits ouaîsieaux daivent lus mathier, il en est d'même auve l's hoummes et les femmes étout. Au r'nouvé, les pensées d'un janne houmme sont touônnées dgaiment vèrs l'amour - et les pensées des jannes fil'yes étout sans doute. Nou donn'nait des flieurs ou des ribans à la cheinne (ou au chein) qu'nou-s-aimait coumme eune sîngne d'amour. Les cheins et les cheinnes tchi savaient êcrithe donnaient des lettres d'amour. Auve l'învention du système postale, bein seu, nou c'menchait à env'yer des cartes d'Valentinne. Et nou c'menchît à înmprînmer des cartes et les vendre dans les boutiques pouor la Saint Valentîn.
Ach'teu, la Saint Valentîn est bein conmèrcialisée. Quand nou marche lé long des c'mîns en Ville, nou vait dans les boutiques des grands rouoges tchoeurs, des chocolats, des roses et d'aut's flieurs. Même dans l's agences dé viage, nou suggéthe des vacanches romantiques, et les supèrmarchièrs sont prêts étout à suggéther des fricots à deux auve des frâses et d'la champangne pouor séduithe "l'objet d'vos affections".
Ah, tchi niolîn! L'amour des sou est la réchinne dé touos les maux.
Ch'est l'amour, et l'amour seul, tch'est l'pus înmportant dans la vie. Dans la Bibl'ye, Saint Paul nos dit qu'i' y'a tréjous la fouai, l'espé et l'amour - touos les trais - mais lé pus grand des trais est l'amour.
Si Saint Valentîn fut tué y'a bein d's années pouor sa fouai Chrêtchienne et l'amour dé Dgieu, i' n'faut pon oublier dans chu monde modèrne qué l'amour est pus fort qué la mort, et ch'n'est pon les chocolats, ni les cartes nitout, tchi s'sont êtèrnels.
Mais, acatez vos flieurs, env'yez vos cartes, b'vez vot' champangne, et faîtes coumme les p'tits ouaîsieaux - trouvez vot' parchonnyi (ou parchonniéthe) et c'menchiz à bâti vot' nid ensembl'ye. Ayiz eune bouanne Saint Valentîn!
Et s'ou voulez m'env'yer eune carte d'Valentinne, jé s'sai heûtheux d'l'èrchéver!
Viyiz étout: