Idole de man tcheur, O té en tchi je pense
Quand mes p'tits yiers piercheux s'ouvrent tard le matin
Dis mé si tu veux bain par pitchi d'ma souffrance
Etre man Valentin.

Car j't'aime, la Souky - oui, pus qu'un lopin d'schucre,
Oui - pus qu'la belle bague à djamant que je mets,
Pus qu'du lait épuré quoiqu' de crême tout mucre
Et d'la campann' tout frais.

Car pus duoches qu'l'schucr' sont ocquor' tes paroles
Et tan r'gard qu'man djamant est pus brilliant, pus bé,
Et tes mains - quand i'n' sont pon à s'tuoilli d'castrolles -
Sont pus bianches que l'lait!

Tes ch'veux que tu corles en des boucles si riches
Sont couleur de gravi par un solé cuochant,
Et pendent sus tan front coumm' rangie d'sausiches......
Portrait doux et charmant!

O! s'tu savais combain est triste la puor'vie
Que j'passe loin de tè dans un chagrin profond!
Alors man tcheur est vied' coumme un' pouchett' trillie
Ou un ticle sans fond!

Mais quand tu es près d'mé et que j'te vé suorire
Alors je sis heureux coumme un cat devant l'feu......
Et le r'gard te ten yi, dans lequel je me mire,
Me transporte et m' émeut.

O dis que tu m'aim'ras
Car si tu n'le fais pas
J'irai sus la cauchie
Et sans r'gretter la vie,
Malheureuse sans té
Dans les louem's je m'jettrai!.....
Et pis man blanc fantôme
Quand tu s'ras seule "at home"
A cuotre ou à coutchi,
Veindra te reprochi
D'avé 'té - O ma belle
Cause d'ma mort cruelle.
Et le r'mords te happ'ra
Coumme suoris par cat.
Pis toute trésallée
Tu cuor'ras dans l'allée
En faisant di tés rouaux
Que tu'effrit'ras les ch'vaux
Qui passent dans la rue
Au devant de tan hue.
Et vaisins d'accuorir
Criant qu'tu vas muorir.

Mais t'cheque j'dis ilo!
Tu pleures...... Dont, tu m'aimes
Pus qu'un biau bourdelo
Ou un chou à la crême!
Mêm' pus qu'un neu bonnet
Ou robe de sarsnet!
Tu pleures..... Dont, tu m'aimes!
Oh! j'n'sis pas le même!
Tu m'aimes: O bonheur!
O que je s'rons heureurs!