Iun des charmes d'aut'fais les mus connus des jannes fil'yes et tchi lus pliaithait hardi était lé chein d'la couôteunme du jour de St Thomas - le 21 de dézembre.
En s'couochant chutte séthée-là, la janne fil'ye allait à r'tchulons jusqu'au liet atou un pépin dans la main. Ou m'ttait l'pépin souos s'n ouothilyi et, en montant dans l'liet disait chu charme-chîn trais fais: -
'Le jour dé Saint Thomas, lé pus court et lé pus bas,
Fai-mé vaie en m'endormant,
Lé chein tchi sétha man galant,
Et l'pays et la nàtion
Où est tch'i' d'meuthe, et sa maison.
Et san mêtchi pouor qué j'sache,
Et pis étout qué j'vaie sa fache;
Tch'i' sait bé
ou tch'i' sait laid,
Té tch'i' s'sa
Jé l'aim'thai;
Saint Thomas fai-mé la grâce
Qué jé l'vaie et qué j'l'embraiche!
Ainsi-soit-il!'
La janne fil'ye né dait pon dithe un autre mot auprès ch'la, et ou saitha chein qu'ou veurt saver dans san rêve. Et d'vant longtemps lé galant la d'mand'da en mathiage.
Y' avait difféthentes vèrsions des mots, sans doute, selon les difféthentes parties d'Ile. Y'en avait tchi criyaient tch'i' fallait pâsser deux êpiles, en les crouaisant, lé travèrs de pépin. D'autres enveloppaient lé pépin dans la cauche du pid gauche, et d'autres étout disaient tch'i' fallait haler chutte cauche-là la dreine et la fliantchi par sus s'n êpaule gauche.
Eune aut'couôteunme étout, charmante petite couôteunme que toutes les jannes fil'yes connaissaient, était la cheinne dé laissi êcapper un pépin tint entre deux dés, tout en r'citant:
'Pépin d'amont, pépin d'ava
dé où est qu'man galant veindra?'
Eune aut' tchuthieuse couôteunme était pouor eune janne fil'ye fianchie à laissi l'ithangnies dans sa chambre, ouaithe qu'ou fûsse bein r'gardante a êpousseter et netti autrement. Y'en avait tchi chèrchaient des pétres pouor mettre dans lus chambre! Car en s'revillant châque matin, autant d'ithangnies qu'eune janne fil'ye fianchie viyait autant d'fais san galant l'embraich'chait chu jour là.
Quand eune janne fil'ye est en amour d'un janne homme tchi n'l'aime pon, né v'chîn ch'tch'i' faut qu'ou faiche. Faut faithe un souhait, Pis prendre eune tchul'lee d'sé et l'envelopper dans du papi, et mettre chutte pap'sée â la clié dans sa chambre pouor neuf jours. Par chu temps-lâ san souhait s'sa accordé, et l'sé étha dispathu.
Chu janne homme veindra envèrs lyi et ou s'sa toute contente et heutheuse.
Viyiz étout: