À l'Amour!

(Peut êt' chantée sus l'air dé “Until”).

Dévant qu'tu n'vînsses lé gardîn 'tait sans flieurs,
L'êtaile en haut n'êcliaithait pas les cieux,
Les chants né v'naient pas rempliaichi les plieurs
Ni l'espéthance mett' la jouaie ès yeux.

O, flieur, restes êpannie et tout souôrrit,
Ecliaithes, êtaile, et la niet dispathaît,
O, chant si doux, continnues à m'rêjoui;
Flieur, Etaile, Chant - ch'est l'Amour, l'Amour à janmais!