Les Pages Jèrriaises

L'Amour est pus fort qué dgiêx boeux

L'amour, s'lon l'vièr diton, est pus fort qu'dgiêx boeux. Si l'amour est pus fort qu'du chocolat, des drâses à dentelle, et toutes les aut's niv'lot'ties auve tchi les conmèrchants tâchent dé nos rattither à l'entou d'la Saint Valentîn, jé n'sai pon. Mais ch'est probabl'ye qu'autcheune douoche ou autchun galant aim'thait mus r'chéver autcheune chose qué dgiêx boeux coumme présent.

Assa, les boeux n'sont dgéthe romantiques - sénon qu'nou-s'est, par chance, eune vielle fil'ye dé vaque. Ch'est en tchi les vaques amouothachies n'sont pon entchéthinnées d'chocolats. Les bêtes à cônes né lus entr'-envyient pon d'cartes au mais d'Févri. Sans doute si les boutiques à cartes pouvaient vendre des cartes ès bêtes, i' lé f'thaient, car y'a toutes les manniéthes dé cartes pouor toutes les occâsions, dgia.

Si Saint Valentîn lî-même avait r'chu des cartes dé Valentîn, il' éthait 'té bein ravi, ou pus à co, il' éthaient 'té bein ravis. Car y'avait 'té pus dg'iun saint d'chu nom-là, et viyant qu'i' fûtent machacrés coumme martyrs, eune carte pouor dithe "èrdgéthis-té bétôt" éthait 'té atchilyie mus qu'eune carte d'amour. L'amour va acanté la fouai et l'espé - et j'pouvons tréjous espéther l'amour en fouai.

S'lon eune vielle crianche, la Saint Valentîn est l'jour quand touos les ouaîsieaux lus mathyient. Les paons et paontêsses paonnent et lus pathannent ordgilleusement; les coucouroux font coucourou; les cardrinnettes font la carre, et les mauves, les pigeons, les cahouains et mithacl'ye à quat'. I' font lus nids, i' ponnent lus oeux, et né v'là acouo eune nouvelle généthâtion d'ouaîth'lîn à voltilyi, à tuiter et à vos rêvilyi à sinne dé jeu atout lus chant. Dgieu mèrcie qué j'n'avons pon d'autruches par les c'mîns car nou n'voudrait pon disteurber lus bécots. L'amour pouôrrait êt' pus fort qu'deux autruches, mais jé n'voudrais pon l'êcanchi.

S'lon eune aut' crianche, les chigouongnes apportent les p'tits êfants ès pathents en fanmil'ye. Ch'est eune bouonne chose qué ch'est ches forts ouaîsieaux-là tch'ont l'djobbe dé d'livrer les nouvieautés, car si chutte tâche fut laîssie ès raîtchieaux nou-s'éthait eune pause à espéther, et cèrtainement bein pus qu'neu mais. Et s'nou crait chein qu'nou-s'êcrit dans les gâzettes (pouor dé mé jé n'crai pon même chein qu'j'êcris, mé) les p'tits êfants sont d'pus en pus b'sants et d'pus en pus gras. Si l'affaithe continnue d'même, i' nos faudra dgiêx boeux justément pouor tchitchier ches p'tchiots bieillus. I' sont dgia forts assez, sénon pus forts qu'l'amour.


Geraint Jennings  

 

Viyiz étout:

 

Les Pages Jèrriaises