En Jèrri, j'aimons bein les vielles histouaithes -
J'en avons un tas, d'toutes sortes et d'manniéthes,
Mais les pus belles dé toutes, ch'est seux,
Ché sont les mots des amouotheux;
Ch'est hardi bé, quand nou les vait
S'entre-faithe la carre, et pis s'mathier
Dans la pâraisse dé Grouville.
Chu bieau janne coupl'ye, nouvieaux mathiés,
Dans la campangne nés et êlevés -
Dé bouons fèrmièrs, dé bouannes rachinnes,
Des gens d'Êglyise et Surveillants...
Falle, Le Sauteur et Mouothant
D'La Ville ès Ph'lippes et dé Longueville
Tout dans la pâraisse dé Grouville.
Ches deux jannes gens s'en vont au large
Iou qu'y'a pus d'nièrs qué d'bliancs visages,
Et tchiquefais quand i' s'assiéthont
À lus "palm oil chop" ou lus "ground-nut stew"
I' pens'sont bein à lus siez ieux,
Et sé d'mand'dont p't-être si j'avons 'té
Ou à basse-ieau ou au drannet,
Mais tréjous i' r'gardéthont
Lé même solé, la leune d'la niet
Qué j'viyons, nous,
Dans la pâraisse dé Grouville.
Eune chose dé pus, et ch'est bein seux,
Ch'est qu'nous étout j'pens'sons en ieux -
Pathents, anmîns - j'lus êcrithons
Toutes les nouvelles du haut et du fond;
Et d'vant qu'nou n'sache iou qu'nou-s-en est
I' r'séthont 'chîn, dans dgiex-huit mais;
Ah, chu jour-là y'étha d'la jouaie,
Quand chu janne coupl'ye j'pouôrrons èrvaie
Dans la pâraisse dé Grouville!
|
